Read gen Èlododowo 3 Bible Online

Èlododowo 3 - gen bible

Èlododowo 3

¹Èvi nyè, mù gbà ŋlɔ̀be àpe ènufiɔfiɔ ò, lè àpe ègbèdoàsiwo ɖo èjì mè.

²Ne wò lebè na woa, wò la nɔ̀ àgbè dìdì eye wò la kpɔ nyɔna.

³Nyi àmè nyuɛ̃ kudo ànùkuamè gà sia gàmè. Bla ènu xɔ̀asì kèawo ɖo èkɔ̀, ŋlɔ̀ wo ɖo àpo èjì mè.

⁴Nène a, Mawu kudo àgbètɔwo la lɔ̃ wò, eye ènuwo la zɔ̃ sùu na wò.

⁵Mù gbà dojì ɖo àpo ènunya ŋuti ò, vɔ̀ kudo àpo èjì bliboa, dojì ɖo Tɔhonɔ̀ ŋuti.

⁶Ɖo tèpe na ɛ̀ lè ènu kè wò le wɔ̀a mè eye e ya, la fiɔ wò àfɔ̀tope.

⁷Mù gbà susu be yè nyi ènunyatɔ ò, vɔ̀ do bùbu Tɔhonɔ̀ ŋuti eye wòa si lè èvuɛ̃ gbɔ.

⁸Ekèa la dà èdɔ̀ na àpo àmètia, la do wò ŋusɛ̃.

⁹Sɔ àpo nyɔnawo sɔ do bùbu Tɔhonɔ̀ ŋuti, ɖè lè àpo nukuwo be àkpa cucugbã tɔ̀a mè na ɛ̀.

¹⁰Nène a, nukuwo la nɔ̀ àpo àvàwo ji tɛ̀gbɛ̀, eye àpo vɛ̃-gòwo la ɖɔ kaka kɔ̀ŋùgbe.

¹¹Èvi nyè, mù gbà gbe Tɔhonɔ̀ be àmè sìasia be ènyà ò, yebe ŋùmè kãkãwo mu gbà ɖì kòkoe na wò ò.

¹²Ɛ̃ɛ, Tɔhonɔ̀ kãna ŋùmè na àmè kè e lɔ̃a sìgbè àlekè ètɔ gbena ènyà na yebe èvi ɖèvea nène.

¹³Jɛ̀jrɛ̀ na àmè kèwo kè ɖo ènunya ŋuti eye wo trɔ zũ ènunyatɔa.

¹⁴Ɖo ènunya xɔ̀ àsì wu ècikpɔkpɔ. Eye yebe àlèawo nyɔ wu sìka.

¹⁵Ènunya ɖo àsìxɔ̀xɔ wu àcɔɖonuwo. Ènu jro àmè ɖekpe mu lè wu ekèa ò.

¹⁶E nana àgbè dìdì àgbètɔwo, e hũnà nyɔna kudo àdɔ̀kùnu be èmɔ̃wo na wo.

¹⁷E kplɔ̀nà wo to èmɔ̃ nyuɛ̃wo ji, fikè wo la zɔ̃ to kudo èjìgbɔ̃ɖɛ.

¹⁸Ènunya lè sìgbè àti kè nana àgbè àmè kèwo va e gbɔa nène. E nyi jɔ̀gbè nyuɛ̃ be sìdo na àmè kèwo kè ɖo e ŋutia.

¹⁹Tɔhonɔ̀ wɔ̀ ànyigbã kudo ènunya, eye e sɔ ènunya sɔ vlũ jiŋùkusi.

²⁰To yebe ènumè-kùku mèa, èsì kè lè ànyigbã gɔ̃mèa wo gbàa, eye lilikpowo na èji jànà.

²¹Èvi nyè, tɛ ɖo ènunya kudo ŋùgblèdède ŋuti gobi. Mù gbà ɖè àsi lè woa ŋuti gbèɖe ò.

²²Wo la na wò la ɖo àgbè nyuɛ̃.

²³Nène a, wò la zɔ̃ yì ŋùkɔ̀ ku èjì ɖèɖe eye àpo àfɔ̀ mu la ɖiɖi ò.

²⁴Ne wò mlɔ̃ ànyi a, wò mu la vɔ̃ ò eye wò la dɔ̃ àlɔ̃ bɔ̀kɔ̀ lè àba wò ji.

²⁵Vɔ̃vɔ̃ mu la jè e ji wò kpàtà ò, eye àmè vuɛ̃wo mu la kpɔ èmɔ̃ lè ŋuti wò ò.

²⁶Ɛ̃ɛ, Tɔhonɔ̀ la cɔ̃ àsi ji wò eye e la na wò mu la jè èmɔ̃ ɖe mè ò.

²⁷Ne wò teŋuã, mù gbà gbe ènyuɛ̃ wɔ̀wɔ na àmè kè lè èhiã mèa ò.

²⁸Ne wò ɖo ènu kè hiã ɛ̀ egbèa, mù gbà gblɔ̃ na havi wòa be: “Jo yì! Mù la nɔ kpɔ èsɔ̀ be mù la teŋu na wò ènu ɖe mà a.”

²⁹Mù gbà nɔ ɖè susu bàɖà ɖekpe so èxlɔ̃ wò kè lè gbɔ wò ku èjì ɖèɖe ò.

³⁰Mù gbà hɛ̃ ènyà kudo àmè ɖekpe gbalo ne e nyi be wo mu wɔ̀ ènu bàɖà ɖe kudo wò ò.

³¹Mù gbà hùãŋu àmè kè le wɔ̀ èdrãa kaka ne wòa ɖì ì ò.

³²Nyàwoa, Tɔhonɔ̀ mu lɔ̃nà àmè kè mu wɔ̀nà ènunyuɛ̃ òa be ènyà ò, vɔ̀ e nyina àmè nyuɛ̃wo be èxlɔ̃.

³³Tɔhonɔ̀ sɛ̃nakpɛ̃ na àmè kè le wɔ̀ ènu bàɖàa be xòmè, vɔ̀ e tuna èsì na àmè kèwo wɔ̀nà ènu nyuɛ̃a be xòmèwo.

³⁴Tɔhonɔ̀ kònà àmè kèwo kònà àmèa, vɔ̀ e wɔ̀nà ènyuɛ̃ na àmè bɔ̀bɔɛwo.

³⁵Àmè kè le tɔtè kpɔ ènunyatɔa la kpɔ nyɔna, vɔ̀ èŋù ye la kpɛ̃ àmè màɖè susuwo.