Read gen Èlododowo 26 Bible Online

Èlododowo 26 - gen bible

Èlododowo 26

¹Sìgbè àlekè ènu fàfa kudo ènu zòzo mu zɔ̃nà ò, eye sukpa be èji ye jànà lè nukuyàya be hùenua; nènea ye bùbu mu jè na sùkunɔ̀ ò.

²Sìgbè lekè àwàwàvi va yìnà àlo lekè xèvi zrònà a, nènea ye kpɛ̃sɛ̃ kè mu jɔ̀ òa, mu gblena ènu lè àmè ŋuti ò.

³Èsɔ ye wo sɔna èlãba pònà eye èkpò àlo èba lè na sùkunɔ̀ be ŋùgbedòmè.

⁴Mù gbà ɖo ènyà ŋuti na sùkunɔ̀ to yebe èlãnu wɔ̀wɔa ji ò. Mu nyi nène òa, wò la trɔ sìgbè e ye ke nène.

⁵Mù gbà wɔ̀ kudo sùkunɔ̀ sìgbè àmè ŋutɔ-ŋutɔ nène ò. Mu nyi nène òa, e la susu be yè ɖo ènunya.

⁶Àmè kè nya vɔ̀, le do àŋɛ̀ na sùkunɔ̀a, le wɔ̀ ènu sìgbè àmè kè ɖè kàkla ɖo ye ŋutɔ be àfɔ̀ ji tɔ ɛ̀ sòsoa nène. Ɖo e le do àfɔ̀ bùblu na ye ɖokoe.

⁷Sùkunɔ̀ be èlododo nɔ̀nà sìgbè kpòtɛ̃nɔ̀ be àfɔ̀wo nène.

⁸Vivi dodo sùkunɔ̀ ŋuti lè sìgbè èkpe babla ɖo rɔbàtu ŋuti nène.

⁹Sùkunɔ̀ be èlododo lè sìgbè àŋùti lè àmè ɖe kè nù àhà mua si nène.

¹⁰Àpetɔ kè xɔ̀ sùkunɔ̀ àlo àhànùmunɔ̀ ɖo èdɔ mèa, le hɛ̃ tùkaɖa va dùkɔ̃a mè.

¹¹Sùkunɔ̀ mu trɔna lè yebe èlãnu wɔ̀wɔ yomè ò. E lè sìgbè àvũ kè trɔyì ɖù ènu kè be trua nène.

¹²Ne àmè ɖe sɔ ye ɖokoe wɔ̀ ènunyatɔa, wò ɖo la nya. Ɖo àhodotɔ mu fiɔna àsi ò.

¹³Kuviɔ̃tɔ gblɔ̃nà be: “Èlã lenu ɖe lè èmɔ̃a ji, jãŋùta lè èmɔ̃a ji.”

¹⁴Sìgbè lekè hɔ̃tru trɔna lè yebe àsawo mèa, nène ke ye kuviɔ̃tɔ cã trɔna lè àba ji yeŋu.

¹⁵Kuviɔ̃tɔ jrona la do àlɔ̀ àgbã mè fàa, vɔ̀ bèa sɔ ènuɖùɖu do ènu mè cã, nyina tùkaɖa na ɛ̀.

¹⁶Kuviɔ̃tɔ susuna be yè ɖo ènunya wu àmè fuu kèwo le ɖo ènyà ŋuti kudo ènunyaa.

¹⁷Àmè kè le do ènu ènyà kè mu kã ɛ̀ òa mèa, lè sìgbè àmè kè le ji la bla àvũ vɔ̀, le le ètowo na ɛ̀a nène.

¹⁸Àmè kè le blè nɔ̀viawo vɔ̀, le gblɔ̃ be yè le gble ye à, lè sìgbè àɖàhùatɔ kè le dà èzòtikpo kudo àŋùti kè wùnà àmèa, pòhlaa nène.

²⁰Ànakè ye lè, ye èzòa cã kpɔ̀tɔ̀ lè. Ne ànakèa vɔ̀ kpòa, èzòa cã la ci. Ne àmènya toto ɖo ɖaa, àjrè cã la gũ.

²¹Àka nana èzò wɛwɛ eye ànakè dona tɛ̃tɛ̃ na èzò. Nène a, àmè kè lɔ̃nà àjrèa, dɔ̃nà àmè ɖo kòjo mè.

²²Àjèɖàɖa be ènyàwo vivina sìgbè ènuɖùɖu nène. Wo mu ɖona ètù ò.

²³Èjì nyrãku kè mè lɔ̃lɔ̃ be ènyà le to lèa, lè sìgbè klòsalò kè mè èɖi gbà cia nène, kè ŋuti wo sì bàba ɖoa nène.

²⁴Àmè kè crìnà àmèwoa, wlana ɖo yebe nupo pòpo gɔ̃mè. Vɔ̀ ènudrãwo ye lè èjì mè na ɛ̀.

²⁵Mù gbà dojì ɖo e ŋuti, ne e le klì ènua ò. Ɖo yebe èjì ɖɔ kudo ènu drã.

²⁶E bina ŋutɔ sɔ wlana ènu bàɖà kè lè e mèa, vɔ̀ èdùa kpata va nyana yebe èku nyànyrãa.

²⁷Àmè kè le ɖè èdo ɖo nɔ̀via be gɔ̃mèa, ye ŋutɔ va kpɔna ye ɖokoe lè èdo ŋua tutu mè. Èkpe kè àmè ɖe le tùtù be ne jè yè nɔ̀vi jia, va trɔna jè àmè kè le tùtù ìa ŋutɔ ji.

²⁸Àjèɖàtɔ crìnà àmè kè si be ɖàjè ɖoa. Eye àmè kè vivina ènu mèa, la gbã èdù blibo.