Read gen Ànyasã 1 Bible Online

Ànyasã 1 - gen bible

Ànyasã 1

¹Mì ji jɔ̀jɔɛnyinyi, mìa àmè kèwo kpà àcɛ̀ na ànyigbã, mì ɖo susu jɔ̀jɔɛwo ɖo Tɔhonɔ̀a ŋuti, mì nɔ ji ì ku èjìmè fàa

²Ɖoa e tànàsi ye ɖokoe na àmè ke mu jinage lè e ŋuti òa, ye be kpɔ na ɛ̀, e ɖènà ye ɖokoe fiɔ àmè ke mu dona kpò e ji xɔ̀xɔsè òa.

³Susu gɔ̃glɔ̃wo klãna àmè lè Mawu ŋuti, eye yebe hɔ̃hlɔ̃a titɔna bòmècitɔwo, ne wo tè è kpɔa.

⁴Ànyasã mu ɖona èkla ènumàyewɔ̀tɔa mè ò, mu nɔ̀nà ŋutilã kè ènuvuɛ̃ ɖɔa mè ò.

⁵Ɖo Gbɔ̃gbɔ̃ kɔ̀kɔɛ kè le fiɔ ènua, zɛ̃nà na ènuvèɖùɖu, e nana àsà ètagbɔ kukutɔwo, e crìnà ànùkuamàwɔ.

⁶Ànyasã nyi gbɔ̃gbɔ̃ ɖe kè lɔ̃nà àgbètɔwo, eye mu la dokpò ètodɔ̃ nana àmè kè be ènuwo gblɔ̃nà àhovìnyawo ò. Ɖo Mawu nyi ɖàsefo so yebe àyìkuwo ŋuti, e jrònà yebe èjì mè kpɔ sɔ zɔ̃ ɖo nyàwo ji, eye be nɔ̀nà èto ji na yebe nùpowo.

⁷Nyàwo, Tɔhonɔ̀ be Gbɔ̃gbɔ̃a ɖɔ ànyigbã, eye kè e le xixe kplògòdòa, e jènàsi ègbèɖìɖi ɖekpekpe.

⁸Ye ŋutia àmè ɖekpekpe kè pònà nupo bàɖà bàɖà ɖea, mu sina le e nu ò, eye mu la teŋu si lè kòjoɖotɔa be jɔ̀jɔɛsòso nu ò.

⁹Ènugɔ̃mèkùku la nɔ̀ ànyi so àmè bàɖa be ètamèsusuwo ŋuti, yebe nupowo la yì kaka Tɔhonɔ̀ gbɔ sìgbè yebe ènudrãwo be ɖàse ke nène.

¹⁰Èto ɖoɖo vevedonutɔ̀a, sènà ènuwo keŋu, èkpaɖèɖe ŋutɔ cã mu tona e ŋuti ò.

¹¹Ye ŋutia mì kpɔ mìa ɖokoewo ji na lihũilìli yàkàtɔ̀, mì le mìabe àɖe ne mì mu gbà kpà ènyà ɖo ènyà ji ò, ɖo ènyà bɛɖɛ ɖèka tètè mu buna e yomèsonu mà kpɔ xɔ̀ ò, eye ènu kè dona àdìgbãa, wùnà èkla.

¹²Mì mu gbà nɔ do àfɔ̀ na èku to mìabe àgbè nɔ̀nɔ tãtrã ji ò, mì mu gbà hɛ̃ cɔ̃crɔ̃ va mìa ɖokoe ji to mìabe àsinùdɔ wɔ̀wɔwo mè ò.

¹³Mawu ya, mu wɔ̀ èku ò, eye àgbètɔwo be ku mu dona jìjɔɛ na ɛ̀ ò.

¹⁴Ɖo e ɖo ènuwo kpata ne woa nɔ̀ e ji tɛ̀gbɛ̀, eye xixea be ènuɖoɖowo lè na àgbèa be zãzã; àɖi àfɔ̀kutɔ̀ ɖekpekpe mu lè woa mè ò eye èkujèsu be àcɛ̀a mu ɖùnàji lè ànyigbã ji ò,

¹⁵ɖo ekèa ŋutia, jɔ̀jɔɛnyinyi lè màku gbèɖe.

¹⁶Vɔ̀a àmè bàɖawo kpe èkujèsu va to àsi mìmi ku ègbèɖèɖe mè. Eye wo sɔ ɛ̀ ɖo èxlɔ̃ tèpe, wo srè jè e yomè, wo wɔ̀ zòɖùɖu kudo è. Eŋua e sɔ̀gbè tutu be wo nyi yebe èhadotɔwo.