Read gen Àɖàŋùɖètɔ 8 Bible Online

Àɖàŋùɖètɔ 8 - gen bible

Àɖàŋùɖètɔ 8

¹Àmè ɖekpe mu ɖo ènunya tɔ̀xɛ ò, àmè ɖekpe mu teŋu ɖè ènu kè le jɔ̀ a gɔ̃mè ò. Co gãke àgbètɔ be ènunya nana àmè nɔ̀nà jìjɔɛ mè eye mu gbà sɛ̃na èta mè leke ò.

²Ne èdù-fìɔ le pò nupoa, mi ɖo la nɔ sètonu na ɛ̀, sìgbè àlekè mi fìã lè Mawu be ŋùkɔ̀a nène.

³Mi mu gbà ɖèkɔ̀ lè e ŋuti kaba ò. Mi mu gbà kpɔ̀tɔ̀ nɔ wɔ̀ ènu kè mu jènà ŋùmè na ɛ̀ ò, ɖo e wɔ̀nà ènu kè jè ŋùmè na ɛ̀a.

⁴Èfìɔ ɖekpe mu pònà nupo kpò ò, eye àmè ɖe mu lè la biɔ ɛ̀ sè be: “Nukɛ ye wò le wɔ̀ ŋua ò?”

⁵Àmè kè le sètonu na ɛ̀a, mu la kpɔ tùkaɖa ɖe ò. Vɔ̀ ènunyatɔa nya nyuɛ̃ ɖe be wo la ɖo kòjo kudo ènu sia ènu lè hùenu kè jèa.

⁶Ɛ̃ɛ, Mawu la ɖo kòjo na àgbètɔ be wɔ̀na ɖekpekpe gbè ɖèka, ɖo àgbètɔ bàɖà ŋutɔ.

⁷Wo mu nya ènu kè la va jɔ̀ àlo gà kè mè be la jɔ̀ a ò.

⁸Àmè ɖekpe mu ɖo ŋusɛ̃ la teŋu le yebe àgbè ɖotè ò. Eye àmè ɖe mu teŋu dɔ̃ yebe èku zãa yì ŋùgbe ò. Àmè ɖe mu teŋu si lè èku be ŋùkɔ̀ ò, eye ènu bàɖàwɔ̀tɔ mu la teŋu kpɔ xɔ̀namè ɖekpe ò.

⁹Ekèa kpata ye mù kpɔ: mù le ŋùku ɖo ènu kè le jɔ̀ a keŋu ŋuti. Hùenu ɖe ye àgbètɔ le ɖù lè nɔ̀via ji ne bèa tɛ ɛ̀ ɖo ànyi.

¹⁰Mù kpɔ àmè bàɖàwo be ècɔ tèpewo. Àmè kèawo yìnà mawuxɔa mè eji-eji. Eye wo ŋlɔ̀be ènu kè wo wɔ̀a lè Yèruzàlɛm. Ekèa cã mu ɖo gɔ̃mèsèse ò.

¹¹Ɖo ènu bàɖà be fɛ̃tu mu vana ènu bàɖàwɔ̀tɔ ji zè ɖèka òa, àgbètɔwo be sùsumè ɖɔ kudo ènu bàɖà wɔ̀wɔ.

¹²Ènuvuɛ̃wɔ̀tɔ ɖe teŋu wɔ̀ èvuɛ̃ tèpe èkà-vètakpo vɔ̀, la gbà teŋu nɔ̀ àgbè dìdi ɖe. Mù nya be wo gblɔ̃nà be: “Àmè kèwo bùnà Mawu a, la nɔ̀ jɔ̀gbè nyuɛ̃ mè, ɖo wo do jèsi yebe hɔ̃hlɔ̃a.

¹³Àmè kèwo le wɔ̀ ènu bàɖàwo la nɔ̀ jɔ̀gbè vuɛ̃ mè. Wo la va yì sìgbè àlekè vɔ̃vɔ̃lì va yìnàa nène. Wo mu la sĩ gbɔ̀xue la ku ò, ɖo wo mu do jèsi Mawu be hɔ̃hlɔ̃a ò.”

¹⁴Gãkea, ènu kèa cã mu ɖo gɔ̃mèsèse lè ànyigbã ji ò: àmè ɖewo lè, wo le wɔ̀ nyuɛ̃ co vɔ̀, wo le kplɔ̀ wo sìgbè èvuɛ̃wɔ̀tɔwo nène. Àmè buwo le wɔ̀ èvuɛ̃ vɔ̀, wo le kplɔ̀ woa ya sìgbè ènyuɛ̃wɔ̀tɔwo nène. Mù gbà le gblɔ̃ ɛ̀ ke be, ekèa cã mu ɖo gɔ̃mèsèse ò.

¹⁵Ènyè ya, mù le jì jìjɔɛ be èhà. Nyàwo, jɔ̀gbè nyuɛ̃ kè lè na àgbètɔa ye nyi be bèa ɖù, bèa nù eye bèa kpɔ gomè lè àgbèa mè. Ènu kèa ye ɖo la kplɔ̀ woabe èdɔwɔ̀wɔ do lè àgbè kè Mawu na woa mè.

¹⁶Mù jè àgbàgba ne ma ŋɔjè àlekè wo la wɔ̀ nyi ènunyatɔa. Mù le ŋùku ɖo àgbètɔ be èdɔwɔ̀wɔwo ŋuti. Mù kpɔ ènu kèa: Ne mi gbà nɔ̀ ŋùzɔ̃ èzã kudo kedè cã a, mi mu la teŋu kè ɖo àlekè Mawu le wɔ̀ ènuwo ɖoa ŋuti gbèɖe ò. Àgbètɔ teŋu do àyà na ye ɖokoe sɔ ji ekèa, vɔ̀ mu la kè ɖo e ŋuti ò. Eye ne ènunyatɔ gbà gblɔ̃ be ye nya ɛ̀ cã a, mu la teŋu sè e gɔ̃mè ò.