Read gen Èhàwo be Èhà 4 Bible Online

Èhàwo be Èhà 4 - gen bible

Èhàwo be Èhà 4

¹Oò! Wò jè tùgbɛ̀jɛ loò! Lɔ̃lɔ̃ nyè, wò jè tùgbɛ̀jɛ ŋutɔ! Lè ŋùmè cɔ̃vɔ wòa godo, ŋùkuvi wòwo le ze sìgbè àhɔ̃newo nène. Èɖà yìbɔ wòwo le hùã sìgbè ègbɔwo be èlãha kè le ɖì Gilead be àbùwo nène.

²Àɖu wòwo ɣe peŋu-peŋu sìgbè àlɛ̃ha kè wo kpà èfu na, eye wo gbɔ̀ so èsì lèpea nène. Ɖe sia ɖe ɖo yebe vènàvi, eye ɖekpe mu ci àkòŋùgò ò.

³Ènùyi wòwo nya kpɔkpɔ sìgbè èkàvi kpɛbɛ jɛ̃ èvè nène, eye ènu wò nyi lɔ̃lɔ̃ ɖèɖe be ènu. Lè ŋùmè cɔ̃vɔ wòa godoa, àlɔgo wòwo le ze lotoe, sìgbè yòvobòɖà mamãmè èvè nène.

⁴Èkɔ̀ trɛlɛ wòa nyɔ sìgbè David be èmɔ̃jikpɔxɔ̀ kè wo tù ku àcã a nène. Wo sɔ àkpɔxɔ̀nu èkà èwìvɔ àtɔ̃ kù e ŋuti, woa keŋu nyi kãlìwo be àkpoxɔ̀nuwo

⁵Ànɔ wò èvèawo hùe sìgbè àvũgbɛvi èvè nène, wo nyɔ sìgbè èzĩvi vènàvi kèwo le ɖù ègbe lè sepòpo ɣewo dòmèawo nène.

⁶Kaka na èŋù ne kè, eye vɔ̃vɔ̃lìwo ne sia, mù la yì nɔ̀ àbɛyɛ be èto gbigbli ji, lifi hɔ̃hũɛ̃ fiofio be ètokɔ̃ɛ ji.

⁷Wò jè tùgbɛ̀jɛ kpò! Lɔ̃lɔ̃ nyè! Zũpe ɖekpe mu lè ŋuti wò ò.

⁸Va mi jo, àgɔ̀sɔ nyè, so Libàn! Va mi jo, so Libàn be ètoa ji! Mia ɖì so Amànà-toa tamè, mia ɖì so Senìr, kudo Hɛrmɔ̀n-toa be tamè, so jãŋùtawo be èdo mè, èto kèwo ji èkpɔ̃wo sãnà lèa.

⁹Ŋùkuvi [6] ɖèka kpò wò ɖo na mù, nɔ̀vi nyè, àgɔ̀sɔ nyè, jònu kui ɖèka kpò, lè àpo èwlɔa mè ye wò sɔ fĩ àpe èjì.

¹⁰Leke wɔ̀ àpo lɔ̃lɔ̃ vivina na mù, lekea ò! Nɔ̀vi nyè, àgɔ̀sɔ nyè! Leke wɔ̀ ye àpo lɔ̃lɔ̃ vivina wu vɛ̃ ò! Eye àpo àmì hɔ̃hɔ̃ɛ̃ jo wu ègbe hɔ̃hɔ̃ɛ̃wo keŋu ò!

¹¹Àgɔ̀sɔ nyè, ènu kèwo tona so ènu mè na woa vivina sìgbè ànyisì nène. Nyìnɔsi ku ànyisì lè àɖe gɔ̃mè na wò. Àvɔ wòwo be hɔ̃hɔ̃ɛ̃ lè sìgbè Libàn be àmì hɔ̃hɔ̃ɛ̃ nène.

¹²Nɔ̀vi nyè, àgɔ̀sɔ nyè, àbɔ kè be àgbo wo tua ye wò nyi, wò nyi èsìjɔ̀pe kè wo tɔ̃ èkpa do a, vudo kè nu wo trea.

¹³Yòvobòɖà ye wò do ɖo e mè, kpe ɖo àtikusɛ̃sɛ̃ cãcãwo ŋuti, kpe ɖo lalì nyuɛ̃wo be sepòpo ŋuti kpe ɖo ègbe hɔ̃hɔ̃ɛ̃ fiofiowo ŋuti,

¹⁴ègbe hɔ̃hɔ̃ɛ̃ fiofio ku ègbe vevewo, ènu hɔ̃hũɛ̃ ku ɖàdonu fiofiowo, kpe ɖo lifi-ti vòvòvòwo ŋuti, kpe ɖo àbɛyɛ ku àɖiàɖi kudo ènu hɔ̃hũɛ̃ nyuɛ̃ vòvòvòwo ŋuti.

¹⁵Àbɔ mè-sìjɔ̀pe ye wò nyi, vudo kè nana àgbè-sia, kè nana èsì so Libàn-to jia.

¹⁶Àvego be àyapòpo, fɔ̃! Àpùgo be àyapòpo, wò cã va! Mì pò ɖo àpe àbɔ mè, Àleke be e mè be hɔ̃hɔ̃ɛ̃ fiofio ne gbãble! Lɔ̃lɔ̃ nyè ne va yebe àbɔ mè, Ne bèa ɖù yebe àtikusɛ̃sɛ̃ cãcãwo, ne bèa sè vivi.