Read gen Èlododowo 6 Bible Online

Èlododowo 6 - gen bible

Èlododowo 6

¹Èvi nyè, mi gblɔ̃ kpò be: wò xɔ̀ ŋùkɔ̀ na àmè ɖe be èfɛ̃.

²Eŋuã wò trɔ èkluvi na ènyà kè wò gblɔ̃ eye àpo àjɔ̀gbè fìãfiãa trɔ zũ èkɔ̀kùti na wò.

³Nène a, kè e nyi be wò sɔ ɖokoe wò do àsi na àmè kè do ègà na wòa, ènu kè wò la wɔ̀ sɔ ɖè ɖokoe wòa ye nyi be wòa yì ɖè kuku na ɛ̀.

⁴Mù gbà nɔ̀ ànyi fɔ̀ àlɔ̀ ɖo àtamè ò, mù gbà yì mlɔ̃ ànyi be e la va nyɔ ò.

⁵Ɖè ɖokoe wò lè gàmɔa mè sìgbè èpè-ɖèka àzò-ɖèka nène, hlùɛ̃ ɖokoe wò lè èmɔ̃a mè sìgbè xèvi nène.

⁶Kuviɔ̃tɔ, kpɔ àɖiɖevi ɖa! Le ŋùku ɖo àlekè e le wɔ̀a ŋuti ne wòa trɔ zũ ènunyatɔ.

⁷Àɖiɖevi mu ɖo ŋùkɔ̀nɔ̀tɔ kaka la va ɖo ɖiatɔ ò. Mu ɖo àpetɔ cã ò.

⁸Lè hùenu nyuɛ̃ mèa, e bɔ̀nà yebe ènuɖùɖu ɖɛ. Lè nukuyàya be gàmèa, e wlana ènuɖùɖu dà ɖɛ.

⁹Eye èwò, kuviɔ̃tɔ, wò la kpɔ̀tɔ̀ nɔ̀ ànyi mɔmlɔ̃ kaka va na gà kɛ mè ò? Gà kɛ mè ye wò la sitè ò?

¹⁰Wòa dɔ̃alɔ̃ viɖe, wòa kudrɔ̃ viɖe, wòa nɔ̀ ànyi mɔmlɔ̃ viɖe, wòa fɔ̀ àlɔ̀ èvè kɔ̀ ɖo àtamè kpò e vɔ̀.

¹¹Wàlɛbɛ ŋua, èhiãjèje vana sìgbè fìãfĩ nène eye ènuwɔ̀amè gbãnà àxue sìgbè àjòglasu nène.

¹²Àmè kè le ɖàjèa mu nyɔ na ènu ɖekpe ò, ɖo e le wɔ̀ ènu bàɖà.

¹³E ŋɛ̃na àŋɔ̀ni mè sɔ blènà àmèwo, e sɔna àfɔ̀ sɔ yɔna àmè eye e ŋɛ̃na yebe àlɔ̀viwo.

¹⁴Yebe èjì do vìvìti, ènu bàɖà be susu kpò be ɖènà. E dona àjrè àmèwo dòmè.

¹⁵Ekèa ŋuti ye be la jè ànyi ha ɖèka. E la crɔ̃ lè àɖàbà pòpo ɖèka mè eye ŋùɖo ɖekpe mu la gbà nɔ̀ e ŋuti ò.

¹⁶Tɔhonɔ̀ crì ènu àdɛ̃ ɖewo, eye yebe èjì mu xɔ̀nà wo klua ò.

¹⁷Ŋùku gã lè èta ŋuti, àɖe kè ɖànà àjèa, àlɔ̀ kèwo kɔ̀nà èhũ mà-nyã ɖe ɖɛa,

¹⁸èjì kè ɖènà susu bàɖàa, àfɔ̀ kèwo lè èdù ji na èvuɛ̃ wɔ̀wɔa,

¹⁹àjè ɖaseɖùtɔ kè nɔ̀ ànyi ɖo àjèɖàɖa jia. Vɔ̀ adrɛ̃gɔ̃ kè Tɔhonɔ̀ gbà crì gloa ye nyi àmè kè dona àjrè àmèwo dòmèa.

²⁰Èvi nyè, ɖoto ètɔ wò be ègbè do àsi, mù gbà ɖè èkɔ̀ lè ènɔ̀ wò be ètopòɖo ŋuti ò.

²¹Ekèawo ne nɔ̀ àpo èjì mè tɛ̀gbɛ̀. Bla wo ɖo àpo èkɔ̀.

²²Wo la nɔ jɔ̀ àpo àfɔ̀ ɖèɖewo eye ne wò mlɔ̃ ànyi a, wo la nɔ ɖia wò. Eye ne wò fɔ̃a wo la nɔ kpe ɖo ŋuti wò.

²³Ègbè do àsiwo lè sìgbè kãligbɛ̃ nène eye ètopòɖowo lè sìgbè èzò kè le kɔ̀a nène. Ènyà gbe na àmèwo fiɔna ènu àmè, wo nyi àfɔ̀tope kè kplɔ̀nà àmè yì àgbè mèa.

²⁴Wo la na be nyɔ̃nù kè wɔ̀nà ènu bàɖàa mu la kpɔ èmɔ̃ lè ŋuti wò ò, nènea ke ye àmèjro nyɔ̃nù be àmèblènyà mu la ɖù èji wò ò.

²⁵Nyɔ̃nù kèa mu gbà jro wò ɖo yebe tùgbɛ̀jɛ jèje ŋuti ò. Mù gbà na yebe ŋùkuvi kèwo be le ɖoa ne ɖùji wò ò.

²⁶Ɛ̃ɛ àhasì nyɔ̃nù mu hiãna ègà sùgbɔ ò, vɔ̀ nyɔ̃nù lè àsuxuea ɖo àgbèa kpata.

²⁷Ne wò ɖè èzòka do ègo mèa, àwù wòa la fiɔ̃.

²⁸Àlo ne wò ɖo àfɔ̀ èzòka jia, e la mè àfɔ̀ na wò.

²⁹Nène a ye be la nɔ̀ na àmè kè le ji àmè bu be èsrɔ̃ nyɔ̃nùa yeŋu. Àmè kè la yì wɔ̀ ɛ̀a, la kpɔ e mè sonu godo!

³⁰Wo mu crìnà àmè kè yì fĩ ènu, ɖo àdɔ̀wùàmè ŋuti ò.

³¹Vɔ̀ ne wo le èa, e la tu wu ènu kè e fìã be èfɛ̃.

³²Àmè kè yì dɔ̃ kudo nyɔ̃nù lè àsuxuea, tagbɔ gbegbletɔ ye be nyi. Ne e wɔ̀ nènea, e le crɔ̃ yebe àgbè.

³³Wo la pò è, la ɖì ì ègbɔ eye èŋù la nɔ kpɛ̃ ɛ̀.

³⁴Nyàwoa, èŋuhuã la na be nyɔ̃nùa be èsrɔ̃a mu la sɔkè ŋusùa gbèɖe ò.

³⁵Eye mu la lɔ̃ ènu nana ɖekpe ɖo àhasì kèa be tèpe ò; Ènu kè be ɖoa kpò be la wɔ̀ godo!