Read gen Àɖàŋùɖètɔ 12 Bible Online

Àɖàŋùɖètɔ 12 - gen bible

Àɖàŋùɖètɔ 12

¹Wàlɛbɛ kè wò gbà lè ɖèkajɛ àlo tùgbɛ̀jɛ mèa, ɖoŋùku àpo ɖotɔ a ji. Ɖoŋùku e ji gbɔ̀xue hùenu vuɛ̃ bèa va ɖo. Gbɔ̀xue hùenu kè mè wò la va gblɔ̃ be: “Mu gbà le jro mù be ma nɔ̀ àgbè òa” bèa va ɖo.

²Lè gà ŋua mèa, dɔ̃ŋùkusu kudo èzò kè le kɔ̀a, la do vìvìti, wètri kudo wètriviwo la ci kplò, ne èji jà vɔ̀ cã, lilikpowo la gbà nɔ̀ àya mè sìgbè fifì ye èji le ji la jà nène.

³Nène a ye àxuea be jikpɔtɔwo la nɔ hũhũ kudo vɔ̃vɔ̃, àmè sɛ̃ŋuwo la xa gòbàa, nyɔ̃nùwo la tɔtè ènu toto lè èto mè, ɖo wo mu gbà sùgbɔ ò, eye kèwo ye kpɔna ènu to flɛsɛ̀ sãa, la bu woabe àcɔɖoɖo.

⁴Nène a ye hɔ̃tru kè hũnà jè èmɔ̃a jia, la tu, ètotiawo la nɔ̀ kpoo, xèvia la tɔtè èhà jìji, èhà jìjiwo kpata nu la ɖoɖa.

⁵Nène a, èmɔ̃ kè yì èjia la ɖo vɔ̃vɔ̃, àzɔ̃lìa la jiŋɔ, Èɖàwo la ɣe tìì sìgbè àti kè pòsea nène, àmètia la kpɛ̃ sìgbè tìkpo-tìkpo kè jè ànyi a nène, àgbèa le yì sìgbè àlekè àtikusɛ̃sɛ̃ gɛ̃na so àti jia nène. Ɛ̃ɛ, gbè sia gbèa, àmè ɖekpekpe àmè dɔ̃nà gogo èyɔ̀do, kè la nyi yebe nɔ̀pe mlɛ̃a. Eye àvihàjìtɔwo sɔ̀gbè lè èmɔ̃a ji.

⁶Nène a, klòsalò be èkàa la sò, sìka be kogòa la gbã, èkpeze kè ɖɔ kudo èsìa la gbã, èkà kè lè vudoa jia la sò.

⁷Ànyikɔ a la trɔ yì ànyigbã mè, fikè be soa, gbɔ̃gbɔ̃a la trɔ yì Mawu kè naa gbɔ.

⁸Ènunyatɔa gblɔ̃ be: “Ènu sia ènu trɔ zũ àzìzɔ, gbalo be gbalo.”

⁹Wo la gbà sɔ kpe è be: ènunyatɔa mu nyi ènunyatɔ kpò ò. Sɔ kpea, e gbà fiɔ ènu kè be nyaa àmèwo. E bù ètamè so èlododo sùgbɔ ŋuti, e jrò wo mè kpɔ, jrà wo ɖo.

¹⁰Ènunyatɔa jè àgbàgba ji ènyà gbɔ̃gblɔ̃ viviwo eye e ŋlɔ̀ ènu kè jèa, lè ɖoɖonu.

¹¹Ènunyatɔ be ènyàwo nɔ̀nà sìgbè èlãha-kplɔ̀tɔ be èkpò nène. Xoma ŋlɔ̀tɔwo lè sìgbè lipò be àti kèwo wo ɖìa nène. Mawu kè nyi kplɔ̀tɔ ɖèkaa, ye na ènuwo keŋu.

¹²Èvi nyè, mù gbà ji be yèa sɔ èɖe sɔ kpe è ò. Xoma ŋɔ̀ŋlɔ̃ nyi èdɔ kè mu ɖo nuwuwu òa, eye ènukpakpla sùgbɔ tìnà èkɔ̀ na àmè ŋutɔ.

¹³Ènu kèa kpata be ènuwunyà ye nyi be: Do bùbu Mawu ŋuti eye wòa wɔ̀ ɖo yebe ègbèɖèɖewo ji. Ɛ̃ɛ, ekèa ye àgbètɔwo kpata ɖo la wɔ̀.

¹⁴Nyàwo, Mawu la ɖokòjo na ènu kèwo kpata mi wɔ̀a, kaka jè kèwo mi wɔ̀ lè wawla mèa ji, lè ènyuɛ̃ kudo èvuɛ̃ mè.