Read gen Àɖàŋùɖètɔ 11 Bible Online

Àɖàŋùɖètɔ 11 - gen bible

Àɖàŋùɖètɔ 11

¹Mù gbà vɔ̃ ne wòa mànukpɔ ò, ɖo lè vɔ̀vɔnua, wò teŋu kpɔ ɖoŋuti nyuɛ̃.

²Vɔ̀, mù gbà sɔ àpo àdɔ̀kùnuwo kpata yì kɔ̀ ɖo tèpe ɖèka ò, ɖo wò mu nya jɔ̀gbèvuɛ̃ kè la teŋu jɔ̀ lè ànyigbã ji ò.

³Ne lilikpowo ɖɔ kudo èsìa, e trɔna èji jànà. Àti ɖe teŋu mù jè ɖùsi àlo èmìɔ̃ mè. Kè lè veveɖea, ye nyi be e nɔ̀nà àfi kè be mù jèa.

⁴Àgblèdàtɔ kè le vɔ̃ àyaa, mu la teŋu do ènuku ò. Àmè kè le vɔ̃ èjijàjaa, mu la teŋu yà ènuku ò.

⁵Àleke vifɛ̃ hũkɔ̃ɛ̃ wɔ̀nà trɔna ɖèvi lè ènɔa be àdɔ̀mè ò, eye fikɛ ye àgbè gbɔ̃gbɔ̃a sona na ɛ̀ ò? Nène a ke wò mu la teŋu nya lekè Mawu wɔ̀nà yebe ènuwo ɖo ò.

⁶Eŋuã ŋutia, do ènuku wòa so ŋùdekɛ̃nyɛ mè ke, mù gbà tɔtè èdɔwɔ̀wɔ kaka va ɖo wètrɔ mè ò. Nyàwo! Èdɔ kɛ ye la teŋu jè eji nyuɛ̃ ɖe ò? Ekèa àlo e ŋuaa? Wò mu nya ɛ̀ ò. Wo àmè èvèawo kpata teŋu nyɔ.

⁷Èzò kè le kɔ̀a, nɔ̀nà bɛɖɛ ɖe kpò eye e nyɔ na ŋùkuvi ne kpɔ dɔ̃ŋùkusu.

⁸Ne àgbètɔ gbà nɔ̀ àgbè dìdi ŋutɔ cã a, e ɖo la kpɔ jìjɔɛ ɖo èpè kèawo kpata ŋuti. Mia ɖoŋùku ekèa ji na mia nɔ̀nɔwo be ŋùkèkè bàɖàwo sùgbɔ fuu, eye èsɔ̀ mu ɖo kãkãɖoji ò.

⁹Èwò kè sĩ gbãnàa, zã àgbè wòa ne bèa na wò jɔ̀gbè nyuɛ̃ lè hùe kèa nu. Wɔ̀ ènu kè wò jro a, ènu sia ènu kè wò jia. Vɔ̀, wò ɖo la nya be: Mawu la ɖo kòjo na ènu kèwo kpata wò wɔ̀a.

¹⁰Nyà àkpɔ̃ jo lè àpo èjì mè, nyà èdɔ̀ jo lè àpo ŋutilã mè. Ɛ̃ɛ ɖèkajɛ àlo tùgbɛ̀jɛ kudo èɖà yìbɔwo va yìnà kaba.