Read gen Èlododowo 25 Bible Online

Èlododowo 25 - gen bible

Èlododowo 25

¹Èfìɔ Salomɔ̀n be èlododo buwo ye nyi ekèawo. Yudà be èfìɔ Èzekìas be ènuŋlɔ̀tɔwo, lè yebe èfìɔsa mè, wo ye ŋlɔ̀ wo dàɖɛ.

²Mawu be gogo ye nyi be bèa wla ènu ɖewo do àmè. Eye èfìɔwo be gogo ye nyi be woa yì kè ɖo ènu kèwo Mawu wlaa ŋuti.

³Mi mu la teŋu nya jiŋùkusi be èji yìyi kaka la nya ànyigbã be ègũ wɔ̀wɔ ò. Nène a ke mi mu la teŋu nya ènu kèwo lè èfìɔwo be èjì mè ò.

⁴Ɖè èɖi kè lè klòsalò mèa jo ne gosìmitì bèa sɔ ɛ̀ wɔ̀ àcɔɖonu àdodoe na wò.

⁵Ɖè àmè nyrãkuwo jo lè èfìɔ be àgbàsa mè, ne bèa kplɔ̀ dùkɔ̃a lè jɔ̀jɔɛ sòso mè, eye nènea yebe ŋusɛ̃ la gbà likè kpe è.

⁶Mù gbà nɔ kɔ ɖokoe wò yì ji lè èfìɔ be ŋùkɔ̀ ò, eye mù gbà nɔ̀ àmègãwo be tèpe cã ò.

⁷E la nyɔ be woa gblɔ̃ na wò bòhũ be: “Va nɔ̀ ŋùkɔ̀”, sɔ wu be woa ɖiɖi wò lè èfìɔ be ŋùkɔ̀.

⁸Mù gbà ciji gblɔ̃ ènu kè wò nya lè kòjoɖope ò. Ɖo leke wò la wɔ̀ ne kɛ̃tɔ wòa teŋu ɖèfiɔ be wò le ɖàjè ò?

⁹Ne wò le hɛ̃ ènyà kudo àpo havia, mì jrà ènyàa ɖo lè mìa dòmè, vɔ̀a, mù gbà yì gbã ènyà kè àmè bu gblɔ̃ na wòa ò.

¹⁰Mu nyi nène òa, àmè kè wò le gblɔ̃ ènyà na a, teŋu zũ wò, eye wò mu la gbà teŋu nyi àdɔ̀mènyà wlatɔ ò.

¹¹Ènyà kè wo gblɔ̃ ɖo àmèhùenua xɔ̀asì wu sìkanu kè wo sɔ klòsalò ɖo àcɔ na a.

¹²Ènunyatɔ be ŋùmèkãkã lè na àmè kè ɖona ètoa sìgbè àlɔ̀ga àlo èwlɔ sìka kè kɔ̀a tɔ̀ nène.

¹³Àtikplɔtɔ kè wɔ̀nà ànùkua nana ŋusɛ̃ àpetɔ kè dɔ̃ ɛ̀a. E lè sìgbè èjijàja kè nana fàfa lè zòzo blibo mèa nène.

¹⁴Àmè kè fìãnà àjɔ̀gbè vɔ̀ mu wɔ̀nà ɖo eji òa, lè sìgbè lilikpo kudo àya pòpo kèwo mu nana èjijàja ɖekpe òa nène.

¹⁵To àdòdò blibo hɛ̃hɛ̃ jia, wo la teŋu hɛ̃ kòjoɖotɔ be àyè va ènyà ɖe gbɔ. Eye wo la teŋu ɖè èmɔ̃xenuwo kpata jo to blɛ̀wù wɔ̀wɔ mè.

¹⁶Ne wò kè ɖo ànyisì ŋutia, ɖù àkpa kè jè na wòa kpò. Ne wò ɖù ì wunua, wò la tru.

¹⁷Mù gbà fɔ̃ nɔ yì èxlɔ̃ wò gbɔ tɛ̀gbɛ̀ ò, mu nyi nène òa, wò la va tì ì eye e cã la jo va crì ènyà wò gbɔ.

¹⁸Àmè kè le dohùɛ do nɔ̀via kunùtɔ̀a, lè sìgbè èkpò tìtri, èwui àlo àŋùti kè ènu ɖa na ŋutɔa nène.

¹⁹Woa do èjì ɖo àjèɖàtɔ ŋuti lè gbledo mèa, nyi bòmècici sìgbè àɖu gbegblenɔ̀ be nyìlã ɖùɖu àlo woa kù ɖo àfɔ̀ ŋɛ̃ŋɛ̃ ŋuti nène.

²⁰Jìjɔɛ be èhà jìji na ènuwɔ̀donɔ̀a, lè sìgbè wo lè àma-àma lè fàfa hùenu, àlo wo kɔ̀ vɛ̃ gbegble ɖo àbì mè nène.

²¹Ne àdɔ̀ le wù àpo kɛ̃tɔa, na ɛ̀ ènu bèa ɖù; ne sìkɔ le tì ìa, na ɛ̀ èsì bèa nù.

²²Ne wò le wɔ̀ ekèa, wò la nɔ do nupo na ɛ̀ sìgbè èzòka zòzo ye wò le bɔ̀ ɖo èta na ɛ̀ nène. Eye Tɔhonɔ̀ la ɖo e tèpe na wò.

²³Àvego be àya pòpo hɛ̃nà èjijàja vana, àjèɖàɖawo nana àmèwo binajì.

²⁴E nyɔ be woa yì nɔ̀ ètrè lè àzɔ̀ge wu be woa nɔ̀ èdu kudo nyɔ̃nù kè wɔ̀nà àjrèa.

²⁵Àŋɛ̀nyuɛ̃ kè so àzɔ̀ge vaa, lè sìgbè èsì fàfa nène na àmè kè èsìkɔ le tìa.

²⁶Àmè kè le wɔ̀ nyuɛ̃ vɔ̀ be le hũhũ lè àmè nyrãku ɖe be ŋùkɔ̀a, lè sìgbè èsìdo àlo vudo kè wo pòɖia nène.

²⁷Mu nyɔ be woa nɔ nù ànyisì sùgbɔ àlo woa nɔ ji ègã nyinyi glo ò.

²⁸Àmè kè mu teŋu ɖùnà yebe àdɔ̀mèze ji òa, lè sìgbè èdù kè lè nùvòa nène; èdù kè mu ɖo àgbògbò òa.