Read gen Àɖàŋùɖètɔ 5 Bible Online

Àɖàŋùɖètɔ 5 - gen bible

Àɖàŋùɖètɔ 5

¹Mù gbà nɔ sɔ̀ ènu ò, eye mù gbà ɖèbla fìã àjɔ̀gbè na Mawu ò. Ɖo Mawu ya lè jiŋùkusi, vɔ̀ wò ya wò lè ànyigbã ji. Eŋuã nɔ pò nupo kpoe kpò.

²Ne wo le bùtamè sùgbɔa, wo kuna èdrɔ̃, eye ne wo le pò nupo sùgbɔa, wo gblɔ̃nà ènyà sùgbɔwo.

³Ne wò do ŋùgbè na Mawu a, wɔ̀ ènu kè be àjɔ̀gbè wò fìã a kaba, ɖo Mawu mu lɔ̃nà àmè kè gblɔ̃nà ènyà vɔ̀ mu wɔ̀nà ɖo e ji ò. Yeŋutia, wɔ̀ ɖo ènyà kè wò gblɔ̃a ji kpò.

⁴E la nyɔ na wò be mù gbà fìã ènu ɖe be àjɔ̀gbè, vɔ̀ ne mù gbà va wɔ̀ ɖo e ji ò.

⁵Na àsà àgɔ̀jèje be ènyàwo gbɔ̃gblɔ̃. Mu gbà va nyi zĩji na wò ne wòa gblɔ̃ na Mawu be àmèdɔ̃dɔ̃a be: “Mù flù ye ò.” Mu nyi nène òa, Mawu la bijì ɖo ènu kè wò gblɔ̃a ŋuti eye e la gble ènu kè wò le wɔ̀a.

⁶Ne wo le ku èdrɔ̃ sùgbɔa, wo pònà nupo sùgbɔ vɔ̀ wo mu gblɔ̃nà ènyà ɖekpe ò. E la nyɔ bòhũ be woa si Mawu.

⁷Mu gbà wɔ̀ ŋùdã na wò ne wò kpɔ wo sɔ màjɔ̀ màjɔ le tɛ wɔ̀amènɔ̀ ɖo ànyi ò, àlo ne àmè ɖe mu le sò jɔ̀jɔɛ àlo le kpɔ èsea ji lè èdùa mè ò. Nyàwo! Àmègã ɖekpekpe ɖo yebe àpetɔ eye àmè bu gbà kpàcɛ̀ na woa kpata.

⁸E la nyɔ be èdùfìɔa ne kpɔ àgblè be ènyàwo gbɔ ɖo àgblèmè nukuwo ye le kpɔ àmè sia àmè ji.

⁹Ègà mu sùnà àmè kè lɔ̃nà ègà be ènyà gbɔa ò. Kɛ̀sìnɔ̀tɔa be àdɔ̀kùnɔ̀ mu jènà ŋùmè na ɛ̀ ò. Ekèa cã mu ɖo gɔ̃mèsèse ò.

¹⁰Ne ènu sùgbɔ lè àmè ɖe sia, àmè sùgbɔ ye ɖùnà ɛ̀. Àlè kɛ be la ɖè na ɛ̀ ò? E la teŋu sɔ ŋùku sɔ kpɔ yebe àdɔ̀kùnɔ̀awo kpò!

¹¹Àmè kè le ɖù lè yebe àgbàgba jèje mèa, dɔ̃na àlɔ̃ bɔ̀kɔ̀, ne e kpɔ viɖe àlo sùgbɔa. Vɔ̀ àdɔ̀kùnɔ̀ mu teŋu dɔ̃na àlɔ̃ ò, ɖo ènu sùgbɔ lè e si.

¹²Mù le ŋùku ɖo ènu kpaca àmè ɖe ŋuti kè le nyi be àdɔ̀kùnɔ̀ kè àdɔ̀kùnɔ̀ ɖe bɔ̀ ɖɛa va nyi àfɔ̀klɛ̃nu na ɛ̀.

¹³Àdɔ̀kùnɔ̀ kèa crɔ̃ lè ènu mànyatana ɖe mè. Eye ne e jì ɖèvi ɖe a, ɖèvia mu la gbà ɖo ècrɔ̃nu ɖekpe ò.

¹⁴E ɖo la va jo lè ànyigbã kèa ji sìgbè àlekè be vaa nène. Ɖo wàlɛbɛ kè ènɔa jìa, e lè àma-àma. Mu kpɔ àlè ɖe lè yebe èdɔwɔ̀wɔ mè ò, nènea ke mu la sɔ ènu ɖekpe sɔ yì ò.

¹⁵Jɔ̀gbè vuɛ̃ gã ɖe be nyi na ɛ̀: e ɖo la va jo lè xixe kèa mè sìgbè àlekè be vaa nène. Àlè kɛ ye lè ekèa mè na ɛ̀ ò? E jè àgbàgba gbalo kpò.

¹⁶Sɔ kpe èa, ènu sùgbɔ jɔ̀ ɖo e ji lè yebe àgbè mè: tamèbùbu, ŋuzĩzĩme nɔ̀nɔ, àdɔ̀mèze kudo gbɔ̀jɔ̀ gbɔjɔ.

¹⁷Ekèa ŋutia, ènu kè mù le susua ye nyi be àgbètɔ xòmèa ne ɖù gbà nù eye bèa kpɔ gomè lè yebe àgbàgba jèje mè lè àgbè kè Mawu na ɛ̀a mè. Ekèa kpò ye le nyi ye tɔ̀.

¹⁸Nyàwo, Mawu teŋu na àmè ɖe la trɔ àdɔ̀kùnɔ̀, ènu la sù e si eye be la zã àlekè e jro a. Àmè kèa la teŋu zã àkpa kè nyi e tɔ̀ lè yebe àgbàgba jèje mèa. Ekèa nyi Mawu ŋutɔ be ènunana.

¹⁹Nène a, e la ŋlɔ̀be be yèbe àgbèa lè kpòeɖe, ɖo Mawu na ènu nyɔ na ɛ̀.