Read gen Ànyasã 2 Bible Online

Ànyasã 2 - gen bible

Ànyasã 2

¹Ɖo wo le gblɔ̃ lè woa nɔ̀nɔwo dòmè ku susu dàdàwo be: «Miabe àgbèa kpòkpòe, eye be wɔ̀ ŋuzĩzĩ; wɔ̀na ɖekpe mu lè na àgbètɔ kè va ɖo yebe àgbèa be ènuwuwu eye mi mu sè kpɔ be àmè ɖe gbɔ̀ so èkuwode kpɔ ò.

²Mi jɔ̀ va xixea mè lè àvòmè eye e yomèa, e la nɔ̀ sìgbè mi mu jɔ̀ cã ò nène. Gbɔ̃gbɔ̃ lè miabe ŋɔ̀timɔwo mèa, nyi àzìzɔ kpò; susuɖèɖe nyi èzòklɛ̃vi ɖèka kè tona lè miabe èjì be hũpòpo mè.

³Ne e ci kpòa, ŋutilã trɔna zũ àfi eye gbɔ̃gbɔ̃a la kãkã sìgbè àya fàfla nène.

⁴Ne hùenua va le yì kpòa, wo la ŋlɔ̀be miabe nyikɔ, eye àmè ɖekpe mu la gbà ɖo ŋùku miabe wɔ̀wɔwo ji ò. Miabe àgbèa be nu la va yì sìgbè lilikpo nène, jèsìdo màgble ɖɛ, e la srè sìgbè àhũ tutu kè èwè be kɛ̃klɛ̃ nyà ɖo ènu eye yebe zòzo kãkãa nène.

⁵Miabe àgbè hùenua ɖì vɔ̃vɔ̃lì be totovayì, eye miabe ènuwuwua magli àzã ò ɖo wo tre è eye àmè ɖekpe mu la trɔ va ŋùgbedòmè ò.

⁶«Yeŋutia, mi yì kpò! Mia ɖù àgɔ ku fifi be ènuwo, eye mia kpɔ ègomè lè ènuɖoɖowo mɛ̀ sìgbè lè ɖèkajɛhuhũ be hùenu nène ku àgbè.

⁷Mia mu mia ɖokoewo ku vɛ̃ nyuɛ̃tɔwo kudo anùwɛtrɛ̀, mi mu gbà ŋlɔ̀be flawà cucugbãa be jiji ò.

⁸Mia sɔ èsepòpo wɔ̀ jègbà sɔ cɔ̃ gbɔ̀xue bèa yrɔ̀.

⁹Mia dòmètɔ ɖekpe mu gbà dokpò miabe àgɔɖùɖu èdɛ̃ kpòtoe tɔ̀a ò, mi na miabe jìjɔɛ kpɔkpɔa be jèsìdowo ne nɔ̀ àfi sia àfi, ɖo funua ye nyi miabe àkpa, funua ye nyi mia tɔ̀.

¹⁰«Mì na mia zĩ wɔ̀amènɔ̀ ɖo ànyi, co e lè jɔ̀jɔɛ gãke, mi mu la wɔ̀ ŋùkumè blɔ̀kɔ̀ na àhòsì ò, mi mu la ɖo bùbu na àmègã kujɔɛ be èɖà ɣewo ò.

¹¹Vɔ̀a miabe ŋusɛ̃ ne nyi miabe jɔ̀jɔɛa be jijenu ɖo gbɔ̀jɔ̀gbɔjɔa mu ɖènà èvi ò.

¹²Mì na mia doxa na àmèjɔ̀jɔɛ, ɖo e le do nupo na mi, e sinatè ɖo miabe wɔ̀nawo ŋuti. E le dohùɛ do mi ɖo miabe èse ji dàdawo ŋuti, eye e le kã ŋùkumè na mi be mi mu le wɔ̀ ànùkua na miabe kpakpla ò.

¹³E le pò àsi àkɔ be yè jèsi Mawu eye e le yɔ ye ɖokoe be Tɔhonɔ̀ be èvi.

¹⁴E va trɔ zũ ŋùkumèkãkã àgbèagbe na miabe susuwo eye yebe kpɔkpɔ ŋutɔ cã nyi àgbã na mi.

¹⁵Ɖo ènu kè ŋutia, yebe àgbènɔ̀nɔa mu sɔ̀ ku àmè buwo tɔ̀ ò, eye yebe èdɛ̃wùwu tovò kluaa.

¹⁶E kpɔna mi sìgbè ènu gbegbletɔ nène eye e zɛ̃nà na miabe èmɔwo sìgbè èɖinuwo nène. E le ɖè gblɔ̃ be sìtuɖèɖe ye nyi àmèjɔ̀jɔɛwo be vɔ̀vɔnua eye e kɔna ye ɖokoe yìji be Mawu nyi yè tɔ.

¹⁷Mì na mia kpɔ be yebe ènyàwo nyi nyàwo ma, eye mia kpɔ àlekè e la wu ènu ɖoa.

¹⁸Ne àmèjɔ̀jɔɛa nyi Mawu be èvia, eŋua e la va kpe ɖo e ŋuti eye e la gbĩ ì lè yebe kɛ̃tɔwo simè.

¹⁹Mì na mia do è kpɔ to èzũ ku àyàdodo mè ne mia kpɔ àlekè yebe àdɔ̀mèfafa la nɔ̀, gbà yebe èjihɛ̃hɛ̃ àlo àdòdò.

²⁰Mì na mia gblehùɛ do è na ŋukpɛ̃ be èku ɖe, ɖo, e susuna be Mawu la va xɔ̀ na ɛ̀.»

²¹Nènea ye wo ɖènà susuawo yeŋu, vɔ̀a wo le flù woa ɖokoe; woabe vuɛ̃jɔ̀jɔa le gbã ŋùku na wo,

²²eye wo mu jènàsi Mawu be ɖoɖo wawlawo ò, wo mu le kpɔ èmɔ na fɛ̃tu xɔ̀xɔ so àgbè nɔ̀nɔ jè Mawu be ŋùmè ɖe mè ò, wo mu xɔ̀nà ɖo bùbu kè wo nana èkla mà ɖoɖia ji ò.

²³Nyàwo Mawu ɖo àgbètɔ be woa nɔ̀ màgble màgble eye e wɔ̀ ɛ̀ ɖo ye ŋutɔ be nɔ̀nɔmè mè.

²⁴Vɔ̀a, èku gɛ̃ ɖo xixea mɛ̀ ɖo legba be ŋuhuã ŋuti: àmè kèwo nyi ye tɔ̀awo dona èha ku ì.