Read gen Ànyasã 11 Bible Online

Ànyasã 11 - gen bible

Ànyasã 11

¹E na woabe èdɔwo zɔ̃ sù to gblɔ̃ɖɛtɔ kɔ̀kɔɛ ɖe ji.

²Wo zɔ̃ to zògbè pupuiwo ji va yì, eye wo tù woabe àgbàdowo ɖo tèpe kèwo àgbètɔ mu nɔ̀ kpɔ ò;

³wo sitè ɖo woabe kɛ̃tɔwo ŋuti eye wo nyà woabe crìtɔwo jo.

⁴Kè sìkɔ tì woa, wo fã yɔ wò, eye àkpã lɔbɔɛ ɖe na wo èsì, èkpe sɛ̃sɛ̃a ɖè sìkɔ tìtia jo na wo.

⁵Nène ye ènu kè nyi ètodɔ̃ na woabe kɛ̃tɔwoa trɔ zũ ɖàgbè na wo ya lè woabe ènuxàxa mè.

⁶Lè ètɔ̀ be èsì sàsra caka ku èhũ kudo bàba be tèpe,

⁷sìgbè ètodɔ̃ ɖo ɖèviwo be cɔ̃crɔ̃ ŋutia, wò na èsi sùsui tɔ̀ wòwo ya, lè mànya mè.

⁸Wò ɖè fiɔ wo to sìkɔ kè tì woa mè lekè wò dɔ̃ èto na woabe crìtɔwo ɖoa.

⁹Nyàwo, to tètèkpɔ kèa jia, kè ètohɛ̃hɛ̃ kpɔɖoemètɔ̀ kpe wo cã, wo va nya vevesèse kèwo àmè kpòtoewo sè to kòjoɖoɖo lè àdɔ̀mèze mèa ji.

¹⁰Lè tɔ̀ wòwo tɔ̀ gomèa, wò tè wo kpɔ sìgbè èvitɔ kè le na ètoklã nène, vɔ̀a woawo ŋutɔ ya, wò biɔ wo àkɔ̃ŋùta sìgbè èfìɔ àkpɛ̃nyɛtɔ kè le gblehùɛa nène.

¹¹Lè àzɔ̀ge ku kpòepea, wo kpɔ̀tɔ̀ le ɖù àyà ɖèka ŋùmè.

¹²Nènea ye ènuxàxa èvè kpe wo ku hũɖèɖe lè èsɔ kè va yìa ŋuti,

¹³ɖo kè wo va sè be to yèwo be ètodɔ̃ jia, àmè ɖewo kpɔ ɖàgbèa, wo sè e gɔ̃mè be Tɔhonɔ̀ ye.

¹⁴Àmè kè wo crì sã xoxo sɔ dã ŋùgbe, e yomèa wo ɖè àlɔmè lè e ŋuti, sɔ nyàa; le do ŋɔji na wo lè ènyà jɔ̀jɔwo mè, ɖo wo kpefũ lè sìkɔtìamè kè tovò na àmè jɔ̀jɔɛwotɔ̀a mè.

¹⁵Eye e hàɖo woabe susu sùkunɔ̀tɔ̀ kèwo woabe màjɔ̀màjɔ sɔ ɖo ètamè na woa ŋutia, kèwo na wo trã èmɔ kaka yì sɛ̃ èlã be kpetata màɖo susuwo ku èlã nyɔŋuwo, wò dɔ̃ èlãklivi màmɔ̀dò nawo fuu ɖoɖa sìgbè ètodɔ̃dɔ̃ nène.

¹⁶Wo la nya ɛ̀ be wo xɔ̀nà ètodɔ̃ so fikè wo wɔ̀ èvuɛ̃ lèa.

¹⁷Mu nyi èdɔ ɖe be nyi na àpo àlɔ̀ sɛ̃ŋu, kè wò sɔ ɖo xixea to ènu mà ɖo nɔ̀nɔmè ɖe mèa ne bèa ɖo sisiblìsi ku jãŋùta trɛ̃nu gbogbo ɖe ɖoɖa wo ò,

¹⁸àlo ne èlã jiŋɔ kèwo la ɖɔ ku àdɔ̀mèze eye wo la nɔ tu èzò hɛ̀hɛ̀ ku àzìzɔ caka àfi àɖitɔ̀, àlo la nɔ dà bìɖà be èzòkɛ̃klɛ̃ jiŋɔwo ɖoɖa.

¹⁹Mu nyi woabe àdãwɔ̀wɔ kpò teŋu crɔ̃ àmèawo ha ɖèka ò, vɔ̀a woabe kpɔkpɔ ɖèɖe sù la crɔ̃ wo ŋɔjitɔ̀.

²⁰Wu ekèa, ne èlã kèawo mu lè ŋutɔ cã òa, àyapuplu ɖèka sù la pu wo ànyi, wò la ɖè wo ɖonu to jɔ̀jɔɛsòso ji eye wo la kãkã hlɛ̃ to àpo hɔ̃hlɔ̃ be àyapuplu ji, vɔ̀a èwò ya, wò sɔ ènuwo keŋu ɖotè ku jije, hɛ̃hlɛ̃ kudo kpɛ̃kpɛ̃.

²¹Àpo ŋusɛ̃ gã ŋutɔa lè àlɔ̀sɔpe na wò tɛ̀gbɛ̀ eye àmè kɛ la teŋu kpe àkɔ ku àpo àbɔa be ŋusɛ̃ ò?

²²Ɛ̃ɛ, xixe bliboa lè ŋùkɔ̀ na wò sìgbè ènudàkpe kpɔ̀tɛ kè wo ɖè lè ènudamɔa jia nène, sìgbe fɔ̃fɔ̃mè be àhũ jàja ɖèka kè kɔ̀ ɖo ànyigbãa nène.

²³Vɔ̀a èwò ya, wò kuna ŋuzĩzĩ na àmèwo kpata, ɖo wò kpena ènuwo keŋu ji, eye wò ɖènà ŋùkuwo jo lè àgbètɔwo be nuvuɛ̃ ji ne wòa hùã wo be woa trɔ èjìmè.

²⁴Wò lɔ̃nà ènu kèwo keŋu lèa eye wò mu crì àpo ènuɖoɖo ɖekpe ò, ɖo ne wò crì woa dòmètɔ ɖea, wò mu la kè ɖo è ò.

²⁵Eye leke wɔ̀ ènuɖoɖo ɖekpekpe la kè nɔ̀ ànyi tɛ̀gbɛ̀, ne wò mu jro ò, àlo la teŋu likè ne mu nyi èwò ye yɔ ɛ̀ ò?

²⁶Wò cina siayi ɖo woa kpata ŋuti, ɖo wo nyi tɔ̀ wò, èwò Àpetɔ kè lɔ̃ àgbèa.