Read gen Èhàwo be Èhà 2 Bible Online

Èhàwo be Èhà 2 - gen bible

Èhàwo be Èhà 2

¹Ènyè yaa, mù nyi Sarɔ̀n be gbàjàji sepòpo[2], bàlìwo mè be sepòpo ɣe[3].

²Leke sepòpo ɣe nɔ̀nà lè àŋùjawo dòmèa, nènea ye jɔlè nyè lè, lè nyɔ̃nùviwo dòmè.

³Leke àtɔklikoti [4] nɔ̀nà lè àtiwo dòmè, lè ègbe mèa, yebe fàfagbè ye jro mù, eye mù nɔ̀ e gɔ̃mè. Eye yebe èkusɛ̃sɛ̃a vivi, lè ènu mè na mù.

⁴E kplɔ̀ mù ɖo vɛ̃xɔa mè [5] Eye yebe àplãŋuga kè be vlũ ɖo ji nyèa ye nyi lɔ̃lɔ̃.

⁵Mì do ŋusɛ̃ mù, ku vɛ̃kusɛ̃sɛ̃ be klàko, mì gbɔ̀ àgbè mù, ku àtɔkliko, ɖoa, lɔ̃lɔ̃ srè lãmè na mù.

⁶Yebe èmìɔ̃-lɔ le hũɖòmè na mù, eye be sɔ ɖùsi-lɔa miɔ̃ mù ɖo ŋuti.

⁷Yèruzàlɛm nyɔ̃nùviwo! Mì tà èzĩ ku àvũgbɛ, lè ègbe mè na mù, be mì mu la fɔ̃ ɛ̀, mì mu la hũhũ lɔ̃lɔ̃ nyè kaka na hùenu kè ye ŋutɔ la jro a ò.

⁸Lɔ̃lɔ̃ nyè be ègbè yeŋuã! E ye gbãnà, le tìkpo lè ètowo ji, le fla ètokɔ̃ɛwo ŋua!

⁹Lɔ̃lɔ̃ nyè lè sìgbè èzĩ nène, sìgbè àvũgbɛ be èvi nène. E ye nɔ̀tè ɖo miabe èglì godo ŋua! E le kpɔ ènu to flɛsɛ̀a nu, le bèkpɔ èxɔ̀a mè.

¹⁰Lɔ̃lɔ̃ nyè kè ènu, to na mù be: Sitè, jɔlèvi nyè, tùgbɛ̀jɛvi meme nyè, va!

¹¹Ɖoa, àvìvɔ hùenu ɖo èxɔ̀ vɔ̀. Kpɔɖa, èji jàja ɖoɖa! E vɔ̀vɔ̀!

¹²Sepòpowo hũ lè ànyigbã a ji. Èhàjìji be gàmè va ɖo. Pepleluwo be ègbèwo le ɖì, lè miabe ànyigbã a keŋu ji.

¹³Gboti be sɛ̃sɛ̃wo tɔ ɖìɖi, vɛ̃ti be sepòpowo le ɖè àya fiofiofio. Sitè, jɔlèvi nyè, tùgbɛ̀jɛvi meme nyè, va!

¹⁴Àhɔ̃nevi nyè lè èkpetowo mè, lè bàlì ɖo vɔ̃vɔ̃wo be wawlape lè ètowo ŋuti, na, ne ma kpɔ àpo ŋùkumè ɖa! Na, ne ma sè àpo ègbè! Ɖoa, àpo ègbè vivina eye àpo ŋùkumè nya kpɔkpɔ!

¹⁵Mì le wɛ̀tɛ̀klɛ̀awo na mi! Wɛ̀tɛ̀klɛ̀vi bàɖà kèawo, wɛ̀tɛ̀klɛ̀vi kèwo gblena miabe vɛ̃-gblewo, miabe vɛ̃-gble kèwo pò èse a.

¹⁶Lɔ̃lɔ̃ nyèa, tɔ̀ nyè ye be nyi. Eye nyè cã mù nyi ye tɔ̀, e ye kè kplɔ̀nà yebe èlãhaa yì ɖùnànu lè sepòpo ɣewo dòmèa.

¹⁷Kaka na wàlɛbɛ kè ànyigbã la fa, eye vìvìtiwo nu la va yìa, trɔ gbɔ̀, lɔ̃lɔ̃ nyè, trɔ gbɔ̀, ne wòa nɔ̀ sìgbè èzĩ, àlo sìgbè àvũgbɛvi nène, lè èto kèwo ma mia dòmèawo ji.