Read gen Ànyasã 5 Bible Online

Ànyasã 5 - gen bible

Ànyasã 5

¹Eŋua àmè jɔ̀jɔɛa la nɔ̀tè ku kãkãɖoji nyuɛ̃ ɖe lè àmè kèwo le ɖè ŋùtafui na ɛ̀a be ŋùkumè, àmè kèwo le crì yebe àgbàgbajèjewo.

²Ne wo kpɔ ɛ̀a, wo la hũhũ ku vɔ̃vɔ̃ gãɖe, ku kãa be yèwo kpɔ ɛ̀ gãgãɖe, lè ŋùɖo màɖo màɖo mè.

³Ku eji gbãgbãa, wo la ŋɛ̀, la xànu ɖo woabe wɔ̀nawo ta ku hèhèdodo, nɔ gblɔ̃ lè woa nɔ̀nɔwo dòmè be:

⁴«Àmè kè ye mi sɔ wɔ̀ ènu kokoe sã va yì, sɔ wɔ̀ àlɔmèɖènu, sùkunɔ̀tɔ̀a, mi kpɔ yebe àgbèa sìgbè àlɛ̀nu sɔ̃ŋu nène eye yebe èkua nyi ènunyɔŋu.

⁵Àleke gɔ̃ ye wo wɔ̀ hlɛ̃ ɛ̀ ɖo Mawu be èviwo dòmè eye e le ɖù lè àmè kɔ̀kɔɛwo be gomè ɖo ò?

⁶Eŋua mi trã jo lè àzɔ̀ge boo na nyàwo be èmɔa, jɔ̀jɔɛnyinyi be kɛ̃klɛ̃a mu kɔ̀ na mi ò eye èwèa mu zɛ̃ na mi ò.

⁷Mi zɔ̃ kaka e wɔ̀ àtãŋu lè màjɔ̀màjɔ ku cɔ̃crɔ̃ be àfɔ̀topewo, mi so zògbè àlìdo màɖowo mè va yi, vɔ̀a mi mu teŋu jèsi Tɔhonɔ̀ be èmɔa ò.

⁸«Àlè kɛ miabe ègòyiyia ɖè na mi ò? Àdɔ̀kùnu kè mi sɔ pò àdègbèa, nukɛ ye be hɛ̃ va na mi ò?

⁹Ekèa kpata la va yì sìgbè vɔ̃vɔ̃lì nène, sìgbe àŋɛ̀ kè wo do, ŋlɔ̀be kabaa nène.

¹⁰E lè sìgbè èsìjihũ ɖe kè le zɛ̃ àpù wɔ̀adã ye wo mu la gbà teŋu kpɔ yebe zɔ̃zɔ̃ be èflì àlo èhũta be èsìzɛ̃zɛ̃ lè àsrɔ̀kewo mè ò nène;

¹¹e gbà le sìgbè xèvi kè zrònà to àyamè eye mu gblena yebe zòzro be èflì ɖɛ ò nène, ɖo àya fɛflɛ kè àwàdawo le pò, le fɛ̃ ɛ̀ ku bibi àdãtɔ̀ sɔ le ɖè èmɔ; gãke e yomèa, jèsì ɖekpe mu ɖènà zòzro tèpea fiɔna ò;

¹²e gbà lè sìgbè èhuã kè wo dà ɖoɖa àfi kè wo jije ɖɛa nène, àya kè be zɛ̃a gbìgbɔ̀ trɔ vana e tèpe trolo, àlegbègbè be wo mu nyana èmɔ kè be sɔa ò;

¹³nèneake ye mia ŋutɔwo cã, kaka wo gbe jì mi kɔ̀ ɖɛ kpòa, mi gbà buna vĩĩ eye mi mu teŋu ɖènà èdɛ̃ nyuɛ̃ be èflì ɖekpe fiɔ ò; mi srènà mia ɖokoewo lè èdɛ̃ vuɛ̃ wùwu mè.»

¹⁴Nyàwo, àmè bàɖa be ŋùɖo lè sìgbè fòflo kè àya lɔ ɖo ènu va le yì àlo èsì be futukpɛ kè àyasɛ̃sɛ̃ nyànà jo nène, e kãkãnà sìgbè àzìzɔ lè àyapòpo mè nène, e buna vĩĩ sìgbè àmègbɔ zɛ̃zɛ̃ gbè ɖèka tɔ̀ be ŋùɖo nène.

¹⁵Vɔ̀a àmè jɔ̀jɔɛwo le nɔ̀ àgbè tɛ̀gbɛ̀, woabe àjɔ̀a lè Tɔhonɔ̀ simè, eye Mawu jihuĩtɔa lenabè na wo.

¹⁶Ye ŋutia wo la xɔ̀ fìɔ be gogo, èfìɔkuku nyuɛ̃ so Tɔhonɔ̀ be àsi mè. Ɖo e la hlùɛ̃ wo ku yebe ɖùsi lɔa eye e la sɔ yebe àbɔ wɔ̀ àkpoxɔ̀nu cɔ̃ wo.

¹⁷E la sɔ yebe vevedonu hlɔ̃biɔtɔ̀a wɔ̀ àhùawɔ̀nu eye e la bla àkpà na ènuɖoɖowo kpata keŋu la sɔ dɔ̃to na yebe kɛ̃tɔwo.

¹⁸Sìgbè àkɔtacɔ̃nu nènea, e la sɔ jɔ̀jɔɛnyinyia do, sìgbè gàkuku nènea, e la sɔ kòjo jɔ̀jɔɛ sòso cɔ̃.

¹⁹E la sɔ yebe jɔ̀jɔɛnyinyi kè ji wo mu la teŋu ɖù òa, wɔ̀ àkpoxɔ̀nu,

²⁰sìgbè àdèkpe nènea, e la ɖa yebe àdɔ̀mèze màŋɛa eye xixe kplògòdòa la va bɔ̀ ɖo e ŋuti sɔ pò àvũ ku bòmècitɔwo.

²¹Sìgbè àŋùti kèwo wo jɔ̀ nyuɛ̃ɖe jije ɖɛ nènea, bìɖàwo la zrò so liliwo mè sìgbè àŋùti kèwo jɔ̀ kàkòa nène, tùtà woabe jèpea.

²²Èsìkpewo la nɔ hlɛ̃ ku àdã ɖoɖa sìgbè èkpe kèwo wo dàa nène. Àpù be àsrɔ̀kewo la mlì ku àdã ɖo mawu be kɛ̃tɔwo ŋuti eye ètɔ̀wo la dɔ cɔ̃ wo ŋuzĩzĩ màkutɔ̀.

²³Àya sɛ̃ŋu ɖe la sitè ɖo woa ŋuti eye e la kã wo hlɛ̃ sìgbè àya vùdù ɖe nène. Ènu màye màye la sɔ ànyigbã bliboa wɔ̀ zògbè, ènu màyewɔ̀wɔa la mlì àmè sɛ̃ŋuwo be fìɔzìkpe pu ànyi.