Read gen Ànyasã 7 Bible Online

Ànyasã 7 - gen bible

Ànyasã 7

¹Ènyè cã, mù nyi àgbètɔ jɔ̀ na èku, sìgbè àmèwo ke nène. Mù jɔ̀ so àmè cucugbãtɔ̀a mè, wo mɛ̀ ɛ̀ kudo ànyigbã. Lè àjìnɔ̀ ɖe be àdɔ̀mè ye wo kpà mù lè ŋutilã mè,

²sɔ na wètri èwo, le xɔ̀ nunyanya lè èhũ mè to ŋusù be àfɔ̀na ku vivisèse kè kplɔ̀nà lɔ̃lɔ̃ doa me.

³Nyè cã, so àpe jìji mè kpòa, mù gbɔ̃ àya kè lè na m ia kpataa eye mù gɛ̃ jè ànyigbã ji fikè wo sènà veve ɖèka ŋùkumè; sìgbè e nyina na àmèwo kpata nènea, àvi fãfã ye nyi àpe àpa cucugbãtɔ̀a.

⁴wo hɛ̃ mù lè àvɔwo mè kudo siayicici.

⁵Èfìɔ ɖe mu jè yebe àgbèa gɔ̃mè ɖo àlɔ̀kpa bu ji ò.

⁶Àlɔ̀ ɖèka ŋùkumè ji kpò àmèwo keŋu gɛ̃na ɖo àgbèa mè eye wo gbà tona lè e mè.

⁷Eŋua ŋuti mù fãkue eye Mawu na mù ènu mè ŋɔŋɔjè, mù blìbɔ̀ eye ànyasã be gbɔ̃gbɔ̃a va ènyè mè.

⁸Mù lɔ̃ ɛ̀ wu àtikplɔ ku fìɔzìkpe, lè e gbɔa, mù bù àdɔ̀kùnua ènumàɖìnu;

⁹nyè mu sɔ ɛ̀ sɔ̀ ku jònukpe ke wo mu la teŋu jije òa ŋuti ò, ɖo sìkawo keŋu lè e gbɔa, lè sìgbè èkɔsawɛ viɖe kpò eye klòsalòa lè sìgbè bàba nène lè ŋùkɔ̀ na ɛ̀.

¹⁰Mù lɔ̃ ɛ̀ sɔ wu lãmèsɛ̃ ku àmè be nyɔnyɔ. Mù ji be bèa nɔ̀ àsi nyè sìgbè kɛ̃klɛ̃ nène, ɖo yebe kɔ̀kɔ cekecekea mu kpònà ò.

¹¹E hɛ̃ nyɔnawo kpata va na mù ha ɖèka. E le àdɔ̀kùnu màɖo hɛ̃hlɛ̃wo ɖo yebe àsiwo mè.

¹²Mù ɖɔ ànyasã be ènu nyuɛ̃wo kpata kpɔ, co nyè mu nya be ye ŋutɔ ye nyi woabe jɔ̀sope ò.

¹³Ènu kè mù kpla gòmàyitɔ̀a, mù mana ɛ̀ ŋuhuã mànɔ̀ e mè tɔ̀, nyè mu la wla yebe àdɔ̀kùnua ò.

¹⁴Ɖoa e nyi àdɔ̀kùnu màɖùvɔ̀ gbèɖe na àmèwo. Mawu lɔ̃nà àmè kèwo le zã ɛ̀a be ènyà gbɔ. Nyɔna kèwo tona so àmèhɛ̃hɛ̃ mèa, nana wo jènà ŋùmè na ɛ̀.

¹⁵Mawu ne na ma pò nupo ku ènugɔ̃mèsèse be ŋusɛ̃a eye ma ɖo susu kèwo la jè na ènunana kèwo mù xɔ̀a, ɖo e jɔ̀nà ànyasã gbà kplɔ̀nà ànyasãɖotɔwo.

¹⁶Ɛ̃ɛ, mi lè yebe àcɛ̀a gɔ̃mè, mia ŋutɔ ku miabe ènyàwo cã, kaka jè miabe nunyanya kudo miabe bibi ji.

¹⁷Mawu ye na mù ènunya kè sɔ̀gbèa so ènu sia ènu ŋuti. E na mù nya ènu kèwo wo sɔ wɔ̀ xixea, ku lekè àya, èsì, èzò ku ànyigbã wɔ̀nà èdɔ ɖoa.

¹⁸E fiɔ mù gàmɛ̀a ŋuti dɔ wɔ̀wɔ, dɔ̃ŋùkusua be àzɔ̃lìwo ku hùenuwo be ɖɔ̀lìɖɔliwo,

¹⁹èpè be kpepewo ku xixea be àgowo[1] be nɔpewo,

²⁰elãwo be nɔ̀nɔmè ku ègbemèlãwo be wɔ̀na, gbɔ̃gbɔ̃wo be hɔ̃hlɔ̃ kudo àgbètɔwo be susuwo, àtiwo be èha sòso kudo woabe èdɔ̀dàda be ŋusɛ̃ vòvòvòwo.

²¹Mù nya ènu kè lè wawla mè ku kè wo la teŋu kpɔa. Nyàwo, ànyasã ye fiɔ mù ekèa, e ye wɔ̀ ènuwo kpata.

²²Ɖoa le e mèa, gbɔ̃gbɔ̃ ɖèka nunyatɔ gbà lè kɔ̀kɔɛ. Ye ɖèka tigɔ̃ ye lè, co wɔ̀nadɔ lè nɔ̀nɔmè hamè hamè mè; e bi ŋutɔ eye mu nɔ̀nà tèpe ɖèka klɔ̀lɔ̀ ò. E ŋɔna jè ènu mè, màɖoɖi gbà kɔ̀. Èvuɛ̃ mu kpɔna ɛ̀ ò, e lɔ̃ ènyuɛ̃ gbà sɔ̀gbè.

²³E wɔ̀nà nyuɛ̃, ènu ɖekpekpe kpò mu xena èmɔ na ɛ̀ ò. E lɔ̃nà àgbètɔwo, likè goŋu gbà lè kpoo. E teŋu wɔ̀ ènu sia ènu, ɖiana ènu ɖekpekpe, ŋɔnajè gbɔ̃gbɔ̃ nyuɛ̃, nyanu mè, kaka jè kèwo flà ŋutɔ cã mè.

²⁴Ɖoa ànyasã bi wu ènu kèwo kpata hùãnà. E tona àfi ɖekpekpe gbà ŋɔna jè ènuwo keŋu mè ɖo yebe kɔ̀kɔ ceŋu ceŋua ŋuti.

²⁵Ɛ̃ɛ, e nyi Mawu be hɔ̃hlɔ̃a be àya puplu, e to so Ŋusɛ̃kpatatɔa be gogoa mè. Ekèa ŋuti èɖi ɖekpe mu la teŋu yì e mè ò.

²⁶E nyi kɛ̃klɛ̃ màvɔa be nɔ̀nɔmè kè lè tɛ̀gbɛ̀, e nyi Mawu be wɔ̀na be àpupui màɖoɖi ku yebe àdɔ̀mènyuɛ̃ be ŋùfɛ̃.

²⁷Eke e lè ɖèka co, e kpena ènu sia ènu ji; mu trɔna kpɔ ò, gãke e trɔ wɔ̀nà ènu ɖekpekpe. So jìjimè yì jìjimèa, e tona àmè kèwo nyi Mawu tɔ̀a mè, sɔ wo wɔ̀nà èxlɔ̃ ku gblɔ̃ɖɛtɔwo na ɛ̀.

²⁸Ɖoa àmè kèwo nɔ̀nà kpikpli ku ànyasã kpò ye Mawu ɖona lɔ̃lɔ̃ na.

²⁹Ànyasã ɖo àsìxɔ̀xɔ wu èwè ku wètriviwo kpata. Yebe kɛ̃klɛ̃a to ŋùkèkè tɔ̀a ŋuti.

³⁰Ɖo, ŋùkèkè nana èmɔ èzãa, vɔ̀a ànyasã mu nana èmɔ èvuɛ̃ ya kpɔ ò.