Read gen Ànyasã 6 Bible Online

Ànyasã 6 - gen bible

Ànyasã 6

¹Ye ŋuti fifìa, mìa èfìɔwo, mì ɖo èto eye mì ŋɔjè ènu mè, mì na woa kpla mì ènu, mìa ànyigbã kplògòdòa jikpɔtɔwo.

²Mì hũ èto, mìa èhawo be kplɔ̀tɔwo, mìa àmè kewo le kpɔ jìjɔɛ ɖo mìabe dukɔ̃wo be gbɔsùsua ŋutia;

³Tɔhonɔ̀ gbɔ ye mì hɔ̀ mìabe ŋusɛ̃a so, Jihũitɔa gbɔ ye mìabe jiɖùɖùa so, eye e ya ye la do mìabe wɔ̀nawo kpɔ eye e la jrò mìabe ɖoɖowo mɛ̀ kpɔ,

⁴Ɛ̃ɛ mì lè yebe fìɔɖùɖua be hɔ̃hlɔ̃ gɔ̃mè. Co mì mu ɖo kòjo ɖo jɔ̀jɔɛ ji ò, mì mu zɔ̃ ɖo èsea ji ò, mì mu wɔ̀ ènu zɔ̃ ɖo Mawu be èjro ji ò.

⁵Ekèa ŋuti e la sitè ɖo mìa ŋuti, ŋɔjitɔ̀ lè àvò mè, e la ɖo kòjo gligã ɖe sɔ sitè ɖo hùɛ̃yiwo ŋuti.

⁶Wo la kpɔ ɖo èmè na àmè kpòwo, vɔ̀a ŋusɛ̃tɔwo ya, wo la hɛ̃ wo ku àdã.

⁷Àmèwo kpata be Tɔhonɔ̀a mu la tètè yì ŋùgbe lè àmè ɖekpe be ŋùkɔ̀ ò, eye mu la kpɔ ègãnyinyi na àmè ò: ye ŋutɔ ye ɖo àmèvia ku àmègã cã eye yebe àmèjikpɔkpɔa lè ɖèka ŋùmè na àmèwo kpata.

⁸Vɔ̀a ènugɔ̃mèkùku gligãɖe le nɔ̀tè kpɔ ŋusɛ̃tɔwo.

⁹Ɖo eŋua ŋutia, mìa èfìɔwo ye mù le pònupo na. Mì kpla ànyasã eye mì mu gbà wɔ̀ èvuɛ̃ ò.

¹⁰Àmè kèwo le wɔ̀ ɖo èse kɔ̀kɔɛawo ji tututua, wo la bù wo àmè kɔ̀kɔɛwo, eye àmè kèwo xɔ̀ kpakpla ŋua, la hlùɛ̃ woa ɖokoewo lè kòjo ɖoɖo gbè.

¹¹Ye ŋutia mì ɖo èto àpe ènu fiɔfiɔa ŋùkubìatɔ̀, ne jro mì veveɖe eye mì la xɔ̀ kpakpla.

¹²Ànyasã klɛ̃na, mu klona ò, e ɖènà àsi yeɖokoe fafaɖe na àmè kèwo lɔ̃nà ɛ̀ be wo kpɔna ɛ̀, eye àmè kèwo jina ɛ̀a, kènà ɖo e ŋuti.

¹³E xɔ̀nà ŋùkɔ̀ na àmè kèwo le jia be èjro, ɖènà ye ɖokoe fiɔ wo cucugbã.

¹⁴Àmè sia àmè kè jènà èmɔ fɔ̃fɔ̃mè yì e gbɔa, mu kpena èfũ ò; e la kpɔ ɛ̀ lè ànyinɔ̀nɔ lè yebe hɔ̃tru mɔnu.

¹⁵Lɔ̃lɔ̃ kplikpli ɖoɖo na ɛ̀a nyi ènumèŋɔŋɔjè be blibo ɖùɖu. Eye àmè sia àmè kè lè ŋùzɔ̃ ɖo e ŋutia, la vò lè tagbã si trolo.

¹⁶Ye ŋutɔ la yì ji àmè kèwo jè na ɛ̀a, la ze na wo ku àdɔ̀mènyuɛ̃ lè woabe èmɔwo ji, eye lè woabe susu ɖèɖewo mèa, e va donagò wo.

¹⁷Ànyasã be gɔ̃mèjèjea ye nyi èjro ŋutɔ ŋutɔa be woa xɔ̀ kpakpla so e gbɔ.

¹⁸Woa ji yebe ènufiɔfiɔa, ye nyi be woa lɔ̃ ɛ̀. Woa lɔ̃ ànyasã ya nyi yebe èsewo ji wɔ̀wɔ ɖo. Woa wɔ̀ ɖo yebe èsewo jia, nyi kãkãɖo ji wo mu la ku kpɔ ò.

¹⁹Èku màkpɔa, kplɔ̀nà àmè yì Mawu gbɔ.

²⁰Nènea ye ànyasã be jojroa kɔkɔna àmè yì ji kaka ɖo èfìɔsaa mè.

²¹Eŋua ne mìa dùkɔ̃wo be èfìɔviwo, mì kpɔna jìjɔɛ lè èfìɔzìkpewo ku àtikplɔwo ŋutia, mì nɔ do bùbu ànyasã ŋuti eye mì la ɖùfìɔ tɛ̀gbɛ̀ kaka sɔ yì.

²²Gãke nukɛ ye ànyasã nyi ò eye fikɛ ye nyi yebe jɔ̀sope ò? Mù la ɖè gblɔ̃, nyè mu la wla àmlìmànuwo do mì ò. Mù la trɔ yì kaka yebe jɔ̀sope, mù la ɖè yebe nyanya sia lè gàglàgbè; godoa nyè mu la to àkpa na nyàwoa ò,

²³nèneake nyè mu la zɔ̃ èmɔ ku ŋuhuã kè crɔ̃na àmèa gbèɖe ò, ɖoa mu la teŋu nɔ̀ ènu ɖekpekpe mè ku ànyasã ò.

²⁴Ànyasãmɛwo be èhawo bòhũa le hlùɛ̃do na xixea be gãgã, eye èfìɔ ènunyatɔa hɛ̃nà ɖàgbè va dùkɔ̃a ji.

²⁵Yeŋutia mì na mìa xɔ̀ kpakpla to ènyà nyèwo mè eye mì la kpɔ àlè so e mè.