Read gen Ànyasã 12 Bible Online

Ànyasã 12 - gen bible

Ànyasã 12

¹Eye àpo gbɔ̃gbɔ̃ màgble gbèɖea lè ènuɖoɖowo keŋu mè.

²Yeŋti wò dɔ̃nà èto na àgɔ̀jètɔwo ɖɔ̀ɖɔ̀ɖɔ̀. Wò sìanà wo to woabe èvuɛ̃ be ɖèɖèfiɔ ji, àleke be woa ɖè àsi lè vuɛ̃ ŋuti ne woa xɔ̀ ji wò sè, Tɔhonɔ̀.

³E lè nène na àpo ànyigbã kɔ̀kɔɛa jinɔ̀tɔ xoxoawo,

⁴kèwo ŋuti wò kpɔ jìku ɖoa, ɖo woabe èkɔ̀nyìnyi màjègàwo ŋuti: èbo ku àze wɔ̀wɔ kudo kɔ̀nu dàdawo,

⁵ɖèviwo be cɔ̃crɔ̃ èhlɔ̃tɔ̀, àmè be èlã ku ehũ be èkplɔ̃ ɖoɖowo, fikè wo ɖùnà àdɔ̀mènuwo ŋutɔ cã lè; nɔ̀vi kèawo ŋutɔ kè wo sòdo lè èkɔ̀nu wɔ̀wɔ be àgbãa nua,

⁶wò jro la crɔ̃ àjìtɔ kèwo wùnà woabe èviwo màkpɔ xɔ̀namètɔ ɖea, to mia tɔgbewo be àlɔ̀ mè,

⁷àleke be ànyigbã kè xɔ̀ àsì na wò wu lè kpɔ̀tɛawo dòmèa, bèa xɔ̀ Mawu be èviwo be dùkɔ̃ ɖinyi kè jèa.

⁸Co gãkea, àmè ŋuawo cã, wò wɔ̀ ŋùkumè blɔ̀kɔ̀ na wo ɖo àgbètɔ be èvi kè wo nyia ŋuti eye, sìgbè àpo àhùakɔ̃a be èdùsitɔ xɔ̀ ŋùkɔ̀wo nènea, wò dɔ̃ àdãgbãwo ne woa crɔ̃ wo vivivi.

⁹Nyàwoa, wò teŋu sɔ àmè kpòtoewo do àsi na àmè jɔ̀jɔɛwo lè àvũ dɛ̃drɛ̃ ɖe mè, àlo bòhũ la crɔ̃ wo ha ɖèka, to ègbemèlã jiŋɔwo ji àlo to ègbèɖèɖe sɛ̃ŋu ɖe ji.

¹⁰Vɔ̀a ne wò le sò kòjo vivivia, wò le na wo èmɔnu ne woa trɔ èjìmè, vɔ̀ gãkea mu nyi be wò mu nya be jɔ̀jɔmè vuɛ̃ ku ènudrã wɔ̀wɔ jɔ̀ ɖodu ku wo ò; eye woabe ètamè susu mu la trɔ gbèɖe ò.

¹¹Ɖoa kpɛ̃sɛ̃ pò wo so jɔ̀jɔmè ke. Mu nyi be wò le vɔ̃ àmè ɖe ŋuti ye wò gbe èto dɔ̃dɔ̃ na wo ɖo ò.

¹²Ye ŋutia, àmè kɛ ŋutɔ gɔ̃ la gblɔ̃ be: Nukɛ wò wɔ̀ kèa ò? Àmè kɛ la sitè ɖo àpo kòjosòso ŋuti ò? Àmè kɛ la kplɔ̀ wò yì kòjo mè ɖo wò crɔ̃ dùkɔ̃ kèwo wò ŋutɔ wò ɖo ò? Àmè kɛ la va sɔ ènyà ɖo ŋuti wò be wò crɔ̃ ènugbletɔwo ò?

¹³Mawu ɖekpe mu lè to vò lè ŋuti wò kè lenabè na ènuwo kpata, kè ye wò ɖo la ɖè fiɔ be yè mu sò ènyà gɔ̃glɔ̃ ò.

¹⁴Nèneake èfìɔ àlo àpetɔ ɖekpe cã, mu lè kè la teŋu viɔ̃ ènu wò la sɔ xɔ̀ ènyà ɖo àmè kpòtoewo ta ò.

