Read gen Èlododowo 31 Bible Online

Èlododowo 31 - gen bible

Èlododowo 31

¹Ètopòɖo be ènyà kèwo ye Masà be èfìɔ, Lemùɛl xɔ̀ so ènɔa gbɔa ye nyi ekèawo:

²“Ɖoto, èwò èvi nyè kè mù jìa, èwò kè mù nɔ̀tè kpɔ dìdìɖea!

³Èvi nyè, mù gbà na nyɔ̃nùwo ne xɔ̀ ŋusɛ̃ lè àsi wò ò. Mù gbà tàsi ɖokoe wò na nyɔ̃nù kèwo dona àfɔ̀bùblu na èfìɔwo ò.

⁴Vɛ̃ nùnu mu nyɔ na èfìɔwo ò, eye àhà sɛ̃sɛ̃ cã mu nyɔ na ŋùkɔ̀nɔ̀tɔwo ò.

⁵Ɖo ne wo nù ìa, wo la va ŋlɔ̀be èsea kaka la gbe jɔ̀jɔɛsòso na wɔ̀amènɔ̀wo.

⁶Mì na àhà sɛ̃sɛ̃ àmè kè le kua eye mì na vɛ̃ àmè kè lè ŋuzĩzĩ mèa.

⁷Ɖo ne e nù ìa, e la ŋlɔ̀be yebe èhiã jèjea eye mu la gbà ɖo ŋùku yebe tagbã ò.

⁸Èwò ya, wò ɖo la pò nupo ɖo àmè mà-ɖo àmèwo be tèpe. Wò ɖo la xɔ̀ ènyà ɖo àmè gbɔjɔ-gbɔjɔwo ta.

⁹Kòjoɖotɔ, pò nupo kudo jɔ̀jɔɛ sòso! Xɔ̀ ènyà ɖo wɔ̀amènɔ̀wo kudo àmè blɛsɛwo ta!”

¹⁰Àmè kɛ ye teŋu kè ɖo nyɔ̃nù kè donajìa ŋuti ò? E xɔ̀ àsì wu jònu xɔ̀asì.

¹¹Èsrɔ̃a kãɖo e ji blibo, mu zãna yebe ènu hãnyà hãnyà ò.

¹²E dona jìjɔɛ na èsrɔ̃a ŋusùa gbè sia gbè; e wɔ̀nà ènyuɛ̃ mu nyi èvuɛ̃ ò, yebe àgbè-zã keŋu.

¹³E yì jina ègbɔ be èfu kudo sedà be èkà eye e sɔ wo lɔ̃nà àvɔ.

¹⁴E ɖànà ènu tɔ̀hɛwo sìgbè melɛ̀ mè ye wo ɖè ènuɖùɖuawo to lè nène.

¹⁵E fɔ̃na xoxo gbɔ̀xue èŋù kènà. E ɖànà xòmèa be ènuɖùɖu ɖo gàmè ji eye e kpɔna ènu kè àmè kèwo lè e gbɔa, la wɔ̀a keŋu-keŋu.

¹⁶Ne e bù ènu ɖe be yèa wɔ̀a, e jènà àgbàgba kaka wɔ̀nà ɛ̀. E sɔna àlè kè e kpɔ lè àjɔdodo mèa, sɔ dànà vɛ̃-gble.

¹⁷E wɔ̀nà èdɔ kudo ŋusɛ̃dodo, mu nɔ̀nà ànyi fɔ̀ àlɔ̀ ɖo àta mè ò.

¹⁸Ne e kpɔ be ènu kè yè le wɔ̀a le ɖè àlèa, e nɔ̀nà èzã ŋùtè ɖo e ŋuti àlɔ̃ màdɔ̃.

¹⁹Yebe àlɔ̀wo gbĩnà àlɛ̃gbɔ be èfu be èkà eye yebe àlɔ̀viwo lɔ̃nà àvɔ tèmàtɔ.

²⁰E kpena ɖo ènuwɔ̀donɔ̀wo ŋuti eye e nana wɔ̀amènɔ̀wo ènu fàa.

²¹Mu vɔ̃na fàfa hùenu na yebe èviwo ò, ɖo e wɔ̀ àvìvɔwu na àmè sia àmè lè àxuea mè.

²²E wɔ̀ àvɔ cɔ̃cɔ̃wo eye yebe àwùwo nyi sedà kè bìa nyuɛ̃ ɖe a.

²³Èsrɔ̃a ŋusùa nyi cãmì kè ŋuti bùbu lèa. E nɔ̀nà èdùa be bɔ̀bɔ gãgãwo mè.

²⁴E lɔ̃nà àwùwo sànà, e wɔ̀nà ègojiblakawo sànà do ènusàtɔ kèwo ɖìnàsà va yìa.

²⁵Ŋusɛ̃ lè e si eye wo dona bùbu e ŋuti, e donajì ɖo èsɔ̀ kè gbãnàa ŋuti.

²⁶E pònà nupo kudo ènunya, e fiɔna ènu kudo àdɔ̀mè nyuɛ̃.

²⁷E lena ŋùku ɖo ènu kèwo kpata le jɔ̀ lè yebe nɔ̀pea ŋuti eye mu fɔ̀nà àlɔ̀ ɖo àta mè gbena èdɔ ɖe mà-wɔ̀ ò.

²⁸Èviawo kanafu ì lè àmèwo gbɔ, èsrɔ̃a ŋusùa kpɔna jìjɔɛ ɖo e ŋuti.

²⁹E gblɔ̃nà be: “Nyɔ̃nù sùgbɔ donajì, vɔ̀ èwò ya, wò wu woa kpata!”

³⁰Àmè be kpɔkpɔ lè ègòta blènà àmè, tùgbɛ̀jɛ jèje mu nɔ̀nà ànyi kaka yì ò. Nyɔ̃nù kè le bù Tɔhonɔ̀a ɖèka kpò ye jè na kàfù kafu.

³¹Wo ɖo la tu ènu kè e le wɔ̀a be èfɛ̃ na ɛ̀. Èdùa kpata ye la jì kàfù kafu be èhàwo na ɛ̀, ɖo èdɔ kè e le wɔ̀a ŋuti.