Read gen Ànyasã 8 Bible Online

Ànyasã 8 - gen bible

Ànyasã 8

¹Ànyasã vlũna so xixea be koŋù ɖe va yì koŋù bu ji ku ŋusɛ̃, e sɔ ènuwo kpata ɖo e tèpe ku lɔ̃lɔ̃ nyuɛ̃.

²E ye mù lɔ̃ gbà ji èmɔ lè e ŋuti so kaka àpe ɖèkajɛ mè ke. Mù tèkpɔ be ma ɖee bèa nyi èsrɔ̃ nyè eye yebe nyɔnyɔa le èjì na mù.

³Yebe gogoa trɔna yebe nyiɖìɖia, ɖo e ɖùnà àgbè ku Mawu, eye xixea be ɖotɔa lɔ̃ ɛ̀.

⁴E kpɔna gomè lè Mawu be nyanya wawlawo mè eye e nana enuwo zɔ̃nà sùu.

⁵Ne àdɔ̀kùnu nyi ènu kè jrona àmè lè àgbè mèa, nukɛ lè kè xɔ̀asì wu ànyasã, ènuwo kpata be wɔ̀tɔ ò?

⁶Ènunyanya nyɔ, vɔ̀ ànyasã gbà nyɔ wu. E ɖènà yebe àɖàŋùa to lè ènu ɖoɖowo kpata mè.

⁷Mì lɔ̃nà ènu jɔ̀jɔɛ wɔ̀wɔa? Èdɛ̃ nyuɛ̃wo nyi yebe èdɔwo be èkusɛ̃sɛ̃a; ɖo, e fiɔna blɛ̀wù wɔ̀wɔ ku àdòdò hɛ̃hɛ̃, jɔ̀jɔɛ nyinyi ku èjìhɛ̃hɛ̃, eye ènu ɖekpe mu lè kè la ɖè àlè na àgbètɔwo lè àgbèmè wu ò.

⁸Mì jro la gbà xɔ̀ lè ènutèpe kpɔkpɔ dìdi ɖe mèa? E jènasi èsɔ̀ kè vayìa eye e susuna èsɔ̀godo, e nyana ènyà klìkowo gɔ̃mè ɖèɖe, gbà ŋɔnajè kèwo sɛ̃ŋua mè. E kpɔna jèsì ku ŋùdãnuwo jèŋùkɔ̀, kaka jè xotùtu be hùenu vòvòwo ji.

⁹Eŋua mù ɖo è be ma sɔ ànyasã sìgbè àgbè nyèa be èxlɔ̃ nène, mù nya be e la nyi àpe ètopòɖotɔ ɖo ènyuɛ̃a ŋuti, àpe àkɔfa lè siayicici ku ènuxàxa mè.

¹⁰Mù le gblɔ̃ be: «To e jia, mù la nɔ xɔ̀ ŋuti kɔ̀kɔɛ lè àmèhawo dòmè, eye, ɖèkajɛvi kè mù gbà nyi cã, mu la gbe bùbu xɔ̀xɔ lè àmègãxowo gbɔ ò.

¹¹Wo la kpɔ àmè ŋɔjè ènu mè kè mù nyia lè kòjoɖoɖo mè eye èfìɔviwo la kã yàa lè àpe ŋùkɔ̀.

¹²Ne mù bɔ̀nua, wo la nɔ̀tè kpɔ mù, ne mù le pò nupoa, wo la nɔ ɖoto, eye ne àpe nupoa le dìdìa, wo la sɔ àlɔ cɔ̃ woabe ènu.

¹³To ànyasã jia, mù la trɔ màkugbèɖe eye mù la gble ŋùɖo màvɔ ɖɛ na jìjimèviwo.

¹⁴Mù la nɔ kplɔ̀ dùkɔ̃wo, xixekɔ̀tawo la nɔ sumɔ mù.

¹⁵Ne èfìɔ sɛ̃ŋuwo sè àpe nyikɔa, vɔ̃vɔ̃ jènà woa ji; mù la nɔ ɖè ɖokoe nyè fiɔ àdɔ̀mèfatɔ lè àmèha dòmè gbà wɔ̀ kãlì lè àhùa gbe ji.

¹⁶Ne mù trɔ va àxomèa, mù la gbɔ̃jɛ̃ lè ànyasã gbɔ, ɖo e gbɔ nɔnɔa mu hɛ̃nà vevesèse ɖekpe va ò. Àmè ɖekpe mu nɔ̀nà ŋuzĩzĩ mè lè e gbɔ ò, vɔ̀a jìjɔɛ ku vivi sèse sɔ̃ŋu.»

¹⁷Kè mù bù ènu kèa ŋuti kpɔ lè ɖokoe nyè mè eye gbà jrò àpe èjìmè kpɔ be xòmèdodo ku ànyasã nana màku gbèɖea,

¹⁸jìjɔɛ kpɔkpɔ wu ì gã ŋutɔ lè yebe xlɔ̃ wɔ̀wɔ mèa, yebe àlɔ̀nudɔwo nana àdɔ̀kù màvɔ̀ gbèɖe, èdu nɔ̀nɔ kplàlàa kudo èa nana ènu mè ŋɔŋɔjè ku àdòdò gbàkudo àseŋukãkã ku ì so yebe ènyàwo ŋutia nana nyiɖiɖia vɔ̀a, mù la nɔ pòhla yì àfi sia àfi la ji lekè mù la sɔ ɛ̀ wɔ̀ èsrɔ̃ nyè nyɔnù ɖoa.

¹⁹Nyàwo ye, mù nyi ɖèvi ɖɔ̀huĩ ɖe va yì eye mù va xɔ̀ èkla nyuɛ̃tɔ ɖe;

²⁰àlo bòhũa, kè mù nyi àmè nyuɛ̃a, mù va jɔ̀ lè ŋutilã màɖoɖi ɖe mè.

²¹Vɔ̀ gãkea mù nya be nyè mu la teŋu xɔ̀ ànyasã to vo lè Mawu be ènunana ŋuti ò eye àmè kè gbɔ ènunana sona be nyanya nyi ènu mè ŋɔŋɔjè be jèsìdo ŋutɔ ŋutɔ, mù trɔ ɖoɖa Mawu gbɔ eye mù fãkue na ɛ̀ le gblɔ̃ ku èjì nyè keŋu be: