Read gen Ànyasã 17 Bible Online

Ànyasã 17 - gen bible

Ànyasã 17

¹Àpo nuɖoɖowo lòlò eye woabe gɔ̃mèsèsea sɛ̃ŋu. Eŋua ŋuti ye èkla mànyanuwo trã èmɔ ɖo.

²Àmè kpòtoe kèwo ji be yèwoa ɖo àfɔ̀ dùkɔ̃ kɔ̀kɔɛa jia, va nyi vìvìti be gàmènɔ̀tɔwo ku èzã dìdi be àmèlewo, wo le ɖuku le ŋɛ̀ lè gàxɔ mè, wo nyà wo jo lè àmètakpɔkpɔ màvɔa mè.

³Ekè ne wo le susu be yèwo la bèta kudo yèwo be nuvuɛ̃ bèbèmètɔ̀awo, zɔ̃ ɖo ènuŋlɔ̀be be ènucɔ̃vɔ lìtìa ŋutia, wo kãkã wo lè vɔ̃vɔ̃ jiŋɔ ɖe mè, eye wo jo titɔ ku ŋùmènuiwo.

⁴Èdo kè mè wo bèta ɖoa, mu ɖè vɔ̃vɔ̃ jo lè woa mè klua ò; zĩgìdi jiŋɔwo le ɖì pòhla wo, eye wo le kpɔ ènukpekpe ci kpɔ̃wo ku ŋùkumè jiŋɔwo.

⁵Èzò hɛ̀hɛ̀ ɖekpekpe mu sù la na wo kɛ̃klɛ̃ ò, eye wètriviwo be kɔ̀kɔ klɛ̃ nyènyènyèa mu teŋu kɔ̀ èzã jiŋɔ ŋua ò.

⁶Ha ɖèka èzò bibi hɛ̀ ɖe, kè le èzò lè ye ɖokoe sinua, ze na wo. Eye e le do ŋɔji na wo trɔdo; ne àvìmènu kpɔkpɔa bu lè woabe ŋùkuwo mèa, èha lɔna wo, eye wo gblɔ̃nà be nukè ye wo kpɔ yà nyrã wu ŋutɔ cã.

⁷Kpajijea be àyèdɔwɔ̀nuwo mu ɖo hɔ̃hlɔ̃ ɖekpe ò eye yebe glojo-glojoe wɔ̀wɔa kpɔ ègofòfo ŋùkpɛ̃tɔ̀ ɖe.

⁸Àmè kèwo tri àkɔ be yèwo la nyà ŋɔjidodo ku tìtɔ̀titɔwo to lè èkla kè jè èdɔ̀a mèa, wo ŋutɔ jè vɔ̃vɔ̃ ɖì kòkoe be èdɔ̀.

⁹Eye ne nupodotɔ ɖekpe mu lè la sɔ do vɔ̃vɔ̃ na wo ŋutɔ cã òa, èlãkliviwo be vava yì ku èdãwo be àkuilìɔliɔa sù la sò àɖìka na wo:

¹⁰wo vɔ̃ kaka na àsi èku eye wo mu gbà ji la hũ ŋùku kpɔ vìvìti ŋua ŋutɔ cã kè nu wo mu la teŋu si lè ò.

¹¹Nyàwo, kunyànyrã ɖùnà ɖase so ye ŋutɔ be ènugbegblea ŋuti, eye e donahùɛ do ye ɖokoe; we sia wea, e sɔna kùxewo kpena ye ɖokoe ne jìjigbè le zĩ ìa.

¹²Ɖo vɔ̃vɔ̃a mu nyi ènu ɖe sɔ wu èkɔ̀ɖèɖe lè ètamè sùsu be àlɔ̀dowo ŋuti ò.

¹³Ne àmè mu ɖonaŋù àlɔ̀do kèa lè ye ɖokoe mè òa, nènemɛa mu nyana fikè tìtɔ̀titɔa cã le so na ɛ̀ ò.

¹⁴Vɔ̀a woa ya, lè èzã jiŋɔ ŋua, kè to so èkuwode mè, lè àlɔ̃ dɔ̃dɔ̃ ŋua mèa,

¹⁵wo kpɔ ŋuãlì jiŋɔwo le tĩ woa yomè eye woabe èkla jo àgɔ̀a, kplibɔ wo; ɖoa, vɔ̃vɔ̃ ɖe jè woa ji kpàtà.

¹⁶Nèneake àmè kèwo nɔ̀ funua, jè ànyi eye wo ci ègàxɔ màɖo kɔ̀cikɔ̀cia mè.

¹⁷Àgblèdàtɔ, èlãnyìtɔ, èdɔ klìkãwɔ̀tɔ lè zògbè ji, àmè sia àmè ji ènu kèa jè lè àvò mè, mà teŋu si lè e nu;

¹⁸ɖoa woa kpata, vìvìti be kɔ̀sɔ̀kɔsɔ ɖèka ŋùkumè ye bla wo. Àya be pòpoa, xèviwo be èhà liloe liloe lè àti be àlɔ̀zɛ̃ vùdùwo mè, èsì kè le srà ku àdã be zigìdia,

¹⁹èkpe kèwo le mlì còo be gbogbo, èlã kèwo le tìkpoa be èdùlɔlɔ màzemàzea, ègbemèlãwo be wowo àlo ègbè gbìgbɔ̀ ɖì trɔ so ètowo be tòtro mè, ènu kèawo keŋu be èhalɔàmè le tɛ wo ɖo ànyi ku vɔ̃vɔ̃.

²⁰Ɖo xixe bliboa le kɔ̀ ku kɛ̃klɛ̃ nyènyènyè eye e le yì yebe èdɔwo ji bɔ̀kɔ̀.

²¹Àmè ŋuawo ɖèɖe ji kpò ye èzã cricri ɖe vlũ ɖo, vìvìti kèwo la va xɔ̀ woa be sɔ̃lì. Vɔ̀a woawo ŋutɔ wo nyi àgbã kè le kpɛ̃ wo sɔ wu vìvìtiawo.