Read gen Ànyasã 18 Bible Online

Ànyasã 18 - gen bible

Ànyasã 18

¹Bòhũa, kɛ̃klɛ̃ gãaɖe nɔ̀ ànyi na àpo àmè kɔ̀kɔɛwo eye àmè ɖetɔawo sè woabe ègbè vɔ̀a wo mu le kpɔ woabe àmètiawo ò; wo ɖè gblɔ̃ be woawo tɔ̀ nyɔ be wo mu le kpefũ kèa ò,

²wo le do àkpe na wo be wo mu gbà ji la ɖo èvuɛ̃ kèwo yèwo wɔ̀ ku woa tèpe ò eye wo biɔ sɔsɔkè ɖo woabe àgɔ̀jèjea ŋuti.

³Vɔ̀a lè vìvìtiwo tèpea, wò sɔ èzò vlàvlàvlà be èkɔ̃a na tɔ̀ wòwo, bèa nyi kplɔ̀tɔ na wo lè èmɔ màjèsia ji, ku èwè màwɔ̀ ènubàɖa lè gogo be àzɔ̃lì hahòtɔ̀a mè.

⁴Lè àmè ŋuawo tɔ̀ gomèa, e sɔ̀gbè be woa tè wo kɛ̃klɛ̃a eye vìvìtiwo ne le wo ɖɛ, ɖo èvi wò kèwo wo le ɖɛa ŋuti, woa kèwo ŋuti ye wò la hàɖo la sɔ Èsea be kɛ̃klɛ̃ màgble gbèɖea ɖo xixea mè.

⁵Wo ɖo è be yèwo la crɔ̃ kɔ̀kɔɛtɔwo be ŋùkɔ̀gbeviwo, eye ɖèvi ɖèka kpò kè wo dãŋùgbea, ye gã; be ne wòa dɔ̃to na woa, wò xɔ̀ woabe èviwo fuu lè woa si eye wò crɔ̃ wo lè ètɔ̀ wɔ̀adã mè.

⁶Èzã ŋua, mia tɔwo nya ɛ̀ jè ŋùkɔ̀ àleke be, ekè wo nya àtãŋukãkã kè wo sɔ wɔ̀ zòɖùɖua vɔ̀a, woa teŋu jɔ̀jì dèdèɖe.

⁷Àpo dùkɔ̃a kpɔ èmɔ na ɛ̀, ne bèa nyi gãgã na jɔ̀jɔɛtɔwo cã ku cɔ̃crɔ̃ na kɛ̃tɔawo ya.

⁸Ye ŋutia ènu kè wò sɔ dɔ̃to na miabe kɛ̃tɔwoa, trɔ zũ gogo na mi, ɖo wò zã ɛ̀ sɔ yɔ mi va gbɔ wò.

⁹Lè bèbe mèa, àmè nyuɛ̃wo be jìjimèviwo wɔ̀nà vɔsa eye wo ɖo ègbè-du dà àsi ɖo èse kɔ̀kɔɛ kèa ji be àmè kɔ̀kɔɛwo la nyi matɔwo lè àlè nyuɛ̃wo ku àfɔ̀kuwo mè eye ŋutɔ cã wo to woa tɔwo be àyosòso be èhàwo.

¹⁰Kɛ̃tɔwo be hòwɔ̀wɔ càkà caka xɔ̀ gbè na wo eye àmè kèwo le làmɔɛ̃ ɖo woabe èviwo ta be àlenanawo ɖì yì dìdìpe.

¹¹Kluvi ku àpetɔ kpefũ ɖèka ŋùkumè, dùkɔ̃mèvia sè veve sìgbè èfìɔa ke nène.

¹²Kpata ɖodua, wo to èku be èmɔ ɖèka ŋùkumè ŋua jia, wo ɖo àmèkuku màteŋu xlɛ̃wo; eye àmè kèwo ci àgbèa, mu gbà sùgbɔ la yì ɖì wo ò, ɖo woabe jìjimèvi ɖɔ̀huĩwo crɔ̃ zèɖèka kpàtàa.

