Read gen Ànyasã 4 Bible Online

Ànyasã 4 - gen bible

Ànyasã 4

¹E nyɔ fuu be wo mu gbà ɖo èvi ò co woa ɖo èdɛ̃ nyuɛ̃. Ekèa wɔ̀wɔ gblena ŋùgbe màgble ɖe ɖɛ, ɖoa Mawu ku àgbètɔwo nyana ɛ̀.

²Ne e lè àgbèa, wo srɔ̃na ɛ̀, ne mu lè òa, wo xànà so e ŋuti; le xixe màvɔa mèa, e le ègla, ku jègbà lè èta, kè be ɖùji vɔ̀ lè èkãmè tète màɖoɖi be dodokpɔ ɖe mèa.

³Vɔ̀a àmè bàɖawo be jìjimèvi gbogboawo mu la ɖè àlè ò; kè wo to so àti be gùnu gbegble mèa wo mu la va to èkè titowo ò, eye wo mu la likè sɛ̃ŋu ɖe ò.

⁴Ne lè gà ɖe mè, e la to àlɔ̀zɛ̃wo jroa, mu la likè ò. Àya la hũhũ ì eye àya gblenu la hɔ̃ ɛ̀ jo so èkè nu ke.

⁵Yebe àlɔ̀zɛ̃wo la ŋɛ gbɔ̀xue gàmè la ɖo, woabe èkusɛ̃sɛ̃ la va gũ, ɖo mu ɖì ne woa ɖù ò, eye mu nyɔ na ènu ɖekpe ò.

⁶Ɖo lè kòjo ɖoɖo zã gbèa, àhasì be èviwo ye la ɖù ɖase so woabe àjìtɔwo be èvuɛ̃jɔ̀jɔa ŋuti.

⁷Vɔ̀a, ne àmè jɔ̀jɔɛ ku jè ŋùkɔ̀ na yebe èpè ŋutɔ cã, e la kpɔ jɛ̃gbɔ̃gbɔ̃.

⁸Ɖo sĩsĩ kè jè na bùbua, mu lè àgbè dìdi nɔ̀nɔ mè ò, wo mu jijena ɛ̀ ɖo èpè sùgbɔ ɖoɖo ŋuti ò.

⁹Nyàwoa, ànyasã la teŋu nɔ̀ èɖà ɣe tèpe, eye èpè sùgbɔ ɖoɖo teŋu nyi àgbè nɔ̀nɔ màɖoɖi.

¹⁰Kè e jè ŋùmè na Mawua, e lɔ̃ ɛ̀ eye e ɖè è jo yì àfi bu, wàlɛbɛ kè e nɔ̀ àgbè lè èvuɛ̃wɔ̀tɔwo dòmèa.

¹¹Wo kɔkɔ ɛ̀ jo àleke be ènuvuɛ̃ mu gbà gble yebe ènumè ŋɔŋɔjè àlo àyegɛdɛ mu gbà flù yebe èkla ò.

¹²Ɖo èvuɛ̃ dɔ̃nà àmèwo, eye wo mu gbà teŋu kpɔ ènu nyuɛ̃ ò. Èjro be cɔ̀cɔ̀dona àmèa, titɔna gbɔ̃gbɔ̃ màɖo lɛbli.

¹³Àmè kèa la va ɖo nyɔna blibo ɖe mè lè gà viɖe mè, na yebe àgbèa kpata be ɖɔɖɔ.

¹⁴Yebe àgbèa jè ŋùmè na Tɔhonɔ̀, ye ŋuti ye e ɖè è to lè xixe nyrãku ŋua mè kaba. Àmèwo kè ŋùku gãke wo mu sè e gɔ̃mè ò, wo mu sɔ wɔ̀wɔ kèa hati ɖo ètamè ò.

¹⁵Mawu be màje ku ŋuzĩzĩkuku lè na yebe àmè cãcãwo, eye e la cɔ̃ ye tɔ̀wo ji.

¹⁶Àmè jɔ̀jɔɛ be èkua le gblehùɛ do àmè bàɖa be àgbènɔ̀nɔ kpòtoɛ; eye ɖèkajɛhũhũ jè àgo kabaa donahùɛ do àmè sĩsĩwo be àgbènɔ̀nɔ bàɖawo.

¹⁷Eŋua àmèwo la kpɔ ànyasãmɛa be ku, vɔ̀a wo mu la nya ènu kè Mawu jro so e ŋuti gbaku ènu kè ŋuti be wla ɛ̀ nènea ɖo ò.

¹⁸Àmèwo la kpɔ eye wo la cri ì, vɔ̀a Tɔhonɔ̀ la nɔ̀ kò wo.

¹⁹Lè eŋua yomèa, wo la trɔ zũ ŋutilãkuku màɖo bùbu, la nɔ ɖù ŋùkpɛ̃ màkpònu lè àmèkukuwo dòmè. Mawu la tùtù wo ɖo ègũ, ègbè ɖekpe màɖi, èta la yì cucugbãa, e la hũhũ wo kaka yì woabe ègũwo nu; wo la ci ɖiwa kaka yì vɔ̀vɔnu; wo la nɔ vevesèse mè eye wo mu la ɖoŋù wo ò.

²⁰Gà kè mè Mawu la biɔ wo àkɔ̃ŋùta so woabe vuɛ̃wo ŋutia, àmè kèawo la zɔ̃ va ku vɔ̃vɔ̃, eye woabe vuɛ̃wo ye la dohùɛ do wo.