Read gen Èhàwo be Èhà 1 Bible Online

Èhàwo be Èhà 1 - gen bible

Èhàwo be Èhà 1

¹Salomɔ̀n be èhàwo be èhà.

²Kpla àsi èkɔ̀ na mù, ne wòa gbigbɔ̃ ènu na mù, ɖoa, àpo lɔ̃lɔ̃ vivi wu vɛ̃.

³Àpo àmìa le hɔ̃ɛ̃ fiofio, àpo nyikɔ lè sìgbè àmì hɔ̃hɔ̃ɛ̃ kè wò wua nène, ekèa ŋuti àpo ènu jɔ̀nàjì na tùgbɛ̀jɛwo ɖo!

⁴Le àlɔ̀ na mù! Mia pu dù! Èfìɔa kplɔ̀ mù ɖo yebe èxɔ̀ mè. Mia kpɔ jìjɔɛ, ne mia sò àyo, mia nù àpo lɔ̃lɔ̃ a, sɔ wu vɛ̃. Tùgbɛ̀jɛ kèwo lɔ̃nà wòawo be ènyà jɔ̀!

⁵Yèruzàlɛm nyɔ̃nùviwo, ènyè yaa, mù nyrɔ̃, vɔ̀a, mù nyɔ, sìgbè Kedàr be gòxɔ yìbɔwo nène, sìgbè Salomɔ̀n be xɔ̀mèsɔ̀vɔwo nène.

⁶Mì mu gbà nɔ kpɔ mù nènea, kè mù nyrɔ̃a ŋuti ò, dɔ̃ŋùkusu ye ɖù mù. Fòfo nyèwo bijì do mù. Wo na mù lebè na vɛ̃-gblewo, vɔ̀a, nyè mu kpɔ nyè ŋutɔ vɛ̃-gble nyè gbɔ ò.

⁷Èwò kè èkla nyè lɔ̃a, Gblɔ̃ àfi kè wò kplɔ̀nà èlãha wò, yì ɖùnà ènu lèa, àfi kè wò nana, e gbɔ̃nà jɛ̃ lè, dɔ̃ŋùkusu mèa na mù, ne nyè mu gbà va yì nɔ ɖìsà, sìgbè àhasìtɔ nène, lè tɔ̀ wòwo be èlãhawo dòmè ò.

⁸Èwò kè jè tùgbɛ̀jɛ lè nyɔ̃nùwo dòmèa, ne wò mu nya ɛ̀ òa, eŋuã, zɔ̃ èlãhawo be àfɔ̀tope ji, eye wòa na, ègbɔvi wòwo ne ɖù ègbe lè èlãkplɔ̀tɔwo be gòxɔwo gbɔ.

⁹Lɔ̃lɔ̃ nyè, wò nya kpɔkpɔ sìgbè èsɔ-nɔ kè wo ɖo àcɔ na, ne bèa dɔ̃ Ejiptè be èfìɔ be àhùakèkevia nène.

¹⁰Àlɔgo wòwo gbà nyɔ kpe è, lè ètomègàvi wòwo dòmè, eye jònua ɖo àcɔ na àpo èkɔ̀.

¹¹Mi la wɔ̀ sìka-tomègàvi, la sɔ klòsalò ɖo àcɔ na ɛ̀ na wò.

¹²Wàlɛbɛ kè èfìɔa bɔ̀bɔ̀ nɔ̀ ànyi ɖo yebe àblɔ̀ŋùgɔ mèa, àpe àmì hɔ̃hɔ̃ɛ̃ le ɖè àya fiofio.

¹³Lɔ̃lɔ̃ nyè lè na mù sìgbè àbɛyɛ sepòpo babla nène, lè ànɔ nyèwo dòmè.

¹⁴Lɔ̃lɔ̃ nyè lè na mù sìgbè àcɔ sepòpo nyuɛ̃ ɖe nène lè Ɛn-Gèdid be vɛ̃-gblewo mè.

¹⁵Oò! Wò jè tùgbɛ̀jɛ loò, jɔlè nyè! Aò! Leke wò nya kpɔkpɔ lekea ò! Ŋùkuvi wòwo va lè sìgbè àhɔ̃neviwo nène.

¹⁶Oò! Wò jè ɖèkajɛ loò, lɔ̃lɔ̃ nyè! Aò! Leke wo nya kpɔkpɔ lekea ò! Ègbe do àmàwo ye nyi miabe àba.

¹⁷Sedàtiwo ye nyi miabe èxɔ̀gbatiwo, èhũtiwo[1] ye nyi miabe èkpawo.