¹³Nènea, wo nyi àmè kèwo mu xɔ̀nà ènu ji sè gbidi òa, le hũ e mè lè woabe ŋùkɔ̀gbeviwo be cɔ̃crɔ̃a mè be, dùkɔ̃ kèa nyi Mawu be èviwo.

¹⁴Èɖa ɖo see vũ bla ènuwo keŋu eye èzã zɔ̃ jè yebe màma mè;

¹⁵Troloa, àpo ènyà ŋusɛ̃kpatatɔ̀a ɖì so jiŋùkusi, so àpo fìɔzìkpea mè, zrò sìgbè àhùawɔ̀vi ŋuzĩzĩmàkutɔ ɖe nène, lũ ɖo kpɛ̃sɛ̃ be èdùa dòmè,

¹⁶le àpo ègbèdoàsi màtrɔ gbèɖea ɖo àsi sìgbè èwui ɖaɖa nène. Kè e sitèa, e hlɛ̃ èku ɖo àfi sia àfi. E nɔ̀tè ɖo anyigbã ji co, tɔ jiŋùkusi.

¹⁷Trolo kpòa, àmèwo ku drɔ̃ do ŋɔjiwo eye ènukpɔkpɔawo titɔ wo eye èhalɔàmè bàɖàwo jè woa ji.

¹⁸Wo sɔ wo dãŋùgbe ɖo fikè àlo funu, àmè sia àmè lè bèɖè bèɖè, be le gblɔ̃ ènu kè ŋuti wo le ku ɖoa be ènyà,

¹⁹ɖoa èdrɔ̃kuku kèwo titɔ woa sìa wo dàɖɛ vɔ̀, àleke be wo mu gbà crɔ̃ mànya ènu kè hɛ̃ gbledo ŋua va ò.

²⁰Godoa, èku be ènu tèpe kpɔkpɔa kpe kɔ̀kɔɛtɔwo cã eye gbogbotɔwo crɔ̃ keŋu lè zògbèa ji, vɔ̀a àdɔ̀mèzea mu nɔ ànyi dìdì kaka ò.

²¹Ɖoa ŋusù màɖo ŋùmèkãkã ɖe kè ɖi kaba va hlùɛ̃ wo, bɔ̀ àkpà ku àhùawɔ̀nu kèwo sɔ̀ ku yebe sumɔvidɔ, kuefã ku lifi be vuɛ̃ɖèɖe joa. E kpãŋùkɔ̀ Ku nyànyrãa eye e sò àhovìa nu sɔ ɖèfiɔ be yè nyi àpo sumɔvi.

²²E ɖù àdɔ̀mèzea ji, mu nyi to àbɔkãmè be ŋusɛ̃ mè àlo to àhùawɔ̀nuwo be ŋusɛ̃ ji ò, vɔ̀ to ènyà ji ye e kpe ètodɔ̃tɔa ji lè ɖo ŋùku tɔgbeawo be àtãŋukãkã ku zòɖùɖuawo ji.

²³Wàlɛbɛ kè àmèkukuwo le jè woa nɔ̀nɔwo ji, kɔ yì ji gleglea, e so woa dòmè, e ŋɛ àvũkpekpea eye e tu èmɔ kè yì àgbètɔwo dòmèa,

²⁴lè àkɔmèwu be àvɔ vlàyàa jia wo ta xixea kpata be ɖèɖe, wo ŋlɔ̀ ètɔwo be gogo nyikɔwo ɖo èkpewo ji lè àgbàkà ènɛ̀ mè, eye àpo gãnyinyia lè èfìɔkukua ji lè èta na ɛ̀.

²⁵Lè ekèa be ŋùkɔ̀a, àmècrɔ̃tɔa tètè yì ŋùgbe eye èha lɔ ɛ̀ ŋutɔ cã. Nènea ye àdɔ̀mèze be ènu tèpe kpɔkpɔa ɖèɖe sù.