Read gen Ànyasã 16 Bible Online

Ànyasã 16 - gen bible

Ànyasã 16

¹Ekèa ŋuti ye wo dɔ̃to na wo to èlã hati yàwo ɖo eye e nya jɔ, eye wonɔ ɖu àya to èlãklivi fuuwo ji.

²Lè ètodɔ̃ kèa tèpea, wò wɔ̀ ɖàgbè na àpo dùkɔ̃a: ne wòa ɖɔpò na ɛ̀ lè yebe àdɔ̀wùamè veku vekua mèa, àmèhɛ̃nu vivi ŋùɖãtɔ ɖe ye, tèkleviwo ye wò sɔ ɖo àkɔmè na ɛ̀.

³Ye ŋutia, àmè kèawo le hiã ènuɖùɖu vɔ̀a kè èlãklivi kèwo wo dɔ̃ ɖoɖa ɖo woa ŋutia le wɔ̀ àtãŋu na woa, àdɔ̀wù àmè keŋu vɔ̀ na wo, vɔ̀ bòhũa àmè ɖetɔawo, lè èkuɖìɖi vikpoeɖe yomèa, wo kpɔ ènu vivi ŋùɖãtɔ̀a sɔ ma.

⁴E jè be àmèjizĩtɔwo la kpɔ èkuɖìɖi ŋuzĩzĩmàkutɔ̀ ɖe la jè woa ji, e sù na àme ɖetɔawo kpò be woa kpɔ àlekè woabe kɛ̃tɔwo le ɖù àyà ɖoa.

⁵Ŋutɔ cã, gà kè mè èlã wɔ̀adãwo, lũ ɖo tɔ̀ wòwo ji, le crɔ̃ wo ku àɖi vevea, àpo àdɔ̀mèzea mu nɔ̀ ànyi kaka yì ò.

⁶Sɔ na wo ètoklãa, wò do vɔ̃vɔ̃ na wo na hùenu viɖe, vɔ̀a hlùɛ̃gã be àwòbanu ɖe lè woa si kè ɖoŋù àpo èsea be ègbèɖèɖe na wo gbɔ̀xue.

⁷Nyàwoa, àmè ɖekpekpe kè trɔ ye ɖokoe ɖoɖa jèsì kèa gbɔa, gãna; mu nyi ɖo yebe kpɔkpɔa ŋuti ò, vɔ̀a hàɖo ŋuti wò, èwò àmèwo kpata be Hlùɛ̃tɔa.

⁸Eye nènea wò ɖèfiɔ miabe kɛ̃tɔwo be èwò ye ɖènà àmè to lè èvuɛ̃ ɖekpekpe mè.

⁹Woa ya, wo crɔ̃ to hùesuvi ku tɔ̀bɔ̀su kèwo ɖù woa ji. Wo mu kpɔ àtikè ɖe sɔ hlùɛ̃ woabe àgbèa gã ò, ɖo wo jè ne woa xɔ̀ ètodɔ̃ to èlãklivi kèawo ji.

¹⁰Lè èvi wòwo tɔ̀ gomèa, èdã kèwo ɖo àɖia be àɖua ŋutɔ cã mu teŋu wɔ̀ ènu ɖekpe ò, ɖo àpo ŋuzĩzĩkukua kpe ɖo woa ŋuti eye e dà èdɔ̀ na wo.

¹¹Wo xɔ̀ èdãwo be àɖi-sìamèwo sɔ ɖo ŋùku àpo ènyàwo ji, vɔ̀a wo gã kaba, ne wo mu gbà ŋlɔ̀be gbiɖi, ne woa glo àpo àdɔ̀mènyuɛ̃ wɔ̀wɔ ò.

¹²Eye àmà àlo àtikè bèa va fa lãmè na wo ò, vɔ̀a àpo ènyà ye, oò Tɔhonɔ̀, e ya ye dànà èdɔ̀wo kpata.

¹³Èwò ye ɖo hɔ̃hlɔ̃ ɖo àgbè ku èku ji; èwò ye ɖiɖina àmè yìnà èkuwode, gbà ɖènà ɛ̀ to.

¹⁴Xà ɖo èkunyànyrã ŋutia àgbètɔ teŋu va wù àmè, vɔ̀a mu gbà teŋu trɔ sɔna gbɔ̃gbɔ̃ kè to joa, ɖo ye tèpe ò eye mu teŋu ɖènà èkla kè wo xɔ̀ ɖo èkuwode ò.

¹⁵Àmè ɖekpe mu teŋu si lè ŋùkɔ̀ na wò ò.

