Read gen Àɖàŋùɖètɔ 7 Bible Online

Àɖàŋùɖètɔ 7 - gen bible

Àɖàŋùɖètɔ 7

¹Nyikɔ ɖìnyi nyɔ wu anùwɛtrɛ̀ xɔ̀asì, eye èku zãgbè nyɔ wu jìgbè zã.

²Èku tèpe yìyi nyɔ wu àzã ɖùpe. Nyàwo àgbètɔ be vɔ̀vɔnu ye nyi èku eye àmè kèwo lè àgbèawo ɖo la nɔ̀ ɖoŋùku ekèa.

³Àwubabla nyɔ wu ènu kòko. Ɖo àwubabla nana ŋùkumè cina kpoo na àmè, vɔ̀ èjì mè ya kpɔna nyɔna.

⁴Ènunyatɔ nɔ̀nà fikè àmèwo le ɖù àyà lèa. Ènumànyatɔ nɔ̀nà fikè àmèwo le kpɔ jìjɔɛ lèa

⁵E la nyɔ be woa sè ènunyatɔ be ŋùmèkãkã sɔ wu ènumànyatɔ be kàfù-kafu.

⁶Ènumànyatɔ be nukòko ɖìnà sìgbè ànakè pupu kè le bì lè àdòkpo mèa nène. Mu ɖo gɔ̃mèsèse ɖekpe ò.

⁷Ènunyatɔ kè ɖo ŋusɛ̃ ɖo àmè kpɔ̀tɛawo jia, teŋu trɔ sùkunɔ̀ fàa, ènunanawo teŋu gble èjì na ɛ̀.

⁸E nyɔ ne woa wu èdɔ ɖe nu, wu be woa jè e gɔ̃mè. Àdòdò hɛ̃hlɛ̃ nyɔ wu èji cici.

⁹Mu nyɔ be woa nɔ bijì kpàtà-kpàtà ò, ènumànyatɔ ye binajì kaba.

¹⁰Mù gbà nɔ gblɔ̃ be: Nukɛ ŋuti ye sã xoxo nyɔ wu egbè ɖo ò? Àmè kè le gblɔ̃ ènyà kèa mu nyi ènunyatɔ ò.

¹¹Ènunya xɔ̀ àsì sìgbè ècrɔ̃nu ke nène ɖo àmè sia àmè ye kpɔna gomè lè e mè.

¹²Nyàwo, sìgbè ègà nènea, e hlùɛ̃nà àmè lè jɔ̀gbè vuɛ̃ si. E nana àgbè dìdi àmè kèwo si be sùa. Ekèa ŋuti àmè kè ɖo èa, ɖùji.

¹³Mi kpɔ ènu kè Mawu wɔ̀a. Àmè kɛ ye la teŋu jɔ̀ ènu kè Mawu glɔ̃a ò?

¹⁴Kpɔ jìjɔɛ ne ènu sia ènu le zɔ̃ sùua. Ne ènu ɖe mu le zɔ̃ òa, bù èta mè. Mawu ŋutɔ ye nana jɔ̀gbè nyuɛ̃ kudo jɔ̀gbè vuɛ̃: nène ye mi mu nyana ènu kè la va jɔ̀ a gbèɖe ò.

¹⁵Mù kpɔ ènu sia ènu lè àgbè nɔ̀zã vi nyè kèa mè: àmè kè wɔ̀nà àdɔ̀mè nyuɛ̃a kuna ɖo yebe àdɔ̀mè nyuɛ̃ wɔ̀wɔ ta, àmè kè le wɔ̀ àdɔ̀mèvuɛ̃a nɔ̀nà àgbè ɖo yebe àdɔ̀mèvuɛ̃ wɔ̀wɔ ta.

¹⁶Mù gbà nɔ wɔ̀ jɔ̀jɔɛ akpa àlo nɔ nyanu akpa ò. Ɖo nukɛ ŋuti ye wò la nɔ crɔ̃ ɖokoe wò ɖo ò?

¹⁷Mù gbà nɔ wɔ̀ àdɔ̀mèvuɛ̃ akpa àlo wòa gbà jɔ̀ hɔ̃vi akpa ò. Ɖo nukɛ ŋuti wò la ku gbɔ̀xue àzã wòa la sù ò?

¹⁸E nyɔ ne wòa wɔ̀ ɖo ènyà cucugbã tɔ̀a ji eye ne mù gbà ŋlɔ̀be èvègɔ̃a ò. Ɛ̃ɛ àmè kè ɖo bùbu na Mawu a, la wɔ̀ ɖo èvèa kpata ji.

¹⁹Ènunya nana ènunyatɔ ɖona ŋusɛ̃ kè wu gã èdùfìɔ èwo tɔ̀.

²⁰Àmè jɔ̀jɔɛ ɖe mu lè ànyigbã ji kè la teŋu wɔ̀ nyuɛ̃ mà-ɖo xàxa ɖekpe ò.

²¹Sɔ kpea, mù gbà ɖoto ènyà kè àmèwo le gblɔ̃a ò. Nène a, wò mu la va sè ènyà bàɖà kè kluvi wòa le gblɔ̃ so ŋuti wò ò.

²²Wò ŋutɔ cã wò nya àlekè wò gblɔ̃nà àmèwo cã tɔ̀a.

²³Ekèa cã mù wɔ̀ ɛ̀ kpɔ. Mù gblɔ̃ na ɖokoe nyè be: “Mù la kplɔ̀ ɖokoe nyè kudo ènunya.” Vɔ̀ nyè mu teŋu wɔ̀ ɛ̀ ò.

²⁴Àmè kɛ ye la teŋu ɖùtù na ènu kè lèa ò? Ɖo e dìdì gbà gòglò.

²⁵Nène a ye mù jimɔ lè ènunya ŋuti ne ma nya ɛ̀. Mù ji be ma nya ènu kè ŋuti ènu le jɔ̀ nènea. Mù gbà nya cã be àɖàhùa jèje ye nyi àdɔ̀mèvuɛ̃ kudo hɔ̃vinu wɔ̀wɔ.

²⁶Mù ŋɔjè ènu kèa mè be: Nyɔ̃nù kè le na ŋusùwo le jè ànyi a, le do àyàɖùɖu kè ve wu èkua na àmèwo. Yebe lɔ̃lɔ̃ a nyi gàmɔ eye yebe àlɔ̀wo lè sìgbè kɔ̀sɔ̀ kɔsɔwo nène. Àmè kè jènà Mawu be ŋùmèa, zɛ̃nà na ɛ̀, vɔ̀ vuɛ̃wɔ̀wɔtɔa ya jènà yebe èmɔ̃ a mè.

²⁷Ènunyatɔa gblɔ̃ be: Mù glò ènuwo kpɔ ɖèka-ɖèka sɔ nya ènu kè ŋuti ye wo le jɔ̀ ɖoa.

²⁸Mù ji ì fuu, vɔ̀ nyè mu kpɔ ènu ɖekpe ò. Kpɔɖa! Mù kè ɖo e ŋuti be ŋusù ɖèka lè àmè èkà-wìvɔàtɔ̃ mè kpò ye sù na ènunya. Vɔ̀ lè nyɔ̃nùwo kpata dòmèa, ɖèka tètè mu lè ò.

²⁹Mù sè e mè kpòeɖe kpò be Mawu na mi àgbètɔwo èjì bɔ̀bɔɛ ɖe kpò. Vɔ̀ mia ya mi cakana ènuwo kpata.