Read gen Èlododowo 4 Bible Online

Èlododowo 4 - gen bible

Èlododowo 4

¹Èvi nyèwo, mì ɖoto ètɔ be ègbè. Mì hɛ̃ àdòdò eye mìa kpla àlekè wo wɔ̀nà ɖona ènunyaa.

²Ɛ̃ɛ, mù le fiɔ mì ènu kè la dɔ̃ mìa jia, mì mu gbà gbe àpe ènufiɔfiɔwo ò.

³Nyè cã mù nyi èvi nyuɛ̃ na ètɔ nyè va yì, eye ènɔ̀ nyè lɔ̃nà àpe ènyà gbɔ sìgbè èvi àkòŋùgò nène.

⁴Ètɔ nyè fiɔna mù ènu gblɔ̃nà be: “Le ènyà nyèwo ɖo àsi nyuɛ̃ ɖe, wɔ̀ ènu kè mù le gblɔ̃ na wòa ne wòa nɔ̀ àgbè.

⁵Ɖo ènunya ne wòa trɔ zũ ènunyatɔ. Mù gbà ŋlɔ̀be àpe ènyàwo eye mù gbà gbe wo ò.

⁶Mù gbà gbe ènunya ò, e la kpɔ èji wò. Lɔ̃ ɛ̀ ne bèa xɔ̀ na wò gà sia gàmè.

⁷Ènunya be gɔ̃mèjèje ye nyi be woa drɛ̃ àvũ sɔ ɖo ènunya. Zã ŋusɛ̃ kè lè àsi wòa sɔ ɖo ènunya.

⁸Ènunya ne nɔ̀ àsi wò ne bèa wɔ̀ wò àmègã. E la na wò la trɔ zũ àmè ŋùkuta ɖe ne wò fã yɔ ɛ̀a.

⁹E la nɔ̀ na wò sìgbè sìkanu nyuɛ̃ ɖe nène, sìgbè jègbà àdodoe ɖe nène.”

¹⁰Èvi nyè, ɖoto mù ne wòa xɔ̀ àpe ènyàwo eye wò la nɔ̀ àgbè dìdì.

¹¹Mù le fiɔ wò ènunya be àfɔ̀tope, mù le fiɔ wò ànùkua wɔ̀wɔ be àgbè nɔ̀nɔ.

¹²Nène a, wò la zɔ̃ yì ŋùkɔ̀ fàfa ɖe eye, ne wò le pudùa, wò mu la klɛ̃ ènu ò.

¹³Le ènufiɔfiɔ kè wò xɔ̀a ɖo àsi, mù gbà gble è ɖɛ ò. Le è, e la na wò la nɔ̀ àgbè.

¹⁴Mù gbà kpla àmè vuɛ̃wo be àgbè nɔ̀nɔ ò, mù gbà ɖo àfɔ̀ èvuɛ̃wɔ̀tɔwo be àfɔ̀do mè ò.

¹⁵Ɖè àsi lè e ŋuti, mù gbà to funu ò! Tàsi ì eye zɔ̃ yì ŋùkɔ̀!

¹⁶Àmè kèawo mu teŋu dɔ̃na àlɔ̃ ne wo mu wɔ̀ ènuvuɛ̃ ò. Ne wo wɔ̀ ènu bàɖà ku àmèa gbɔ̀xue ye wo teŋu vònà.

¹⁷Ɛ̃ɛ, ènu drã wɔ̀wɔ ye nyi woabe nuɖùɖu, ènu kpòtoe muna wo sìgbè àhà nène.

¹⁸Lè ègo ɖe a mèa, àmè kèwo wɔ̀nà ènunyuɛ̃a be àgbè lè sìgbè ŋùdekɛ̃nyɛ be kɔ̀kɔ̀ɛ nène. E kɔ̀nà kaka va ɖona gà woèvè mè.

¹⁹Vɔ̀ àmè kèwo wɔ̀nà ènu bàɖàa be àgbè do vìvìti sìgbè èzã nène. Wo mu kpɔna ènu kè la teŋu na wo la jè ànyi ò.

²⁰Èvi nyè, ɖoto àpe ènyàwo, le ŋùku ɖo àpe ètopòɖowo ŋuti.

²¹Mù gbà ŋlɔ̀be wo gbèɖe ò, le wo ɖo àpo èjì mè.

²²Wo nana àmè kèwo xɔ̀ woa àgbè kudo lãmèsɛ̃.

²³Wu e kpataa, le ŋùku ɖo èjì wòa ŋuti, ɖo e ye le nyi àgbè wòa be jɔ̀sope.

²⁴Mù gbà na ne ènu wòa bèa ɖàjè ò, mù gbà pò nupo bàɖà so àmè ɖe ŋuti ò.

²⁵Le ŋùku ɖo àmèwo ŋuti ne wòa nɔ kpɔ wo, ènu ɖe mà wla.

²⁶Bù èta mè gbɔ̀xue wòa jè ènu ɖekpekpe be wɔ̀wɔ gɔ̃mè, sɔ àfɔ̀tope kèwo jèa.

²⁷Mù gbà yì ɖùsi àlo èmìɔ̃ mè ò, si lè èvuɛ̃ gbɔ.