¹⁵Kè wò nyi àmè jɔ̀jɔɛa, wò le kpàcɛ̀ na xixe kplògòdòa ku jɔ̀jɔɛnyinyi, eye èhùɛ gbledo àmè kè mu jè na ètodɔ̃ òa, sitè ɖo àpo hɔ̃hlɔ̃a ŋuti.

¹⁶Ɖo àpo ŋusɛ̃a jɔ̀ so àpo jɔ̀jɔɛnyinyia mè, eye kè wò ɖù ènuwo kpata jia, wò kplɔ̀nà wo ku àdɔ̀mèfàa.

¹⁷Wò ɖènà ŋusɛ̃ wòa fiɔ, àmè kè be àcɛ̀ ɖɔɖɔa ŋuti àɖìkàdodo lè, eye e titɔna àglajèje na àmè ŋuawo ŋutɔ kèwo nya àcɛ̀ kèa.

¹⁸Vɔ̀a wò ɖù ŋusɛ̃ wòa ji, wò ɖona kòjo ku kãkãɖoji, eye wò kpànà àcɛ̀ na mi ku ŋùkumè blɔ̀kɔ̀ wɔ̀wɔ fuu. Ŋusɛ̃ wòa, lè àlɔ̀sɔpe na wò, sɔ wɔ̀nà ènu kè wò jroa.

¹⁹Ne wò le wɔ̀ nènea Tɔhonɔ̀, wò le kpla àpo dùkɔ̃a be àmè jɔ̀jɔɛa ɖo la lɔ̃ àmèwo. Wò ɖɔ èvi wòwo ku ŋùɖo ɖo wò na wo sè veve ɖo woabe nuvuɛ̃wo ta.

²⁰Ne ku àdòdò sùgbɔ ye wò dɔ̃to na èvi wò kèwo jɔ̀ na èkua be kɛ̃tɔwo, wò na wo gàmè ne woa teŋu trɔ lè èvuɛ̃ yomè.

²¹Co wò ɖo kòjo na èvi wòwo ku ŋùkuvi lele ɖo ènu ŋuti tɔ̀xɛ, kè wò wɔ̀ ènyà lekpɔ ku zòɖùɖu kudo woa tɔwo, gbà fìã àjɔ̀gbè nyuɛ̃wo na wo.

²²Nènea ye ne wòa kpla mia, wò pò miabe kɛ̃tɔwo ku àlɔ̀ blɔ̀kɔ̀ ne mia teŋu ɖoŋù àpo àdɔ̀mènyuɛ̃a ji lè miabe kòjosòso mè; eye mia gbà kã ɖo àpo ŋuzĩzĩkukua ji ne wò le ɖo kòjo ku mia.

²³Ye ŋutia àmè kèwo le zã àgbè bàɖa lè woabe hɔ̃vijɔ̀jɔ mèa, wò do àyà na wo to woa ŋutɔwo be àfɛ̃nuwɔ̀wɔwo mè.

²⁴Lè eŋua mèa, wo le dã lè woabe èmɔ tãtrãwo mè boo, sɔ èlã kèwo nyrã ku nyɔŋuwo sìgbè ènu sɛ̃sɛ̃wo nène eye wo flùnà woa ɖokoe sìgbè ɖèvi vifɛ̃wo kpò nène.

²⁵Eŋua, sìgbè ɖèvi mà ɖo susuwo nènea, wò sɔ ètodɔ̃ ɖoɖa wo sɔ ɖìgbɔ wo.

²⁶Vɔ̀a àmè kèwo mu sè ètodɔ̃ ɖèvitɔ̀ kèawo gɔ̃mè òa, la xɔ̀ Mawu be jɔ̀jɔɛsòsoa ɖɔɖɔ.

²⁷Ɖo ekèa ŋutia, kòjo ɖoɖo kè le gblehùɛ do woa, trɔ jè woa ji. Èlã kèawo le do àyà na wo, eye wo le sè veve ɖo woa ŋuti. Èlã kèwo wo sɔ wɔ̀ ènu sɛ̃sɛ̃awo ye le dɔ̃to na wo. Eye wo va sè e gɔ̃mè be àmè kè yèwo gbe sãa, ye nyi Mawu ŋutɔ ŋutɔa.