Read gen Èlododowo 27 Bible Online

Èlododowo 27 - gen bible

Èlododowo 27

¹Mù gbà yigò ɖo èsɔ̀ kè gbãnà ŋuti ò, ɖo wò mu nya ènu kè la jɔ̀ egbèa ŋutɔ cã ò.

²Tàsi àmèwo ne woa kafu wò. Àmè bu ne wɔ̀ ɛ̀, vɔ̀ mu gbà nyi èwò ŋutɔ ò!

³Èkpe gãa kpɛ̃nà, èkɔ sako ɖèka cã kpɛ̃nà, vɔ̀ sùkunɔ̀ be àdɔ̀mèze dodo gbà ɖo kpɛ̃kpɛ̃ sɔ wu.

⁴Àkpasɛ̃sɛ̃ be ènu wɔ̀wɔ nyi ènu jiŋɔ ɖe, àdɔ̀mèze dodo lè sìgbè èsì sàsra kè ɖɔna nène, vɔ̀ àmè kɛ ye la teŋu nɔ̀tè lè ŋuhuã nu ò?

⁵Ènyà dɔ̃dɔ̃ kè so èjì mèa, nyɔ wu èxlɔ̃ wɔ̀wɔ kè mu dɔ̃ àmè ji òa.

⁶Lɔ̃lɔ̃ nɔ̀nà àmè be èxlɔ̃ be ènyà gbe na àmèwo mè, vɔ̀ jè àyè na kɛ̃tɔ kè le ɖè lɔ̃lɔ̃ be àfɔ̀a.

⁷Àmè kè àdɔ̀ mu le wù òa, gbena ànyisì ŋutɔ cã. Vɔ̀a, àmè kè àdɔ̀ le wùa, mu gbena ènu ɖekpe ò.

⁸Àmèjro kè lè ègbe ji le yìa, lè sìgbè xèvi kè yì boo lè yebe àtɔ̃ gbɔa nène.

⁹Àmìsìsi kudo anùwɛtrɛ̀wo dona jìjɔɛ na àmè. Èxlɔ̃ be àmè hɛ̃hɛ̃ blɛ̀wù nyɔ wu anùwɛtrɛ̀ àdodoe.

¹⁰Mù gbà gble èxlɔ̃ wò, àlo ètɔ wò be èxlɔ̃ ɖɛ ò. Mù gbà yì fòfo wò gbɔ ne e nyi be wò ɖo xaxa mè ò. Àmè havi kè sɔ̀ àmè gbɔ nyɔ wu fòfo kè lè àzɔ̀ge boa.

¹¹Èvi nyè, kplɔ̀ ɖokoe wò kudo ènunya ne ma kpɔ jìjɔɛ ɖo ŋuti wò. Eye ne àmè ɖe zũ mù a, mù la teŋu ɖo e ŋuti.

¹²Ne gbledo vaa, àmè kè ɖùnà ye ɖokoe jia, jina ètabèpe. Vɔ̀ àmè mà-ɖo àɖàŋùwo kpɔ̀tɔ̀ nɔ̀nà èmɔ̃a ji kaka va jènà gbledo mè.

¹³Ne àmè ɖe va ɖo èxɔ̀ lè gbɔ wò, nɔ̀ ŋùgbe na àmè bu be bèa do ègà lè gbɔ wòa, ne sɔ yebe àwù sɔ do àwòba na wò. Ekèa ye la nyi ɖase na wò ɖo e nɔ̀ ŋùgbe sɔ do ègà na àmè kè wò mu jèsi òa.

¹⁴Àmè zũzũ ye nyi ne wò fɔ̃ le do ègbè na àmè ŋùdekɛ̃nyɛ kudo àpa lelelea.

¹⁵Nyɔ̃nù be ènyàdɔ̃dɔ̃ nɔ̀nà sìgbè ŋùkèkè be èjijàja mà tɔtè nène.

¹⁶E la nɔ̀ na àmè kè ji be yèa nɔ̀ ɛ̀ tèa sìgbè àya be le ji la tɔtè nène. Àlo sìgbè àmì be kù ɖo àlɔ̀ mè nène.

¹⁷Gàkpo ye ɖana gàkpo, àmèwo be èdunɔ̀nɔ ye nana àmèdòmè nɔ̀nɔ vivina.

¹⁸Àmè kè lenabè na yebe àtia, la ɖù yebe èkusɛ̃sɛ̃wo. Sumɔvi kè lenabè na àpetɔa, la xɔ̀ bùbu.

¹⁹Àmè be susu zena lè ye ŋutɔ be ŋùmè sìgbè lekè wo kpɔna àmè be ŋùmè lè èsì mèa nène.

²⁰Èkuwode be èdoa mu ɖɔnapò ò. Nène a ke ye àgbètɔ cã le ji ènu yeyewo.

²¹Èzò ye wo sɔ dona sìka kudo klòsalò kpɔ be wo nyɔ mà a. Eye àmèwo be ɖase ye wo sɔ kpɔna àmè be àsìxɔ̀xɔ.

²²Ne wò gbà to sùkunɔ̀ lè èto mè ŋutɔ cã a, yebe ènuwɔ̀wɔ ya kpɔ̀tɔ̀ tɛna ɖo e ŋuti.

²³Le ŋùku ɖo ègbɔ wòwo ŋuti nyuɛ̃ ɖe ne wòa lebè na àlɛ̃ha wòa.

²⁴Nyàwo ye be nyi be àdɔ̀kùnu mu dɔ̃na ò, eye hùɛ̃yi mu sona ètɔwo ji kɔ̀nà ɖo ɖèviwo ji ò.

²⁵Sò ègbea lè àgblèa ji eye ne ègbe mumu buwo toa, wòa lɔ ègbe pupuawo lè ètowo ji.

²⁶Nyì ègbɔwo ne wòa sɔ woabe èfua sɔ wɔ̀ àwù do. Nyì ègbɔsuwo eye wòa sà wo sɔ plè àgblè-nyigbã yeye.

²⁷Nyì ègbɔnɔ sùgbɔ ne wòa ɖo nyìnɔsi drì. E la nyì wò, la kpɔ àpo xòmè ji kaka la jè àpo sumɔ̃viwo ji.