Read gen Èlododowo 29 Bible Online

Èlododowo 29 - gen bible

Èlododowo 29

¹Gbledo zɛ̃nà àmè kè mu lɔ̃nà be woa gbe ènyà na yè òa, kaba. Eye e hɛ̃nà cɔ̃crɔ̃ va na ɛ̀.

²Dùkɔ̃a kpata la nɔ̀ jìjɔɛ mè, ne àdɔ̀mè nyuɛ̃wɔ̀tɔ le kplɔ̀ èdùa. Vɔ̀a, àɖuklui ɖùɖu ye nɔ̀nà dùkɔ̃a mè ne èdùkplɔ̀tɔa le zĩ àmèwo ɖo ànyi a.

³Àmè kè lɔ̃nà ènunya be àgbè nɔ̀nɔa, dona jìjɔɛ nana ètɔa. Vɔ̀a, ègà mu nɔ̀nà ègo mè na àmè kè le do èha kudo àhasìwɔ̀tɔwo ò.

⁴Èfìɔ kè wɔ̀nà ɖo èse jia, dona bùbu yebe èdùa ŋuti. Vɔ̀a, èfìɔ kè ye kãna ègà na dùkɔ̃a mà gbɔ̃jɛ̃a, le crɔ̃ èdùa.

⁵Kàfù kafu nyina èmɔ̃ tetre na àmè havi.

⁶Ènudakàwɔ̀tɔ be àgɔ̀jèjewo nyina èmɔ̃ tetre. Vɔ̀a, ènunyuɛ̃wɔ̀tɔwo nɔ̀nà jìjɔɛ kpɔkpɔ mè tɛ̀gbɛ̀.

⁷Ènunyuɛ̃wɔ̀tɔ ɖona tèpe na wɔ̀amènɔ̀wo. Vɔ̀a, ènudakàwɔ̀tɔ mu ɖo gàmè kaka la va bù wɔ̀amènɔ̀wo be ènu ɖe ŋuti ò.

⁸Èseblatɔwo hɛ̃nà tìtɔ̀titɔ va na èdù mè. Vɔ̀a, ènunyatɔwo teŋu ɖona àsi dùkɔ̃a be àdɔ̀mèze ji.

⁹Ne ènunyatɔ ɖe kpe ènyà kudo sùkunɔ̀a, ne e le bijì àlo e le kònu cã a, mu la kpɔ èhlò la nù èsì ò.

¹⁰Èhlɔ̃dãtɔ crìnà ènyuɛ̃wɔ̀tɔ be ènyà gbɔ, vɔ̀a, àmè jɔ̀jɔɛwo lɔ̃nà woabe ènyà gbɔ.

¹¹Sùkunɔ̀ be èjìbipe mu nya kpɔna ò, vɔ̀a, ènunyatɔ ya nyana ye ɖokoe lele eye e nɔ̀nà kpoo.

¹²Èfìɔ kè sɔna àjè ɖàɖa sɔ wɔ̀nà èdɔa, dona yebe cãmìwo ŋuzĩzĩme.

¹³Ènu kè Tɔhonɔ̀ na wɔ̀amènɔ̀ kudo àmè kè zĩna àmè ɖo ànyi ɖo èdùa, ye nyi be: “Wo ɖo ŋùkuviwo ne woa sɔ kpɔ ènu”.

¹⁴Èfìɔ kè le sò jɔ̀jɔɛ kaka le sò è na wɔ̀amènɔ̀wo cã a, be fìɔdua linakè goŋu-goŋu.

¹⁵Èkpò kudo ènyà gbegbewo nana ènunya, vɔ̀a, sumɔ̃vi kè wo mu le gbe ènyà na òa, nyina tagbã na ènɔa.

¹⁶Èhlɔ̃dãdã bɔna lè fikè ye ènudakàwɔ̀tɔwo sùgbɔ lèa. Vɔ̀a, gbè ɖèka kpò ye wo la jè ànyi lè ènyuɛ̃wɔ̀tɔ be ŋùkɔ̀.

¹⁷Dɔ̃ èto na èvi wò ne wòa jrà ɛ̀ ɖo kpoo. Eye èsɔ̀a, e la va do jìjɔɛ na wò.

¹⁸Ne àmè ɖekpe mu le bùtamè so èsɔ̀ kè gbãnà ŋuti òa, hũnyà-hũnyà nɔ̀nà èdùa mè. Vɔ̀a, àmè kè le wɔ̀ ɖo èse jia, nɔ̀nà ŋuti fàfa mè.

¹⁹Ènyà mu fiɔna ènunyuɛ̃ sumɔ̃vi ò. Ne e gbà sè e mè cã a, mu la wɔ̀ ɖo e ji ò.

²⁰Ne wò kpɔ àmè ɖe le pò nupo màbù e ŋuti kpɔa, eŋuã wò la susu lekè sùkunɔ̀ ya tɔ̀ la teŋu nɔ̀a.

²¹Àmè kè le kebe yebe sumɔ̃vi so yebe ɖèvi mèa, le do è kuviɔ̃tɔ.

²²Àmè kè binajì kabaa, hɛ̃nà àjrè va na. Nène a ke, e wɔ̀nà nuvuɛ̃ sùgbɔ.

²³Mawu ye la ɖiɖi àmè kè le ko ànyaa. Vɔ̀a, e kɔna àmè kè sɔ ye ɖokoe wɔ̀ sumɔ̃via, yì ji.

²⁴Àmè kè le do èha kudo fìãfì a, le dovlo ye ɖokoe. E nyana gbledo kè le tɔtè kpɔ ɛ̀a, co vɔ̀a, mu kènà ènu lè e ji sɔ ɖè èxlɔ̃a sia ò.

²⁵Àmè kè vɔ̃na àmè kpɔ̀tɛawo, jènà èmɔ̃ mè. Vɔ̀a, àmè kè dojì ɖo Tɔhonɔ̀ ŋutia mu vɔ̃na ò.

²⁶Àmè sùgbɔ jina kàfù kafu so woabe ŋùkɔ̀nɔ̀tɔwo gbɔ. Vɔ̀a, Tɔhonɔ̀ ye dànà àmè sia àmè kpɔ.

²⁷Àmè kè wɔ̀nà nyuɛ̃a, crìnà àmè bàɖà be ènyà gbɔ. Nène a ke ye àmè bàɖà cã crìnà àmè nyuɛ̃a yeŋu.