Read gen Ànyasã 10 Bible Online

Ànyasã 10 - gen bible

Ànyasã 10

¹Ànyasã cɔ̃ xixea be ètɔ cucugbã kè wo wɔ̀a. Ye ɖèka tutu ye wo ɖo. Kè e jè ànyi e yomèa, ànyasã ke gbà lìɔ ɛ̀ to lè funua.

²E na ɛ̀ ŋusɛ̃ ɖo ènu sia ènu ji.

³Vɔ̀a lè yebe jìbibia mèa, àmè mà wɔ̀ ènu jɔ̀jɔɛa ye trɔ lè ànyasãa yomè, ɖo e do nɔ̀via èku.

⁴Wàlɛbɛ kè èsì ɖɔɖɔ gã xɔ̀ ànyigbã ɖo e ŋutia, ànyasã gbà hlùɛ̃ ɛ̀ gã ke, to àɖakàhũ ɖe kpò ji.

⁵Wàlɛbɛ kè xixea be dùkɔ̃wo ɖo ègbè du lè ènu kpòtoe mè, eye wo titɔa, ànyasã ke va do jèsì àmè jɔ̀jɔɛa; e lebè na ɛ̀ àgɔ̀màjètɔ lè Mawu be ŋùkumè eye e na ɛ̀ ŋusɛ̃ wɔ̀ ànùkua ɖe, to gbɔ be e ɖo lɔ̃lɔ̃ na èvia cãa.

⁶Nèneake, wàlɛbɛ kè àmè kpòtoewo le crɔ̃a, e ye va hlùɛ̃ àmè jɔ̀jɔɛa gã lè èzò kè le kɔ̀ ɖo èdù àtɔ̃awo jia mè.

⁷Woabe èvuɛ̃ jɔ̀jɔ be ɖasea kpɔ̀tɔ̀ lè, èkuɖì-nyigbã le tù àzìzɔ, àti kèwo be èkusɛ̃sɛ̃ mu ɖìnà lè àzã jè àzã ji ò, kudo èjèkɔ̃ be sɔti tata kè nyi èkla màɖoto be ŋùɖoa.

⁸Àmè kèwo crì ànyasã, mu nyi ènyuɛ̃ mànyatɔwo ɖeɖe kpò wo nyi ò, vɔ̀a wo gbà gble woabe àɖàhùa jèjea ɖɛ na jìjimèviwo, àleke be lè woabe dàdawo ŋutɔ cã mèa, woa nya wo.

⁹Vɔ̀a ànyasã ɖè yebe sumɔviawo lè woabe tètèkpɔwo mè.

¹⁰Àmè jɔ̀jɔɛ ke le si lè yebe nɔ̀via be àdɔ̀mèzea nua, le kplɔ̀ ɛ̀ to èmɔ jɔ̀jɔɛwo ji, e sɔ Mawu be fìɔdua fiɔ ɛ̀ eye be na ɛ̀ ènu kɔ̀kɔɛwo be gɔ̃mèsèse be ŋusɛ̃; e na be ènuwo jè ji na ɛ̀ lè yebe gbɔ̀jɔ̀gbɔjɔwo mè, eye be tusì na yebe àlɔ̀nudɔwo.

¹¹Eye àmètafutɔwo ji la flù ì, co ànyasã na e ɖù woa ji; trɔ na e zũ àdɔ̀kùnɔ̀.

¹²E cɔ̃ e ji lè yebe kɛ̃tɔwo be ŋùkɔ̀, e hlùɛ̃ ɛ̀ lè èmɔ̀tetrewo simè, e xɔ̀ na ɛ̀ lè àvũ càklì ɖe mè ne bèa nya be ànùkua wɔ̀wɔa ɖè àlè wu ènuwo keŋu.

¹³Mu ɖè àsi lè àmè jɔ̀jɔɛ kè wo sàa cã ŋuti ò, vɔ̀a e gbĩ ì lè nuvuɛ̃ si.

¹⁴E ɖiɖi yì kuwode kudo è eye mu ɖè àsi lè e ŋuti lè bablawo mè kaka sɔ na gà kè mè e sɔ àtikplɔ ku àcɛ̀kpàkpa ɖo àmè kèwo nyi yebe kplɔ̀tɔwo sãa jia na ɛ̀ ò. To ekèa mèa, e ɖè àjèɖàɖa ɖo ŋùkumè na yebe nyikɔ-gbletɔwo eye be sɔ gogo màvɔa na ɛ̀.

¹⁵To ekèa jia, dùkɔ̃ kɔ̀kɔɛa jɔ̀ so kɔ̀ta màɖo xaxa mè, jo lè dùkɔ̃ kè zĩna àmè ɖo ànyiwo si.

¹⁶E ɖo Tɔhonɔ̀ be sumɔvi ɖèka be èkla mè eye e kpe àkɔ ku èfìɔ sɛ̃ŋuwo to ŋùdãdɔ ku àmlìmànuwo ji.

¹⁷E tufɛ̃ na àmè kɔ̀kɔɛwo ɖo woabe èdɔ sɛ̃ŋuwo ŋuti, e kplɔ̀ wo to èmɔ ŋùdãtɔ̀ ɖe ji eye e nyi wlape na wo lè ŋùkèkè, wetrivi kɛ̃klɛ̃ lè èzãa mè.

¹⁸E na wo sò plãŋùpòfɛ̃ be àpùa ku àfɔ̀, e kplɔ̀ wo to èsì wɔ̀ gũwo mè.

¹⁹Vɔ̀a e nyrɔ̃ woabe kɛ̃tɔwo ya; e yomèa, e tru wo so ègũa mè ɖo àpùa ta.

²⁰Ye ŋutia, àmè jɔ̀jɔɛwo xlà àmè kpòtoewo ɖo. Wo pò mlã àpo nyikɔ kɔ̀kɔɛ gãa, Tɔhonɔ̀. Ɖo èdua, wo mlã àpo àlɔ̀ kè hlùɛ̃ wo gãa.

²¹Ɖo ànyasã hũ ènu na àmumuiwo eye e tu èkà àɖe na vifɛ̃wo.