Read gen Àɖàŋùɖètɔ 10 Bible Online

Àɖàŋùɖètɔ 10 - gen bible

Àɖàŋùɖètɔ 10

¹Àdè tɔ̀bɔ̀su kè ku ci anùwɛtrɛ̀wɔ̀tɔ be àmì mèa, gblena àmìa. Nène a ke ye èlãnuwɔ̀wɔ viɖe gblena ènunya kudo bùbu.

²Ènunyatɔ ɖènà susu nyuɛ̃, àzũi ya trɔna èta dogũ na ènuwo.

³Nène ke ne èklènɔ̀ le zɔ̃ lè èmɔ̃ jia, e zɔ̃nà fikè mu ɖo la to òa. Ekèa na be wo yɔna ɛ̀ be àɖàhùatɔ.

⁴Ne àpetɔ wò le do àdɔ̀mèze ɖo ŋuti wòa, mù gbà jo gble èdɔ kè wò le wɔ̀ na ɛ̀a ɖɛ ò. Àmè ɖokoe ji ɖùɖu viɖe jrànà ènu sùgbɔ ɖo.

⁵Èfìɔ ɖe teŋu blè ye ɖokoe, eye mù kpɔ màjɔ̀ màjɔ sùgbɔ nènea.

⁶Lè kpɔwɔɛ mè, gà ɖewo mèa, èklènɔ̀wo nɔ̀nà èdɔ sùgbɔ nu, eye àmègã-mègãwo nɔ̀nà tèpe kè mu jè na wo òa.

⁷Mù kpɔ èkluviwo le do èsɔwo vɔ̀, àmègãwo le zɔ̃ àfɔ̀ sìgbè èkluvi nène.

⁸Àmè kè le kù èdoa, ŋutɔ teŋu gɛ̃ jè e mè. Àmè kè le ŋɔ èglìkpa, teŋu na èdã la to funu va ɖù ì.

⁹Àmè kè le ɖè èkpewo lè àkpã mèa, teŋu do àbì ye ɖokoe, àmè kè le fɛ̃ ànakèa, teŋu wɔ̀ ènu veve kudo ye ɖokoe.

¹⁰Ne èfiɔ ɖe mu gbà ɖa la sò ènu ò, eye wo mu trɔ ɖa ɛ̀ cã òa, e hiã be woa zã ŋusɛ̃ sùgbɔ gbɔ̀xue la teŋu sò ènu. Ènunya ɖo ŋusɛ̃ na ènuwo be ji jèje nyuɛ̃.

¹¹Ne àmè ɖe na èdã nɔ̀ kpoo eye èdã ŋua gbà va le ɖù àmèa, àlè kɛ ye be ɖè na ɛ̀ fifì ò?

¹²Ne ènunyatɔ ɖe le pò nupoa, yebe ènyà jɔ̀nàjì na àmèwo. Vɔ̀ ne àzũi ɖe kè ènua, ènyà gɔ̃glɔ̃ ɖèɖe ye be gblɔ̃nà.

¹³E tɔna èlã be ènyàwo gbɔ̃gblɔ̃ eye e vɔ̀nà wo kudo àtrìnya vevewo.

¹⁴Èklènɔ̀ pònà nupo ètèmàtɔ. Co gãke àgbètɔ mu nya ènu kè la va jɔ̀ ò. Àmè kɛ ye la teŋu gblɔ̃ ènu kè la va jɔ̀ lè woabe ŋùgbedòmèa na wo ò?

¹⁵Àzũi dona nupo na ye ɖokoe gbalo. Mu nyana èmɔ̃ kè e la to lè èdù gã mè ò.

¹⁶Jɔ̀gbèvuɛ̃ kɛ ye nyi na dùkɔ̃ ɖe kè ɖo èfìɔ kè lè vifɛ̃, eye yebe cãmìwo mu gbà wɔ̀nà ènu ɖekpe wu ènusu ɖùɖu ò!

¹⁷Jɔ̀gbènyuɛ̃ na dùkɔ̃ kè mè àgbònùgla be vi ɖù èfìɔ lèa. Yebe cãmìwo ɖùnà ènu ɖo gàmè ji. Wo wɔ̀nà ekèa sɔ kpɔna ŋusɛ̃ yeye, sɔ wɔ̀ èdɔ mu nyi be woa nù àhà sìgbè àhànùguguiwo nène ò.

¹⁸Ŋusù kè nyi kuviɔ̃tɔa be àxue gbãnà. Yebe èxɔ̀a ɖùɖùnà ne mu le jrà ɛ̀ ɖo òa.

¹⁹Lè jìjɔɛ mèa, àdɔ̀kùnɔ̀wo ɖànà ènu àdodoewo. Vɛ̃ dona jìjɔɛ na wo eye woabe ègà wɔ̀nà ènu ɖekpekpe.

²⁰Mù gbà sɛ̃kpɛ̃ na èfìɔ ò, mù gbà sɔ ènyà ɖo àmè ɖìnyi ŋuti ò, ne wò gbà lè àpo èxɔ̀ mè ŋutɔ cã a. Ɖo èto ɖe teŋu sè, la va yì ɖo ènu kè wò gblɔ̃a be ègbè.