Read gen Ànyasã 3 Bible Online

Ànyasã 3 - gen bible

Ànyasã 3

¹Àmè jɔ̀jɔɛwo be èklawo lè Mawu be àsi mè eye vevesèse ɖekpe mu la tù wo ò.

²Lè bòmècitɔwo be kpɔkpɔ nua, wo ze sìgbè àmèkukuwo nène, eye woabe jojoa ɖì gbledo,

³woabe ɖèɖèjo lè mia ŋutia lè sìgbè àhovì nène, co gãke wo lè ŋutifafa mè.

⁴Ne ŋutɔ cã, lè àgbètɔwo be susu mèa, wo xɔ̀ ètodɔ̃a, woabe ŋùɖo ɖɔna ku ènu màkɔ̀ màkɔwo.

⁵Lè èto dɔ̃dɔ̃ viɖewo yomèa, wo la xɔ̀ nyɔna fuuwo. Mawu do wo kpɔ eye be kpɔ wo be wo jè na yè;

⁶sìgbè sìka kè wo kɔ̀ lè èzò mèa nène, e xɔ̀ wo sìgbè ènumɛ̀mɛ vɔsa nène.

⁷Lè hùenu kè Mawu la to va ɖo kòjoa, wo la nɔ̀ klɛ̃, wo la nɔ̀ sìgbè èzòklɛ̃ nyɛwo le to èbè mè nène.

⁸Wo la ɖo kòjo na xixea be kɔ̀tawo eye wo la kpɔ ŋusɛ̃ ɖo dùkɔ̃wo ji eye Tɔhonɔ̀ la nyi èfìɔ na wo kaka sɔ yì.

⁹Àmè kèwo sɔ woa ɖokoe tù na ɛ̀a, la jèsi nyàwoa, àmè kèwo lètè goŋu lè lɔ̃lɔ̃ mèa, la ɖo nɔ̀pe lè e gbɔ. Ɖo màje ku ŋuzĩzĩkuku lè na yebe àmècãcãwo.

¹⁰Àmè bàɖàwo ya, la xɔ̀ ètodɔ̃ kè jè na woabe susu gbegblewo, ɖo wo ɖìgbɔ àmèjɔ̀jɔɛa eye wo gble Tɔhonɔ̀a ɖɛ.

¹¹Ɖoa, àmè kèwo le crì Ànyasã ku yebe àmèhɛ̃hɛ̃a nyi àmèbàɖawo: woabe ŋùɖoa lè gbalo, woabe àgbàgbajèje ku èdɔwo mu ɖo àlè ɖe ò;

¹²woabe nyɔnùwo nyi sùkunɔ̀wo, woabe èviwo nyi àmèvuɛ̃wo, woabe jìjimèviwo nyi kpɛ̃sɛ̃mɛwo.

¹³Sìtumɛ ye nyi nyɔnù èkònɔ̀, àmè kè ŋuti èɖi ɖe mu lè ò eye mu do xòmè kè mu jè ò: e la kpɔ èkusɛ̃sɛ̃ xɔ̀ lè èklawo be jijikpɔ hùenu.

¹⁴Sìtumɛ ye nyi èvokukunɔ̀ cã, kè be àlɔ̀ mu wɔ̀ ènudrã ò eye mu ɖo susu kpòtoewo ɖo Tɔhonɔ̀ ŋuti ò: e la xɔ̀ màje tɔ̀hɛ ɖo yebe ànùakua ŋuti ku gomèkpɔkpɔ nyuɛ̃ lè Tɔhonɔ̀ be Àdoa mè.

¹⁵Ɖoa àgbàgbajèje èdɛ̃ nyuɛ̃ wùtɔ̀wo be èkusɛ̃sɛ̃a ɖɔ ku ŋutikɔ̀kɔɛ, ànyasã be ekèa lè àgbè tɛ̀gbɛ̀.

¹⁶Vɔ̀a àmèsrɔ̃jitɔwo be èviwo mu la vlũ kpɔ ò eye xòmèdodo mà jèto be jìjimɛ̀viwo la bu.

¹⁷Ne wo gbà nɔ̀ àgbè dìdiɖe cã, wo la bù wo kpò sìgbè ènumàɖìnu, eye kaka yì vɔ̀vɔnua, woabe àmègãkukua la nɔ̀ bùbu màɖo.

¹⁸Eye ne wo ku kabaa, wo mu la kpɔ ŋùɖo kaka, la kpɔ àsiɖoàkɔ cã xɔ̀ lè kòjoɖozãgbè ò.

¹⁹Ɖo kɔ̀ta kè le wɔ̀ èvuɛ̃a, be vɔ̀vɔnu jinaŋɔ!