Read gen Èhàwo be Èhà 5 Bible Online

Èhàwo be Èhà 5 - gen bible

Èhàwo be Èhà 5

¹Nɔ̀vi nyè, àgɔ̀sɔ nyè, mù va àbɔ nyèa mè. Mù yà àbɛyɛ nyèa ku ènu hɔ̃hɔ̃ɛ̃ fiofio nyèwo. Mù ɖù ànyisì be èkpo nyèa eye mù nù ànyisì nyèa, mù nù vɛ̃ nyèa ku nyìnɔsi nyèa. “Mì ɖù! Èxlɔ̃ nyèwo, mì nù! Lɔ̃lɔ̃tɔwo, mì nù, ne mìa mu!

²Mù dɔ̃ àlɔ̃, vɔ̀a èjì nyè lè ŋùtè. Mì ɖo èto! Lɔ̃lɔ̃ nyè le pò èhɔ̃a! “Nɔ̀vi nyè, lɔ̃lɔ̃ nyè, Hũ èhɔ̃a na mù! Àhɔ̃nevi nyè, àmè mà-ɖoɖi nyè! Ɛ̃ɛ, àhũ pò èta na mù, eye èzãmè be èsì wuwluiwo pò èɖà na mù.”

³Mù ɖè àvɔ nyèwo vɔ̀. Mù la gbà trɔ tà wo ye à? Mù klɔ àfɔ̀ nyèwo vɔ̀. Mù la gbà pòɖi wo ye à?

⁴Ekè lɔ̃lɔ̃ nyè sɔ àlɔ̀ to hɔ̃tru a be fɛ̃fɛ̃pea, èjì nyè tɔ pòpo ku jìjɔɛ ɖo e ŋuti.

⁵Kè mù sitè, ne ma hũ èhɔ̃a na lɔ̃lɔ̃ nyèa, Àbɛyɛ be àmì le sìɔ̃ lè àlɔ̀ na mù, Àbɛyɛ be àmìa, srà so àlɔ̀vi nyèwo ŋuti, kɔ̀ ɖo lɔkèa be àlɔ̀ ŋuti.

⁶Mù hũ èhɔ̃a na lɔ̃lɔ̃ nyè, vɔ̀a lɔ̃lɔ̃ nyè trɔ, eye be jo. Gãkea, wàlɛbɛ kè be le pò nupoa, yebe ègbe wù èkla na mù. Mù ji ì, vɔ̀a, nyè mu kpɔ ɛ̀ ò. Mù yɔ ɛ̀, vɔ̀a mu tɔ̀ ò.

⁷Ekè èzãɖiatɔ kèwo sãnà lè èdùa mèawo dogò mù a, wo pò mù, do àbì ŋuti nyè. Èglìkpaa ɖiatɔ kèawo sɔ àwùgã nyèa jo!

⁸Aò! Yèruzàlɛm nyɔ̃nùviwo, mì fìã àjɔ̀gbè na mù be ne mì kpɔ lɔ̃lɔ̃ nyèa, leke ye mì la to na ɛ̀ ò? Mì to na ɛ̀ be: Lɔ̃lɔ̃ do èdɔ̀ lãmè na mù!

⁹Tùgbɛ̀jɛwo be tùgbɛ̀jɛ, nukɛ ye lɔ̃lɔ̃tɔ wòa sɔ wu lɔ̃lɔ̃tɔ buwo ò? Nukɛ ye lɔ̃lɔ̃tɔ wòa ɖo wu lɔ̃lɔ̃tɔ buwo, ne wòa na, mia fìã àjɔ̀gbè ò?

¹⁰Lɔ̃lɔ̃ nyèa, lãmè lè e si, eye be bìa. E jè àmè ŋùmè wu àgbètɔ hotu àtɔ̃.

¹¹Yebe èta lè sìgbè sìka mà ɖoɖi nène. Yebe èɖà mli lè èta na ɛ̀, yìbɔ sìgbè àkpàfiɔ̃ be èfu nène.

¹²Yebe ŋùkuviwo lè sìgbè àhɔ̃newo, àhɔ̃ne kèwo ɖo sìgbè jònukuiwo nène lè ètɔ sàsra to, le lè èsì lè nyìnɔsi mè.

¹³Yebe àlɔgowo nyɔ sìgbè àbɔ kè mè ègbe hɔ̃hũɛ̃ fiofiowo mìɔ̃ ɖo, eye wo le ɖè àya fiofiofioa nène. Yebe ènuyuwo lè sìgbè sepòpo ɣewo nène, sepòpo ɣe kèwo mè àbɛyɛ fiofio be èsì le sìɔ̃ soa.

¹⁴Yebe àbɔwo nyi sìkati mlìmɔ̀ kèwo wo sɔ èkpe xɔ̀asìwo ɖo àcɔ na a yebe pòdo nyi àɖàŋùdɔ kè wo sɔ ènyùɖu wɔ̀, eye wo sɔ jònu xɔ̀asìwo ɖo àcɔ na a.

¹⁵Yebe àtawo sɛ̃ŋu sìgbè èkpe ɣe be sɔti kèwo wo li ɖo sìka àdodoe be àfɔ̀wo ji nène. Yebe ŋùmè le ze sìgbè Libàn-towo nène, eye be nyi ènu cãcã sìgbè sedàti gãa nène.

¹⁶Vivi ŋɔnɔɛ̃ ye nyi yebe ènu mè, eye àmèti bliboa jrona àmè, Lekea ye lɔ̃lɔ̃ nyèa lè. Lekea ye jɔlè nyèa lè. Ɛ̃, Ziɔ̀n nyɔ̃nùviwo!