Read gen Èlododowo 8 Bible Online

Èlododowo 8 - gen bible

Èlododowo 8

¹Ènunya le wɔ̀ yɔyɔ, ènunya le do àpa lelele. Mì mu le sè òa?

²Ènunya tɔtè ɖo ètokɔ̃ɛ kèwo be gɔ̃mè èmɔ̃a toa ji, lè èmɔ̃ zɛ̃kpliwo nu.

³E le do àpa lè èdùa be àgbowo nu, lè àfɔ̀topewo gblɔ̃ be:

⁴“Mìa àgbètɔ be viwo ye mù le yɔ. Mù le gblɔ̃ ènyà na mìa kpata.

⁵Mì àmè kèwo mu ɖo ènunya òa, mì kpla àlekè wo wɔ̀nà ɖona ènunyaa. Mì àmè kèwo ènunya hùe do a, mì kpla àlekè wo wɔ̀nà nyana ènua;

⁶Mì ɖoto nyuɛ̃ ɖe, ɖo mù la pò nupo kudo èjì ɖèɖe sɔ gblɔ̃ ènyà àdodoewo.

⁷Ɛ̃ɛ, mù le to nyàwo, ɖo mù crìnà àjèɖàɖa be ènyàwo.

⁸Ènu kè mù gblɔ̃nà kpata sɔ̀nàgbè pɛpɛpɛ. Nyè mu pònà nupo gbèɖe sɔ blènà àmè ò, nyè mu ɖànà àjè ò.

⁹Àmè kè nyana ènua, kpɔna àpe ènyàwo jɔ̀jɔɛ, àmè kè kùnà ènu mèa, kpɔna wo àdodoe.

¹⁰Mì sɔ àpe ènufiɔfiɔ lè klòsalò gbɔ, mì ji ènunya lè sìka gbɔ.

¹¹Nyàwo be nyi be ènyè ènunyaa, mù xɔ̀ àsì sɔ wu àcɔɖonuwo kpata, eye mù gbà xɔ̀ àsì wu ènu kèwo kpata jrona mìa.”

¹²Ènyè, ènunya, nyè mu crìnà ènu kè sɔ̀gbè gbà jèa ò. Mù bùnà ènu ŋuti nyuɛ̃ ɖe gbɔ̀xue wɔ̀nà ɛ̀.

¹³Àmè kè crì èvuɛ̃a ɖo bùbu na Tɔhonɔ̀. Mù crì ègòyiyi, àmè cìcri, ènu kpòtoewo kudo àjèɖàɖawo.

¹⁴Àpe èdɔ do àsi ye nyi be ma pòtoɖo na àgbètɔ eye ma fiɔ ɛ̀ àlekè wo jrànà ɖo jè ŋùkɔ̀ na ènu ɖekpekpe be wɔ̀wɔa. Mù nyi ènunyatɔ eye mù ɖo ŋusɛ̃.

¹⁵Àpe àlɔ̀do ye na èfìɔwo kplɔ̀nà èdù eye kòjoɖotɔwo wɔ̀nà èse jɔ̀jɔɛwo.

¹⁶Ènyè ye nana èga kudo cãmìwo ɖènàgbè kaka jè àmè kèwo ɖonakòjo lè ànyigbã kpata jia.

¹⁷Nyè ya, mù lɔ̃nà àmè kèwo lɔ̃nà mù a. Àmè kèwo ji mù a, kènà ɖo ŋuti nyè godo godo.

¹⁸Mù nana àdɔ̀kùnɔ̀ kudo bùbu, ènu kèawo mu gblena ò. Eye mù gbà nana àjɔ̀ kè jèa.

¹⁹Àpe ènu nyuɛ̃wo xɔ̀asì wu sìka kè kɔ̀ ŋutɔa eye àpe ènunanawo nyɔ wu klòsalò àdodoe.

²⁰Mù zɔ̃nà lè jɔ̀jɔɛsòso be èmɔ̃ ji, lè àfɔ̀tope fikè wo wɔ̀nà ɖo èse ji lèa.

²¹Funua, mù wɔ̀nà nyuɛ̃ na àmè kèwo lɔ̃ mù a, mù nana woabe àxuewo ɖɔna kudo ènu xɔ̀asìwo.

²²Tɔhonɔ̀ ɖo mù cucugbãa, gbɔ̀xue e va ɖo ènu kpɔ̀tɛ kèwo e wɔ̀a.

²³E wɔ̀ mù so xoxo xòxò, lè ènuwo keŋu be gɔ̃mèjèje, gbɔ̀xue xixea jɔ̀.

²⁴Àpùwo mu lè gbɔ̀xue wo jì mù ò. Èsìdo kèwo ɖɔ kudo èsìa cã mu lè ò.

²⁵Wo jì mù gbɔ̀xue wo wɔ̀ èto kudo ètokɔ̃ɛwo.

²⁶Lè gà ŋua mèa, Tɔhonɔ̀ mu kpɔ wɔ̀ ànyigbã àlo àgblèwo kaka la va wɔ̀ èkɔkui ɖèka ŋutɔ cã ò.

²⁷Mù lè gbɔ̀xue e vlũ jiŋùkusi ɖo ye tèpe goŋu-goŋu, gbɔ̀xue e tèflì ɖo àpùwo kudo jiŋùkusiwo dòmè,

²⁸wàlɛbɛ kè e sɔ lilikpowo ɖo èjia, wàlɛbɛ kè e sɔ woabe ŋusɛ̃ sɔ na èsìdowo lè èdòa,

²⁹wàlɛbɛ kè e ɖo lipò na àpùwoa, wàlɛbɛ kè e ɖègbè na èsì be mu gbà to lipò kèawo ŋuti òa, wàlɛbɛ kè e ɖo ànyigbã be dodoewo ànyi a,

³⁰wàlɛbɛ ŋua, mù lè, mù gogo Tɔhonɔ̀ eye sìgbè èxɔ̀ be àɖàŋùɖètɔ nènea, mù dona jìjɔɛ na Tɔhonɔ̀ so ŋùkèkè yì ŋùkèkè. Mù gblena lè ŋùkɔ̀ na ɛ̀ wè sia wè.

³¹Mù gblena lè ànyigbã kè e wɔ̀a ji. Eye mù kènà ɖo àpe jìjɔɛ ŋuti lè àgbètɔwo dòmè.

³²“Fifìa, èvi nyèwo mì ɖoto mù. Sìtume ye nyi àmè kèwo le wɔ̀ ènu kè mù gblɔ̃a!

³³Mì ɖoto àpe àmèsìasia ne mìa nyi ènunyatɔwo, mì mu gbà crì wo ò.

³⁴Sìtume ye nyi àmè kèwo le ɖoto mù a, kèwo le ɖia àpe àgboa.

³⁵Ɛ̃ɛ, àmèkè kè ɖo ŋuti nyèa, kpɔ àgbè, eye Tɔhonɔ̀ dàsi ɖo e ji.

³⁶Vɔ̀, àmè kè mu kè ɖo ŋuti nyè òa, le do àbì ye ɖokoe ŋuti. Àmè kèwo crì mù a, lɔ̃ èku be ènyà gbɔ.”