¹⁶Àmè kpòtoe kèwo gbe be yèwo mu la jèsi wò òa, àpo àbɔ kãmèsɛ̃tɔa pò wo ku àtãŋù: èjijàja ku èsìkpe wuwlui vlàvò, gbawɛ ŋuzĩzĩmàkutɔ̀wo ɖɔ̀go ɖo woa ŋuti, èzò fiɔ̃ wo.

¹⁷Ŋùɖãnu ɖe ŋutɔ ye nyi be lè èsì kè cina ènuwo keŋu mèa, èzòa be àdã le yì e ji kpe è, ɖo xixe kplògòdòa le pò àvũ ɖo àmè jɔ̀jɔɛwo ta.

¹⁸Seɖea èzòbìbi be ŋusɛ̃a ɖènà kpɔ̀tɔ̀ ne mu gbà fiɔ̃ èlãklivi kèwo wo dɔ̃ ɖoɖa ɖo àmè kpòtoeawo ŋuti ò, vɔ̀a ne to ekèa be kpɔkpɔ mèa, wo ne nya be Mawu be kòjo ɖe le tĩ yèwo yomè;

¹⁹seɖea, lè èsìa ŋutɔ be dòdòmèa, e bìnà sɔ wu èzò be hɔ̃hlɔ̃a ŋutɔ cã ne bèa gũ ànyigbã màjɔ̀ màjɔ kèa be kusɛ̃sɛ̃wo.

²⁰Lè ègo ɖea mèa, wò sɔ àtikplɔtɔwo be ènuɖùɖu na àpo dùkɔ̃a, so jiŋùkusia wò sɔ kpɔ̃nɔ kè wo jràɖo keŋua na ɛ̀ àgbàgba ɖe màjè, e nyi ènu kè ɖo àɖemèsèse ɖe sia ɖe eye e jè eji na vìvisèsewo kpata.

²¹Àmèhɛ̃nu kè wò naa, ɖè vivinyinyi ɖo èvi wòwo ŋuti fiɔ, eye e lɔ̃ ɖo e ɖùtɔa be èjro ji trɔ ye ɖokoe sɔ̀ ku àmè ɖe sia ɖe be jojro.

²²E ɖì èsìkpe àlo èsìwɔ gãke èzò mu teŋu srè ò, ne woa nya be kɛ̃tɔwo be nukuwo gũ to èzò kè le bì lè èsìkpe ji mèa ji eye e le dà bìɖàwo lè èjijàja mè.

²³Bòhũ ŋutɔ cã, ne bèa na àmè jɔ̀jɔɛwo ènuɖùɖua, e ŋlɔ̀be yebe hɔ̃hlɔ̃ kè nyi ye tɔ̀a cã.

²⁴Ènuɖoɖowo kpata, bɔ̀bɔ̀ta la sɔ sumɔ wò, èwò kè ɖo woa; wo le drɛ̃ gligã ne woa sɔ dɔ̃to na àmè màjɔ̀màjɔwo, vɔ̀a wo le tèbɔ̀ ne woa sɔ wɔ̀ nyuɛ̃ na àmè kèwo sɔ woa ɖokoe do àsi na wòa.

²⁵Nènea ye, ekè wo lètè na tɔtrɔ ɖekpekpea, wo sɔ̀gbè la wɔ̀ sumɔvi-dɔa na nunana kèa, kè so gbɔ wò eye e trɔ ènuɖùɖu blibo zɔ̃ ɖo àmè kèwo le biɔ ɛ̀a be èjro ji.

²⁶To ekèa mèa, àpo èvi kèwo wò ɖo lɔ̃lɔ̃ naa, oò Tɔhonɔ̀, wo va jèsi be mu nyi kusɛ̃sɛ̃wo be wɔ̀wɔ ye nyìnà àgbètɔ ò, vɔ̀ bòhũa àpo ènyà kè lena àmè kèwo xɔ̀ e ji sèa ɖo àgbèa ye.

²⁷Ènu kè ye èzò mu fiɔ̃na òa, srè kpò lè èwè be zɛ̃zɛ̃ kpoeɖe be zòzo nu,

²⁸ne woa nya be e jè be woa xɔ̀ ŋùkɔ̀ na èwè sɔ do àkpe na wò eye woa dogò wò lè èŋùa be kèke mè.

²⁹Àkpe màdotɔa be ŋùɖo la srè sìgbè èsìkpe wuwlui àfòmè tɔ̀ nène, e la srà va yì sìgbè èsì mànyɔ na zãzã nène.