Read gen Èlododowo 28 Bible Online

Èlododowo 28 - gen bible

Èlododowo 28

¹Àmè kè wɔ̀nà ènu bàɖàa sina, ne àmè ɖekpe mu le nyà ɛ̀ cã òa. Vɔ̀a, àmè kè wɔ̀nà ènyuɛ̃a kãna ɖo ye ɖokoe ji sìgbè jãŋùtavi nène.

²Ne hũnyà-hũnyà jɔ̀ lè èdù ɖe mèa, àmè sia àmè nyina àpetɔ. Vɔ̀a, ne èdùkplɔ̀tɔa nyi ènunyatɔ gbà ɖènà àɖàŋùa, yebe jiɖùɖua linakè goŋu-goŋu.

³Àmè kè zĩna àmè gbɔjɔ gbɔjɔwo ɖo ànyi a lè sìgbè èjijàja kè le gble nukuyàyawoa nène.

⁴Àmè kè mu wɔ̀nà ɖo èse ji òa, kanafu àmè nyrãkuwo. Vɔ̀ àmè kè wɔ̀nà ɖo èse jia, mu kãmana na àmè nyrãkuwo ò.

⁵Àmè nyrãku mu sɔnaɖe lè èse ji wɔ̀wɔ mè ò. Vɔ̀a, àmè kè jina Tɔhonɔ̀a, sènà èse ji wɔ̀wɔ be gɔ̃mè.

⁶Wɔ̀amènɔ̀ kè le nɔ̀ àgbè lè ànùkua mèa, nyɔ wu ècitɔ kè lè èmɔ̃ gɔ̃glɔ̃ jia.

⁷Ɖèvi kè le wɔ̀ ɖo èse jia, ɖo ènunya. Vɔ̀a, àmè kè le do èha kudo gbèvũviwoa, le do ŋùkpɛ̃ ètɔa.

⁸Àmè kè do ègà jì gà èfĩtɔ̀ sɔ kpɔ ècia be àdɔ̀kùnuwo la va ci ànyi na àmè kè le wɔ̀ ènyuɛ̃ na wɔ̀amènɔ̀woa.

⁹Ne àmè ɖe tu yebe ètowo do èsea, yebe kuefã ŋutɔ cã nyi ènu nyɔŋu.

¹⁰Àmè kè le tùtù àmèwo ɖo èmɔ̃ vuɛ̃ jia, la va jè èdo kè e kùa mè. Vɔ̀a, ànùkuamèwo la kpɔ nyɔna.

¹¹Ècitɔ susuna be yè nyi ènunyatɔ. Co, wɔ̀amènɔ̀ kè ɖo ènunyaa nya ènu kè ŋùkumè be nyi tututua.

¹²Ne ènunyuɛ̃wɔ̀tɔ le kplɔ̀ èdùa, ŋuti fàfa ku jìjɔɛ nɔ̀nà ànyi. Vɔ̀a, ne àmè nyrãku le kplɔ̀ èdùa, àɖuklui ɖùɖu ye nɔ̀nà ànyi.

¹³Àmè kè wlana yebe èdɛ̃ bàɖàa, mu kpɔna jiɖùɖu ò. Vɔ̀a, àmè kè le do è jèsi eye e le ɖè àsi lè ye ŋutia, la kpɔ sɔsɔkè.

¹⁴Àmè kè le vɔ̃ ènu bàɖàwɔ̀wɔa nyi sìtume. Vɔ̀a, àmè kè mu sènà ètonu òa, la kpɔ gbledo.

¹⁵Kplɔ̀tɔ nyrãku kè le zĩ wɔ̀amènɔ̀wo ɖo ànyi lè dùkɔ̃a mèa, lè sìgbè jãŋùta kè lè àdã ji, àlo ègbemèlã kè le ji la trɛ̃ àmèa nène.

¹⁶Kplɔ̀tɔ kè mu ɖènà susu òa, tanafu àmè wè sia wè. Vɔ̀a, àmè kè crìnà àmè bàɖà be ènyà gbɔa, nɔ̀nà àgbè dìdì.

¹⁷Èhlɔ̃dãtɔ sina kaka yì yebe èyɔ̀do mè: mu hiã be woa nyà ɛ̀ kaka va yì le è ò.

¹⁸Àmè kè lè àgbè lè ànùkua wɔ̀wɔ mèa la gã. Vɔ̀a, àmè kè le ɖù ènu èvèa, la crɔ̃ lè ɖèka àlo èvègɔ̃a mè godo.

¹⁹Ènuɖùɖu nɔ̀nà àmè kè le dà ye ŋutɔ be àgblèa si. Vɔ̀a, àmè kè mu le ji la wɔ̀ ènu ɖɔ̀hũi ɖekpe òa, la nyi ènuwɔ̀donɔ̀ kaka yì.

²⁰Àmè kè le wɔ̀ ànùkua a, ɖɔna kudo sìtu. Vɔ̀a, àmè kè le hlà àmè bu be ènuwo sɔ kpɔ ècia, la kpɔ ètodɔ̃dɔ̃ gbè ɖèka.

²¹Mu nyɔ be woa do vòvòtoto àmèwo dòmè ò. Co, àmè ɖe teŋu zĩ àmè bu be ènu ji jro.

²²Àmè kè àmè bu be ènu jronaa, pu dù kplɔ̀ àdɔ̀kùnu do. Eye mu nya be èhiã kplɔ̀ yè do ò.

²³Kpoeɖea, mi kanafu àmè kè le gbe ènyà na mia, sɔ wu àmè kè le dɔ̃ ènu gbegble wɔ̀wɔ ji na mia.

²⁴Àmè kè le fĩ ètɔa kudo ènɔa, vɔ̀a le gblɔ̃ be: “Mu nyi ènu bàɖà òa”, lè sìgbè fìãfĩ ke nène.

²⁵Àmè be ènu bìaŋùku na àmè hɛ̃nà àjrè vana. Vɔ̀a, àmè kè sɔ yebe ŋùɖo kpata dà ɖo Tɔhonɔ̀ jia, trɔnazũ ècitɔ.

²⁶Àmè kè sɔ yebe ŋùɖo dà ɖo ye ŋutɔ ɖokoe jia, nyi àmè màɖè susu. Vɔ̀a, àmè kè ɖo ènunyaa, ɖùnà gbledowo kpata ji.

²⁷Àmè kè nana ènu wɔ̀amènɔ̀woa, mu hiãna ènu ɖekpe ò. Vɔ̀a, gbledo ye kɔ̀nà ɖo àmè kè mu sɔɖe lè e mè na wɔ̀amènɔ̀wo òa ji.

²⁸Àmè sia àmè ɖona yebe àkumè ne ènudrãwɔ̀tɔ ɖe xɔ̀ ŋùkɔ̀ na èdùa be kpɔ̀kplɔa. Ne e va kua, ènudrãwɔ̀tɔwo trɔna èjì mè eye ènyuɛ̃ wɔ̀wɔ drina ɖo ji fuu.