Read gen Ànyasã 19 Bible Online

Ànyasã 19 - gen bible

Ànyasã 19

¹Vɔ̀a àdɔ̀mèze ŋuzĩzĩmàkutɔ̀ ɖe kɔ̀ ɖo àmè bàɖàwo ji kaka yì yebe vɔ̀vɔnu, ɖo Mawu nya ènu kè wo la gbà wɔ̀a jè ŋùkɔ̀:

²e yomè, kè be ɖè ègbè na dùkɔ̃a eye be ɖè àsi lè e ŋuti kpàtàa, wo la kè trɔ ètamè eye sɔ tĩ woa yomè.

³Nyàwo, ekè ne wo gbà lè woabe ècɔkɔ̀nu wɔ̀wɔa mè eye wo gbà le na àle lè àmèkukuwo be yɔ̀dowo toa, wo ɖè susu bu, mànyatana ɖe: be àmè kèwo wo ɖè èmɔ na lè blìbɔ̀ be woa joa, wo sɔ tĩ yomè na wo sìgbè sisitɔwo nène.

⁴Ènu kè lè veveɖe tututua kplɔ̀ wo, le dɔ̃ wo kaka yì kɔ̀ ɖo àgo mlɛ̃ ŋua eye be na wo ŋlɔ̀be èsɔ̀ kè va yìa àleke be woa jè àgɔ̀ na ètodɔ̃ xɔ̀xɔ kpɔ̀tɛ kpɔ̀tɛa lè woabe àyàɖùɖuwo mè.

⁵Eŋua kè dùkɔ̃ wòa le ɖùtù na toto va yì majɔkpɔ ɖea, woa ya bòhũa, wo kpɔ èku kpàtà ɖe.

⁶Ɖoa ènuɖoɖowo kpata, lè woabe èhasòso hamè hamèwo mèa, gbìgbɔ̀ trɔ nɔ̀nɔmè, le sètonu na àpo èse dodowo, àleke be àpo èviwo la nɔ dèdeɖe nɔ na àsà nuvuɛ̃ ɖekpekpe.

⁷Wo kpɔ lilikpo cɔ̃ àsàɖa eye ànyigbã pupu ze lè fikè èsìa lèa, plãŋùpòfɛ̃ be àpùa na èmɔ fà, eye àsrɔ̀ke mìmliwo trɔ gbàjà ji doàmà vɩì.

⁸Fikèa ye dùkɔ̃ wòa kpata to va yì; lè àpo àlɔ̀ hlùɛ̃gã gɔ̃mèa, wo ɖù ɖase so ènu jɔ̀asu ŋùdãtɔ̀awo ŋuti.

⁹Wo kãkã sìgbè èsɔwo lè ègbeɖùpe nène, tìkpo sìgbè àlɛ̃viwo nène sɔ mlã wò, oò Tɔhonɔ̀, èwò woabe hlùɛ̃tɔa.

¹⁰Wo kpɔ̀tɔ̀ le ɖo ŋùku woabe ègàtɔnugbe nɔ̀nɔ be ènu jɔ̀jɔwo ji àleke ye ànyigbã bòhũ jì èmuwo lè èlãwo tèpe, ètɔ̀ sàsa tru àbìtowo drì lè èsìmè be ènu àgbèagbewo tèpea.

¹¹E yomèa, wo kpɔ xèviwo be jìji ɖo àlɔ̀kpà bu ji, gà kè mè ènujroàmè tùtù wo sɔ biɔ nuɖùɖu nyuɛ̃wo.

¹²eye, zɔ̃ ɖo jijemè woa tɔ̀ jia, tèkleviwo so àpùa ji (mè) va.

¹³Eye ètodɔ̃wo jè vuɛ̃wɔ̀tɔwo ji wàlɛbɛ kè èji be ègbèɖèɖe sɛ̃ŋuwo mu na wo dosia òa. E sɔ̀gbè, wo xɔ̀ ètodɔ̃a ɖo woabe ènudrã wɔ̀wɔ ŋuti. Ɖoa wo ɖo àmè cìcri nyrãku tɔ̀xɛ ɖe ŋutɔ ɖo àmèjroviwo ŋuti.

¹⁴E ze be sãa, àmè ɖewo mu xɔ̀ àmèjro kèwo va kɔ̀ ɖo woa jia ò. Vɔ̀a woa ya, wo sɔ àmè kèwo wɔ̀ nyuɛ̃ na woa, sɔ trɔ kluviwo.

¹⁵Ètodɔ̃ nɔ̀tè kpɔ àmè kèwo xɔ̀ àmèjrowo ku èŋùkɛ̃klɛ̃a; wu ekèa, àmè kèawo cã.

¹⁶Nyàwoa, kè wo ɖù àzã le jìjɔɛ mè ku àmè kèwo ɖo jèna ɖèka ŋùkumè ku wo vɔ̀a, wo sɔ èdɔ jiŋɔwo tɛ wo ɖo ànyi.

¹⁷Ekèa ŋuti ŋùkuviwo cã gbã na wo, sìgbè àmè ŋua kèwo lè jɔ̀jɔɛtɔ be àgboa nu wàlɛbɛ kè vìviti cicri vũ cɔ̃ woa jia nène; eye àmè sia àmè ye le ji àgboa be èmɔnu na ye ɖokoe.

¹⁸Xixemènuwo le ɖɔ̀lì lè woa nɔ̀nɔwo dòmè, sìgbè lekè sãŋùgu be ègbèɖìɖiwo ɖɔ̀lìnàa nène, vɔ̀a ègbèɖìɖia gbà kpɔ̀tɔ̀ le kɔ̀ ceke ceke. Ekèa le ze glãlãa ne wo jrò ènu kè va yìawo mè kpɔ:

¹⁹nyàwo, àgojilãwo trɔ zũ èsìmètɔ̀wo, èsìputɔ̀wo le zɔ̃ lè àgo ji,

²⁰èzò kpɔ hɔ̃hlɔ̃ wu le ètɔ̀a mè eye èsìa bu yebe ŋusɛ̃ la sɔ ci ì;

²¹bòhũa, èzòbìbiwo mu le fiɔ̃ èlã fàflawo be ŋutilã, kèwo le yì le gbɔ̀ lè woa dòmè ò, eye mu srènà ènuɖùɖu kɔ̀kɔɛ kè ɖì èsìkpe kè srènà bɔ̀bɔɛɖea cã ò.

²²Lè ènu sia ènu mèa, Tɔhonɔ̀, wò sɔ àpo dùkɔ̃a yigò gbà kɔ ɛ̀ ɖo ji, wò mu dokpò e ji kpɔkpɔ wè sia wè ku àfi sia àfi ò.