Read gen Sirasid 11 Bible Online

Sirasid 11 - gen bible

Sirasid 11

¹Wɔ̀amènɔ̀ kè sɔ ènyunyã bɔ̀bɔnà ye ɖokoe a ɖona tèpe, eye be kɔnà ètà yi èji, lè àmègãwo dòmè.

²Mù gbà kpɔ àmè be ŋùmè be nyɔ̃nyɔ̃ kpò, ne wò a kafu ì ò; nènè a ke a, mù gbà kpɔ àmè kpò, ne wò a crì ì ò.

³Ànyi hùe, lè ènu zòzròwo dòmè, vɔ̀ a ànyisì kè be nàna a vivi wu ènu ɖekpekpe.

⁴Mù gbà kò àmè kè mu do àwù nyuɛ̃ ò, eye àmè kè lè àyàɖùɖu mè a, mù gbà ɖì kòkòe na wò ò, ɖo a, Mawu be wɔ̀nàwo dãnaŋù do àmè, eye àmè ɖe mu teŋu nyã, wo jè ŋùkɔ ò.

⁵Èfìɔ gã àkpasɛ̃sɛ̃ wɔ̀tɔwo jè ànyi, eye àmè kèwo àmè ɖe mu susu ò a, woawo ye va xɔ̀ woa tèpe.

⁶Kplɔ̀tɔ gãwo gɛ̃ so woabe tèpewo, eye àmè xɔ̀ àsìwo trɔ̀ zũ kluviwo.

⁷Biɔ ènu gɔ̃mè sè cucugbɔ̃ a, gbɔ̀xue wò a kã ŋùmè na àmè.

⁸Mù gbà ɖo ènyà ŋuti, wàlɛbɛ ke wò mu sè ènyà gɔ̃mè ò; mù gbà ci ènyà ɖo ènù na àmè kè lè pò nupo ò.

⁹Mù gbà ɖo àdjrè kè mu kã wò ò a mè ò; mù gbà do ènu àmè kèwo mu ɖo xɔ̀sè ku èse ò a be ènyà mè ò. Àdɔ̀kùnu ɖoɖo ku wɔ̀amènɔ̀ nyinyi

¹⁰Èvi nyè, mù gbà wɔ̀ ènu sùgbɔ ɖodu ò, ne wò kplɔ̀ ènu sùgbɔ do a, wò mu la teŋu to lè woa mè ò. Ne wò lè pudù to àfi sia àfi ŋutɔ cã a, wò mu la kpɔ ènu ɖe la le ò. Ne wò le kãkã àpo ŋusɛ̃ a, wò mu la ɖùji gbèɖe ò.

¹¹Mi hlɔ̃na ŋutɔ, mi cina èji ɖo èdɔ̀ ŋuti, vɔ̀ a, mi mu kpɔna ènu kè mi le ji a ò.

¹²Amè ɖewo wò mu ɖo ŋusɛ̃ ò, eye wo hiã àlɔ̀do gà sia gàmè; ènu cã mu lè woa si ò, eye wo nyi wòamènɔ̀ ŋutɔ. Vɔ̀ a, Tɔhonɔ̀ lena ŋùkù ɖo woa ŋuti, eye be kɔna wo to so woabe ègbɔɖìɖi mè.

¹³E ɖènà woabe gogo fiɔ, eye be dãnaŋù do àmè sia àmè.

¹⁴Ènyuɛ̃ ku èvuɛ̃, [3]àgbè ku èku, èhìã ku àdɔ̀kù, ènu sia ènu so Tɔhonɔ̀ gbɔ.

¹⁵Ànyasã, ènunyãnyã ku èse a be jèsìdodo sona Tɔhonɔ̀ gbɔ; lɔ̃lɔ̃ ku ènyuɛ̃ wɔ̀wɔ be èmɔ̃wo sona e gbɔ.

¹⁶E ɖo vìvìti kè mè àmè kèwo mu ɖo xòsè ku èse ò a, wo buna ɖo a. Àmè kèwo èvùɛ̃ wɔ̀wɔ jɔ̀nà èjì na a, wo sĩnà ci èvùɛ̃ a mè.

¹⁷Tɔhonɔ̀ be ènyùɛ̃ wɔ̀wɔ yìnà àmè kèwo ɖona èto è awo gbɔ, eye yebe àsɔ̀mènyuɛ̃ kplɔ̀nà wo to èmɔ̃ nyuɛ̃wo ji.

