Read gen Àɖàŋùɖètɔ 2 Bible Online

Àɖàŋùɖètɔ 2 - gen bible

Àɖàŋùɖètɔ 2

¹Mù gblɔ̃nà lè ɖokoe nyè mè be: “Va ɖù ànyigbã ji be àgbè, ne wò kè ɖo nyɔna ŋutia!” Kpɔɖa ekèa cã mu ɖo gɔ̃mèsèse ò.

²Jìjɔɛ mè nɔ̀nɔ nyi àɖàhùa jèje eye jìjɔɛ mu nyi ènu ɖekpe ò.

³Mù ɖo è be ma trɔ àhànùgugui ne ma srɔ̃ àmè màɖè susuwo, vɔ̀ ma nɔ kplɔ̀ ɖokoe nyè kudo ènunya. Ne ma sɔ ŋɔjè ènu kè àgbètɔ la teŋu wɔ̀ nyuɛ̃ ɖe lè yebe ànyigbã ji nɔ̀nɔa mè.

⁴Mù wɔ̀ ènu gãgãwo. Mù tù àxuewo eye mù gbà dè vɛ̃-gble cã.

⁵Mù ɖo àbɔwo, gbà ɖo ànyigbãwo eye mù do àti sɛ̃ku vòvòvòwo ɖo woa ji.

⁶Mù ɖo èsìdowo ne woa sɔ wu èsì àti kèwo tɔ jèjeawo.

⁷Mù plè kluviwo sùgbɔ: ŋusù kudo nyɔ̃nùwo. Mù ɖo sumɔ̃viwo drì. Mù ɖo èlãha vìvi ku gãgã lè gbɔsùsu mè wu èfìɔ kèwo nɔ̀ Yèruzàlɛm va yìa.

⁸Èfìɔwo kudo èdùwo be àdɔ̀kùnuwo lè àsi nyè drì: klòsalò kudo sìka. Èhàjìtɔwo kudo èwèɖutɔwo va dona jìjɔɛ na mù. Mù ɖo nyɔ̃nùwo sìgbè àlekè be jɔ̀nàjì na ŋusùwoa nène.

⁹Mù trɔ zũ àmè-jɔ̀-àmè ɖe. Mù wugã àmè kèwo keŋu nɔ̀ Yèruzàlɛm va yì sãa. Co gãke mù kpɔ̀tɔ̀ ɖo ènunya nyèa.

¹⁰Mù na ènu ɖekpekpe kè jro mù a, sù àsi nyè. Nyè mu xe jìjɔɛ be èmɔ̃nu ɖekpe na ɖokoe nyè ò. Ɛ̃ɛ, mù ɖù lè àgbàgba nyèwo mè eye tagbã nyèwo kpata cã kpɔ woabe àjɔ̀ xɔ̀.

¹¹Nène a mù bù ènu kèawo kpɔ, gbà kpɔ àgbàgba kèwo mù jè sɔ wɔ̀ woa. Eye mù kpɔ be e nyi ènu gbalo. E nyɔ bòhũ be ma pu dù jè àya pòpo yomè! Ɖo àgbètɔ mu kpɔ àlè ɖe lè ènu kè be le wɔ̀ lè ànyigbã jia mè ò.

¹²Mù le ji la ŋɔ jè ènu kè nyi ènunya, àɖàhùa kudo èlãnu wɔ̀wɔ mè. Eye mù biɔ ɖokoe nyè be: “Èfìɔ kè la va ɖɔ̀lì mù a, la teŋu nɔ̀ sìgbè àmè kèwo jè ŋùkɔ̀ na ɛ̀awo nènea?”

¹³Nyàwo! Mù do è jèsi be kɔ̀kɔ̀ɛ nyɔ wu vìvìti, eye ènunya nyɔ wu èlãnu wɔ̀wɔ.

¹⁴E sɔ̀gbè be ènunyatɔa nyana fikè e le yìa, vɔ̀ hɔ̃vi ya yìnà lè èzã mè kpò. Vɔ̀ mù gbà nya be woa kpata ɖo vɔ̀vɔnu ɖèka.

¹⁵Eye mù gblɔ̃ na ɖokoe nyè be: Vɔ̀vɔnu nyèa cã la nɔ̀ sìgbè hɔ̃via tɔ̀ nène. Eŋuã, àlè kɛ ye gbà lè ènunya si ò? Ènu gbalo kpò e nyi.

¹⁶Wo àmè èvèawo kpata be àgbàgbawo la nyi ènu ŋlɔ̀be lè àzã ɖewo yomè. Ènunyatɔa la ku sìgbè hɔ̃via ke nène. Eye wo ŋlɔ̀nabe ènunyatɔa sìgbè hɔ̃via ke nène. Nukɛ ŋuti ye ò?

¹⁷Mù crì àgbèa ɖo ènu ɖekpekpe kè lè ànyigbã jia nyɔŋu na mù. Ènu ɖekpe mu dɔ̃ àmè ji ò. E la nyɔ be woa pu dù kplɔ̀ àya pòpo do!

¹⁸E le ve mù be mù jè àgbàgba lè ànyigbã ji. Ɖo mù la va gble èdɔ kè mù wɔ̀a be kusɛ̃sɛ̃wo ɖɛ na àmè kè la va ɖɔ̀lì mù a.

¹⁹Àmè kɛ nya ne e la wɔ̀ ènunyatɔ be èdɔ àlo hɔ̃vi be èdɔ ò? Co e la kpàcɛ̀ na ènu nyèwo kpata. Ekèa cã mu ɖo gɔ̃mèsèse ò.

²⁰E ve na mù ŋutɔ be mù jè àgbàgba gbogbo kèa lè dɔ̃ŋùkusu gɔ̃mè.

²¹Àmè ɖe la wɔ̀ èdɔ kudo ènunya eye ènuwo la jè e ji na ɛ̀ keŋu. Kpòa, e la va gble yebe ènuwo keŋu ɖɛ na àmè kè mu jè àgbàgba ɖekpe klua òa. Ekèa cã mu ɖo gɔ̃mèsèse ɖekpe ò eye mu gbà sɔ̀gbè ò.

²²Ɛ̃ɛ, viɖèɖe kɛ ye lè àgbètɔ be àgbàgba jèje mè lè ànyigbã ji ò?

²³Gbè sia gbè ye wo hlɔ̃na, ɖùnà àyà sɔ wɔ̀nà ènu kè wo le ji la wɔ̀a. Ne èzã gbà do ŋutɔ cã a, wo mu gbɔ̃nàjɛ̃ ò. Ekèa cã mu ɖo gɔ̃mèsèse ò.

²⁴Nyɔna ɖèka kè mù kpɔ be e lè àgbètɔ sia ye nyi be, bèa ɖù ènu, nù ènu eye bèa kpɔ gomè lè yebe èdɔ wɔ̀wɔwo mè. Mù kpɔ be ekèa nyi Mawu ŋutɔ be ènunana.

²⁵Lè nyàwo mèa, àmè kɛ ye la teŋu ɖù ènu gbà ɖù àgbè ne Mawu mu jro ò?

²⁶Ɛ̃ɛ, Mawu ŋutɔ ye nana jìjɔɛ, ènu ŋɔjè ènu mè kudo ènunya, àmè kè jè ŋùmè na ɛ̀a. Vɔ̀, Mawu nana, àmè kè mu jè ŋùmè na ɛ̀ òa, bɔ̀nà ènu ɖɛ na àmè kè jè ŋùku mè na ɛ̀a. Eye ekèa cã nyi ènu kè mu ɖo gɔ̃mèsèse ɖekpe òa. E la nyɔ be woa pu dù kplɔ̀ àya pòpo do.