Read gen Ànyasã 14 Bible Online

Ànyasã 14 - gen bible

Ànyasã 14

¹Àmè bu cã kè le ji la ɖè èhũ jè èmɔ sɔ kpe àsrɔ̀ke sɛ̃sɛ̃woa, le fã yɔ àtikpàkpa kè ŋɔ fofoe wu àpùjihũ kè mè be lèa.

²Ɖo ekèa ya, ècikpɔkpɔ be susu ŋuti ye wo wɔ̀ yebe àɖàŋù ɖo eye wo wɔ̀ ɛ̀ to ànyasã àɖàŋùtɔ̀a ji.

³Vɔ̀a, oò Àta, àpo àmètakpɔkpɔ ye hɛ̃na èhũɖotia. Èwò ye ta èmɔ lè àpùa ji, èmɔviwo to àsrɔ̀keawo dòmè,

⁴sɔ ɖè fiɔ to ekèa mè be èwò ye teŋu hluɛ̃ àmè gã lè àfɔ̀ku ɖekpekpe si, ne wo yì àpù ji mànya ènu ɖekpe so e ŋuti ŋutɔ cã.

⁵Wò mu jro be èdɔ kèwo yè wɔ̀ to ànyasã jia, bèa nyi ènu gbalo ò, ekèa ŋuti ye àgbètɔwo sɔ woabe àgbèa do àsi na àti vikpɔ̃tɔ̃ɛ ɖe eye wo va teŋu sò àpù kè le gbã gbòo, lè àklo ɖe mè, gã lè àfɔ̀ku ɖekpekpe simè.

⁶Nènea, so gɔ̃mèjèjea, wàlɛbɛ kè àmèjɔàsu ègòyitɔwo le crɔ̃a, xixea be ŋùɖo si bè ɖo àklo ɖe mè, eye kè àpo àlɔ̀ jɔ̀ èmɔ na ɛ̀a, e hlùɛ̃ vi jɔ̀ vi sɔ ɖo ènuku ɖɛ na èsɔ̀mè.

⁷Ɖagbe ɖì àti kè trɔ jɔ̀jɔɛnyinyi be èdɔwɔ̀nua ŋuti!

⁸Vɔ̀a helu na legba ŋua, e ye kudo yebe wɔ̀tɔa; àmè kèa ya ɖo e ye wɔ̀ ɛ̀, eye e ya, ènu nyɔŋu ŋua ya, ɖo wo yɔ yebe nyikɔ be ŋusɛ̃tɔ.

⁹Ɖo ènu kè ŋutia, Mawu crìnà àmè kè wɔ̀ ɛ̀a ku yebe àlɔ̀nudɔa ɖodu,

¹⁰eye àlɔ̀nudɔa ku èdɔwɔ̀tɔa, la xɔ ètodɔ̃ ɖodu.

¹¹Ɛ̃ɛ, Mawu la sitè ɖo màxɔ̀sètɔ be vòduwo ŋuti, ɖo wo va nyi ènu nyɔŋuwo lè Mawu be ènu ɖoɖowo dòmè, àfɔ̀klɛ̃nu na àmèwo, èmɔ̀ tetre ɖe lè bòmècitɔwo be àfɔ̀wo gɔ̃mè.

¹²Àmèwo be ègbèji mànɔ na Mawua, jè e gɔ̃mè wàlɛbɛ kè wo ɖè sùsu sɔ wɔ̀ legbaviwo. Ekèa be wɔ̀wɔa hɛ̃ àgbèa be gbegble va.

¹³Wo mu nɔ ànyi lè gɔ̃mèjejea ò eye wo mu la nɔ̀ ànyi cã kaka sɔ yì ò.

¹⁴Kùɖo àgbètɔwo be ànyakoko ŋuti ye wo gɛ̃ ɖo xixea mè ɖo, ye ŋutia woabe nuwùwu lè sɔ̀sɔɛɖe.

¹⁵Ku veve lè àkɔ ji èfũ lòlo va zɛ̃ àxuea, àjìtɔ na wo jɔ̀ èvia kè kpàtàa be àtikpàkpa ɖèka, eye ènu kè le nyi àgbètɔ be ŋutilãkuku nyìsɔ̀ɖea, fifìa e la do bùbu e ŋuti sìgbè vòdu nène, eye e la sɔ àmlìmànuwo ku èkɔ̀nuwo gble dà ɖɛ na ye tɔ̀wo.

¹⁶E yomèa, ne àzãwo va le yìa, èkɔ̀nu gbegble kèa la kpɔ ŋusɛ̃ ye wo la wɔ ɖo e ji sìgbè èse nène. Nèneake cã, sɔ zɔ̃ ɖo èfìɔgãwo be ègbèɖèɖe jia, àtikpàkpawo trɔ zũ vòdu kè wo sɛ̃nàa.

