Read gen Ànyasã 13 Bible Online

Ànyasã 13 - gen bible

Ànyasã 13

¹Hɔ̃vi ɖɔɖɔ ye nyi àmè kèwo kpata, mu nya Mawu òa. Woabe ŋùkuwo le kpɔ ènu co, wo mu nya àmɛ̀ kè nyi Ɖotɔa kaka la nya ènu kèwo wo le kpɔa be wɔ̀tɔa ò.

²Vɔ̀a èzo, àya pòpo àlo àya bɛɖɛ ɖe, ènu kɛ̃klɛ̃wo àlo èsì wɔ̀adãwo, àlo dɔ̃ŋùkusu ku wètria, le nyi ènu sɛ̃sɛ̃ na wo.

³Ne e nyi be woabe nyɔnyɔa gbã ŋùku na wo gà kè mè wo sɔ wo sìgbè ŋusɛ̃tɔwo nènea, wo ne nya wu nènè ènu kèawo be Ɖotɔa wu gã wo, ɖoa àmè kè nyi nyɔnyɔ be jɔ̀sopea ye ɖo wo.

⁴Ne e nyi be woabe hɔ̃hlɔ̃ ku woabe dɔwɔ̀ŋusɛ̃ dãŋù do woa, wo ne nya kpò be, to ènu kèawo mèa, woabe wɔ̀tɔa ɖo hɔ̃hlɔ̃ sɔ wu.

⁵Ɖo ènu ɖoɖowo be gãnyinyi ku woabe àcɔɖoɖo kplɔ̀nà àmè be, sɔ to sɔ̃lìdodo jia, woa glò Ɖotɔa kpɔ.

⁶Co gãke hùɛdodo viɖe kpò àmè kèawo jè na: ta mu nyɔ òa, trã wo le trã kpò lè èmɔ kè wo sɔ le ji Mawua ji, kudo èjro kè wo ɖo la kè ɖo e ŋutia.

⁷Ke wo ɖiɖi ɖo yebe àlɔ̀nudɔwo mèa, wo kã wo kpɔ, eye wo nya kpɔ lè ŋùkuta, ɖo xixea be ènuwo ɖɔ ku fɛwu.

⁸Vɔ̀ gãkea, woawo cã be tàflacɛdodo mu teŋu sɔ̀gbè kaka ò.

⁹Ne wo va nyi ènunyatɔ susui kaka be wo teŋu ŋɔjè ènuwo be zɔ̃zɔ̃ sui mèa, leke wɔ̀ ye wo mu la kè ɖo ènu kèawo be Ɖotɔa ŋuti jè ŋùkɔ̀ ò?

¹⁰Vɔ̀a bàbà na àmè kèwo sɔ woabe ŋùɖo dà ɖo ènu kèwo mè àgbè mu lè òa ji, wo yɔ àlɔ̀nudɔwo ènusɛ̃sɛ̃, sìka ku klòsalò cã, kèwo ŋuti wo trɔ àsi lè ku àɖàŋù, eye wo ɖo ŋutilãmènuwo be nɔ̀nɔmè àlo èkpe gbalo kè ŋuti wo trɔ àsi lè so blèmà mè ke.

¹¹Sìgbè àtikpàtɔ ŋua cã ke sò àti kè be dodro lè bɔ̀bɔɛa nène. E plɔ àkpàa keŋu ku àɖàŋù, e wɔ̀ èdɔ kè jèa lè e ŋuti eye e kpànà èdɔwɔ̀nu lè àgbèa mè.

¹²Àti kèwo kpɔ̀tɔ̀a, e sɔna wo do èzò, sɔ ɖànà ènuɖùɖu eye e ɖùnà ɖɔnapò.

¹³Lè àtiawo dòmèa, ɖèka ɖe lè kè mu zã ò, eye mu nyɔ cã na ènu ɖe ò, ɖo e glɔ̃ eye be ɖo èkã kpata kpata. Àtikpàtɔa sɔ ɛ̀, nɔ̀ ànyi ɖo e ŋuti sɔ jɔ̀ àmè be nɔ̀nɔmè

¹⁴àlo wɔ̀ ɛ̀ be ɖì èlã nyɔŋu ɖe, e yomèa, e lè àŋɔ̀ na ɛ̀, sì àŋɔ̀ jɛ̃ hɛ̀ ɖe ɖo e ŋuti, sɔ le wla yebe èɖiwo kpata.

¹⁵E jrà nɔ̀pe jè ŋùmè ɖe na ɛ̀, eye e sɔ ɛ̀ ka ɖo èglì ŋuti ku plɛ̃ŋugò.

¹⁶E ka ɛ̀ nyuɛ̃ɖe ne mu gbà va gɛ̃ ò, ɖo e nya be mu ɖo èmɔnu sɔ do àlɔ̀ ye ɖokoe ò. Ènu kpàkpa ɖe ke hiã àlɔ̀doa ye be nyi.

¹⁷Vɔ̀a gà kè mè e la fãkue ɖo àdɔ̀kùnuwo, èsrɔ̃ɖèɖe ku èviwo be taa, mu wɔ̀nà ŋùkpɛ̃ na ɛ̀ be yèa trɔ ɖoɖa àtikpàkpa kèa gbɔ ò. E biɔna lãmèsɛ̃ so ègã mà nɔ̀ àmè ŋutitɔa si,

¹⁸na àgbèa, e blìbɔ̀nà na ènu kuku; na hlùɛ̃gãa, e lena àfɔ̀ na ènu kè mu teŋu hlùɛ̃ òa; na èmɔ zɔ̃zɔ̃a, e kpɔna èmɔ na ènu kè mu teŋu ɖè àfɔ̀ ɖèka tètè ò;

¹⁹eye ɖo ye ɖokoe ji kpɔkpɔ, èdɔ ku àlɔ̀nudɔwo be jijèje nyuɛ̃a, e biɔna àlɔ̀do so àlɔ̀ gbɔjɔwo simè.