Read gen Ànyasã 15 Bible Online

Ànyasã 15 - gen bible

Ànyasã 15

¹Vɔ̀ èwò ya, miabe Mawu, wò nyi àmènyuɛ̃ ku ànùkuamɛ, wò hɛ̃nà àdòdò eye wò kpàcɛ̀ na xixemènuwo kpata ku xòmèfalɔ̃lɔ̃.

²Ne mi wɔ̀ nuvuɛ̃ cã, mi kpɔ̀tɔ̀ le nyi tɔ̀ wò, ɖo mi hũnà àpo ètatɔ-nyinyia mè, vɔ̀a mi mu la wɔ̀ nuvuɛ̃ ò, nya kpò mi nya be wo xlɛ̃ mi sìgbè tɔ̀ wòwo nène.

³Àmè kè wò nyia be nyanya kplɔ̀nà àmè yìnà jɔ̀jɔɛnyinyi bliboa gbɔ eye àpo ètatɔ-nyinyia kplɔ̀ àmè yì àgbè màvɔ mè.

⁴Àgbètɔ be àɖàŋùdɔwo mu flù mi kaka yebe ènu tatawo la va trã mi ò. Ènu tata kèwo wo sìnà àmàdodo vòvòvòwo do blìbàa,

⁵ekè be kpɔkpɔa nyɔna bòmècitɔwo be fìɔŋui eye be nana wo jrona ènutàta kuku be ŋùkumè màhuãa.

⁶Àmè kèwo jɔ̀nà vòdu kèawo, ku àmè kèwo lɔ̃nà wo gbà sɛ̃nà woa, jè na èvuɛ̃. Eye wo jè la xɔ̀ yebe àjɔ̀ ɖɔɖɔ.

⁷Nèneake ye èzemètɔ ɖe nyànà ànyikɔ bɔtɔbɔtɔ eye e wɔ̀nà àxomè be ènuzãzãwo dòmètɔ ɖe sia ɖe. Ku èkɔ ŋua kea, e mènà èdɔwɔ̀nu kèwo lè na zãzã àdodoewo, èbuwo lè na ènuwɔ̀wɔ màɖèviwo: vɔ̀a kè la nyi èdɔwɔ̀nu kèawo dòmètɔ ɖe sia ɖe be zãzã koŋua, èzemètɔa ŋutɔ kpò ye la nya.

⁸E yomèa, e la jè èdɔ nyrãku ɖe gɔ̃mè, la sɔ ànyikɔ ŋua ke sɔ li vòdu àmèfùflutɔ̀ ɖe. Kè e tɔ̀ be ànyigbã mè e jɔ̀ soa, e la gbà trɔ yì ànyigbã kèa mè, wàlɛbɛ kè wo la xɔ̀ yebe èklaa.

⁹Sɔ wu be e la dèŋùgblè so yebe èku zãgbè ŋuti, kudo yebe àgbè be kpòkpoea, e le do àɖìkà ku sìka-dɔwɔ̀tɔwo ku klòsalò-srètɔwo, le srɔ̃ gàjɛ̃-dɔwɔ̀tɔwo, eye e le tùglo be yè wɔ̀nà àmèblènuwo.

¹⁰Yebe èjìa nyi èzòfi, yebe ŋùɖoa gbà ɖiɖi wu hũhũ eye yebe àgbè mu xɔ̀asì wu ànyikɔ ò.

¹¹Ɖoa e ŋlɔ̀be yebe ɖotɔa, àmè kè plu gbɔ̃gbɔ̃ ɖo e mè ye e trɔ èkla àgbèagbea.

¹²Lè yebe ŋùkumèa miabe àgbèa nyi ɖèvi be gbegble-nu, àgbènɔ̀nɔa nyi àlèjiji be àsì gãɖe. E gblɔ̃ be: E jè be woa ɖè àlè so ènu ɖekpekpe mè, so èvuɛ̃ mè ŋutɔ cã.

¹³Àmè ŋua kè sɔ ànyikɔa le wɔ̀ èze fàflawo ku vòduwoa, nya be yè le wɔ̀ èvuɛ̃.

¹⁴Vɔ̀a woa kpata nyi bòmècitɔwo gbidi gbà nyi èkla màɖo ètùwo, àpo dùkɔ̃a be kɛ̃tɔ ku èfũwɔ̀amètɔ ŋuawo.

¹⁵Wo sɔ dùkɔ̃wo be legbawo kpata wɔ̀ vòduwo, wo mu ɖo ŋùkuvi zãzã la kpɔ ènu ò, ku ŋɔ̀timèmɔ cã la sɔ gbɔ̃ àya ò, kudo àlɔ̀viwo la sɔ le ènuwo kpɔ ò, eye woabe àfɔ̀wo dã àzɔ̃lì zɔ̃zɔ̃.

¹⁶Ɖo àgbètɔ ye wɔ̀ wo, àmè kè wo wue gbɔ̃gbɔ̃a naa, kpò ye ɖo wo, gãkea àgbètɔ ɖekpe mu teŋu wɔ̀ vòdu ɖe kè la sɔ̀ ku ye ŋutɔ ɖokoe ò.

¹⁷Àmè jɔ̀neku kè be nyia, mu teŋu wɔ̀ ènu kudo yebe àsi vuɛ̃awo to vò na èdɔ kuku ò; sɔ kpea, e xɔ̀asì wu yebe sɛ̃sɛ̃ be ènu zãzãwo: e yaa, lè àgbè na gàmè viɖe kpò, vɔ̀a woa ya, wo mu la va kpɔ ɛ̀ gbèɖe ò.

¹⁸Eye wo gbà sɛ̃nà èlã nyɔŋuwo glo cã, lè sùkunɔ̀ jɔ̀jɔ be gblàmèa, wo nyrã wu woa kpata,

¹⁹eye ne wo kpɔ woa, wo mu fɔ̀nà nyɔnyɔa be ènu ɖeti kè teŋu blè àmè lè èlã buwo gbɔ ò. Wo ci nyikɔ kè Mawu la ɖè na wo ku yebe sìtua ŋuti.