Read gen Èlododowo 7 Bible Online

Èlododowo 7 - gen bible

Èlododowo 7

¹Èvi nyè, ɖo ŋùku àpe ènyàwo ji, ne wòa lebè na àpe ègbè do àsiwo.

²Ne wò ji la nɔ̀ àgbèa, eŋuã lebè na àpe ègbèɖèɖewo kudo àpe ènufiɔfiɔ sìgbè àdɔ̀kùnuwo be àdɔ̀kùnɔ̀ nène.

³Wo ne nɔ̀ àlɔ̀sɔpe na wò eye wòa ŋlɔ̀ wo ɖo àpo èjì mè.

⁴Sɔ ènunya sìgbè ènɔ̀ wò be èvi nène eye ènunya bèa nyi àpo èxlɔ̃ àdodoe.

⁵Wo la hlùɛ̃ wò lè nyɔ̃nù àhasìwɔ̀tɔ, nyɔ̃nù àmèjroa be ènyà viviwo si.

⁶Gbè ɖèkaa, mù lè flɛsɛ̀ to le kpɔ vayì vayìwo.

⁷Mù kpɔ ɖèvi màto lè àzìcro-mèwo le gble. Lè woa dòmèa, mù kpɔ ɖèkajɛvi kè susu hùe na a cã.

⁸Ɖèkajɛvia to àjɔdotɔwo be èmɔ̃a ji, lè fikè nyɔ̃nù àhasìwɔ̀tɔa be àxue lèa gbɔ. Eye e le yebe àxomè be èmɔ̃.

⁹Wètrɔ gbɔ ɖe ye wàlɛbɛ kè xixe mè le cɔ̃, eye èzã le do a.

¹⁰Nyɔ̃nùa to va dogò è. E lè àhasìwɔ̀tɔ be àwù mè, eye àyè gɛdɛ na ɛ̀.

¹¹Nyɔ̃nùa mu teŋu lena ye ɖokoe kaka ne èŋù bèa kpɛ̃ ɛ̀ ò. Eye mu teŋu lina ègũi ɖo tèpe ɖèka ò.

¹²Eji-eji ye e tona, sãnà lè èmɔ̃ to kudo àsìto, nɔ ji ŋusù.

¹³E le ɖèkajɛa, fã ɛ̀, gblɔ̃ na ɛ̀ ku èjì ɖèɖe be:

¹⁴“Mù ɖo àkpe dodo be vɔsa ɖe be ŋùgbè na Mawu. E ve ènu nyè ye mù wɔ̀ ɛ̀ egbè.

¹⁵Ènu kèa ŋuti ye mù to va le ji wò eye mù kè ɖo ŋuti wò trolo.

¹⁶Mù ɖo àba nyèa vɔ̀, eye kùŋùtu kè mè kɔlà hamè-hamèwo lèa kudo Ejiptè be àbajivɔ àlɛ̃ŋudàtɔ̀ ye mù ɖo ɖo e ji.

¹⁷Mù wu anùwɛtrɛ̀ àdodoewo ɖo e ji.

¹⁸Va! Ne mia dɔ̃ kaka èŋù bèa kè, mia mu lɔ̃lɔ̃ be àhà.

¹⁹Èsrɔ̃ nyè mu lè àxomè ò. E yì èmɔ̃ dìdì ɖe ji.

²⁰E hɛ̃ ègà sùgbɔ ɖo àsi eye e la nɔ̀ funu na wɛ̀tri kè la vaa gbɔ̀xue la gbɔ̀.”

²¹Nyɔ̃nùa bi ŋutɔ. E blè ɖèkajɛvia kudo yebe ènyà viviwo!

²²Eye zè ɖèkaa, e kplɔ̀ nyɔ̃nùa do sìgbè ènyì kè wo kplɔ̀ le yì wùwùgbea nène. Sìgbè ègàmènɔ̀tɔ nènea, ɖèkajɛ sùkunɔ̀ kèa ɖota yebe ètodɔ̃dɔ̃a mè,

²³kaka na wàlɛbɛ kè wo la do è èku be àbìa. Eye sìgbè àlekè xèvi zrònà yì èmɔ̃tetre gbɔa, mu le nya be yebe àgbè lè àfɔ̀ku mè ò.

²⁴Fifìa, èvi nyèwo, mì ɖoto mù ne mìa le ŋùku ɖo ènyà kè mù le gblɔ̃a ŋuti nyuɛ̃ ɖe!

²⁵Mì mu gbà na ne nyɔ̃nù kèa hati ne blè mì ò! Mì mu gbà yì ku ci woabe èmɔ̃ ji ò.

²⁶E do àbì àmè fuu ŋuti eye e na wo jè ànyi. Co àmè kèwo keŋu e wùawo nyi àmè sɛ̃ŋu gãke.

²⁷E gbɔ yìyi lè sìgbè èku ŋutɔ gbɔ yìyi nène. Èkuwode ke ye àmè kè le gogo èa, ɖota le yì.