¹⁷Kè e nyi be wo mu la teŋu do bùbu àmè kèawo ŋuti lè woabe ŋùkumè ò, ɖo dìdipe kè wo lèa ŋutia, wo gbìgbɔ̀ jɔ̀ woabe ŋùmè kè le ze so àzɔ̀gea, eye wo la ta èfìɔ be nɔ̀nɔmè le ze glãlãa sɔ do bùbu e ŋuti, àleke be woa gbà klù ètomè na èfìɔ kè mu lè òa sìgbè e lè nène.

¹⁸Lè àmè kèwo mu jèsi ì òa gbɔ ŋutɔ cã, sɛ̃sɛ̃ ŋua kèkè èta to àtikpàkpa-wɔ̀tɔ be jojro veku vekua ji.

¹⁹Àmè kèa, kè le ji be yèa jè ŋùmè na yè petɔ gloa, la gbà ɖo àcɔ na yebe àɖàŋùdɔa veveɖe, ne bèa nya kpɔ wu lekè be lèa.

²⁰Gà ŋua mèa, èdɔa be nyɔnyɔ flù àmèha, eye àgbètɔ kè ŋuti wo dona bùbu sã va yìa, va trɔ ènu sɛ̃sɛ̃.

²¹Nènea àmèwo be àgbèa trɔ àfɔ̀klɛ̃nu be to gbledo ku àmèji zĩzĩ mèa wo sɔ nyikɔ kè nyi Mawu ɖèka pɛ tɔ̀ sɔ na àti kudo èkpewo.

²²Klua ŋutɔ cã, mu sù na wo be woa nɔ flù lè Mawu be nyanya mè ò, vɔ̀a kè wo lè àgbè lè àvũdɛ̃drɛ̃ gã kè ènumànya hɛ̃nà vana mèa, wo xà sɔ nyikɔ na gbèsìvuɛ̃ ŋua be ŋutifafa.

²³Ku woabe ɖèviwùwu be kɔ̀nu wɔ̀wɔa, woabe bèbemè be àmlìmànuwoa àlo woabe àzãɖùzɔ̃lì àdãwɔ̀tɔ̀wo lè kɔ̀ ɖo càkàcakawo ji,

²⁴wo mu gbà le na sisi àgbè cã, èsrɔ̃ɖèɖe kɔ̀kɔɛ ceŋu ceŋu cã ò, vɔ̀a àmè leke ɖe la crɔ̃ àmè bu sàkplɛsàtɔ àlo do na ɛ̀ ŋuzĩzĩmè to àhasì ji fàa.

²⁵Ènuwo kpata caka: èhũ ku èhlɔ̃dãdã, èfĩfìfi ku àmèbèble, èzãnuɖùɖu, ànùkuamàwɔ, hunyahũnyãwo, ènutàta ɖo àjè ji,

²⁶àmènyuɛ̃wo be yomètĩtĩ, àkpemàdo-màdo, èklawo be èɖilɔlɔ, àmèzãzã màsɔ̀gbe ɖo jɔ̀jɔmè ji, èsrɔ̃ɖèɖe màsɔ̀gbè, àhasì ku ŋùkpɛ̃màɖonuwɔ̀wɔ.

²⁷Ɖo vòduwo sɛ̃sɛ̃ nyi èvuɛ̃ be gɔ̃mèjèje. Ekèa ke ye gbà nyi èkusɛ̃sɛ̃a.

²⁸Àmè kèwo le sɛ̃ vòdu kèawo, cakana kaka vòdu pònà wo. Wo gblɔ̃nà àjè be ènyàwo, àlo wo nɔ̀nà àgbè lè màjɔ̀màjɔ mè àlo wo tànà ènu ɖo àjè ji zè ɖèka kplà.

²⁹Kè e nyi be wo sɔ woabe jìdo ɖo vòdu màɖo àgbè jia, wo kãɖoe ji be lè yèwo be ènutàta ɖo àjè jia yomèa, yèwo mu la va kpe àfɔ̀ku ɖekpe ò.

³⁰Vɔ̀a ètodɔ̃ èvè ye la va pò wo, ɖo wo flù woa ɖokoe sɔ so Mawu ŋuti sɔ pudù yì vòduwo gbɔ, eye wo wɔ̀ ènutàta ɖo àjè ji ku àmèflùnu lè kɔ̀kɔɛnyinyi be cìcri mè.

³¹Mu nyi ènu kèwo wo sɔ ɖù ɖase be hɔ̃hlɔ̃ ye ò, vɔ̀a jɔ̀jɔɛsòso kè sinatè ɖo nuvuɛ̃wɔ̀tɔwo ŋutia, ye ke sònà ènyà tɛ̀gbɛ̀ na àgɔ̀jètɔwo ɖo èse ji dàda ŋuti.