¹⁸Amè ɖewo trɔ zũ ècitɔwo, ɖo a, wo bɔ̀ àdɔ̀kùnuwo ɖɛ̀; ènu kè la va kpe wo a ye nyi ekè a:

¹⁹wàlɛbɛ kè wo la gblɔ̃ be: “Fifì a, mù teŋu gbɔ̃jɛ̃, ne ma ɖù àgbè ku ènu nɔ̀ àmèsi kèwo nyi tɔ̀ nyè a.” Wàlɛ̀bɛ̀ kè wo mu susu ì ò a, ye wo la kù, la gble ènuawo keŋu ɖɛ̀ na àmè buwo. Mawu teŋu trɔ̀ ènuwo

²⁰Le ɖo èdɔ kè nyi[4] tɔ̀wò a ŋuti. Wɔ̀ ɛ̀ ku àpo ŋusɛ̃ blibo, ku ànùkua, kaka wò a sĩ.

²¹Èvùɛ̃wɔ̀tɔ be èdɔ mu dãŋù do wò ò; ɖoŋù ɖo Tɔhonɔ̀ ŋuti kpò, ne wò do veve èkè wò le wɔ̀ a. Ɖo a, e lè bɔ̀bɔ̀ɛ ɖe na Tɔhonɔ̀, ne be a trɔ wòamènɔ̀ kpàtà, sɔ̀ wɔ̀ ècitɔwo.

²²Tɔhonɔ̀ be sìtu yè nyi àmè sɛ̃na ɛ̀ a be àjɔ̀. Hùenu vi ɖe kpò be sɔ kɔ̀nà sìtu a ɖo e ji.

²³Mù gbà biɔ ɖokoe wò be: “Nukɛ ye hiã mù ò? Nukɛ ye hùe do mù ò?” ò.

²⁴Mù gbà gblɔ̃ be: “Ènu sia ènu sù àsi nyè vɔ̀; èvùɛ̃ kɛ ye la gbà teŋu kpe mù ò?” ò.

²⁵Lè jɔ̀gbènyuɛ̃wo mè a, wo ŋlɔ̃na be jɔ̀gbèvuɛ̃wo, eye, lè jɔ̀gbèvùɛ̃wo mè a, wo ŋlɔ̃nà be jɔ̀gbènyuɛ̃wo.

²⁶Vɔ̀ a, e lè bɔ̀bɔ̀ɛ ɖe na Tɔhonɔ̀, be ne tɔ̀tè kpɔ̀ àgbètɔ be èku gbè, ne be a sɔ ènu kè jè na ɛ̀ a na ɛ̀.

²⁷Lè gbledo be hùenu a, wo ŋlɔ̃na be àgbè mè be nyɔ̃nawo kpata. Ne àmè ku a, Wo ɖènà yebe wɔ̀nàwo keŋu be àsì xɔ̀xɔ̀ sia.

²⁸Mù gbà kpɔ àmè be e nyi sìtumè, jè ŋùkɔ̀ na yebe èku ò. Ne àmè ku vɔ̀ a, gbɔ̀xue wo jèna si àmè kè be nyi a. Cãcã nyuɛ̃ lè èha dodo mè

²⁹Amè flùtɔ̀wo ɖo àyè sùgbɔ, la sɔ flù wò. Mù gbà na, ne àmè ɖekpekpe kpò, ne gɛ̃ ɖo ji wò ò.

³⁰Ègòyitɔ lè sìgbè tèkle kè wo le, ɖo àjà mè, sɔ̀ lena èbuwo a nène. sìgbè bèkpɔɛ nène a, e la nɔ ɖia àpo ànyi jèje.

³¹E le tre èmɔ̃ na wò, la trɔ̀ ènyuɛ̃, [5]sɔ wɔ̀ èvùɛ̃, e la sì bàba ɖo ènu kɔ̀kɔ̀ɛwo.

³²Èzòklɛ̃ vi ɖe kpò va trɔna zũ èzò gã; ènuvuɛ̃wɔ̀tɔ̀ be gàmɔ̃ a kɔ̀nà èhũ ɖɛ.

³³Kpɔ ɖokoe wò ji, lè èvùɛ̃ wɔ̀tɔ be ŋùkɔ, ɖo a, e le ɖè ènu gblegble be susu, ey be la pòɖi àpo nyikɔ na tɛ̀gbɛ̀.[6]

³⁴Ne wò xɔ̀ àmèjro ɖo àxomè a, e la dɔ̃ àhòvi va cɔ̃ wò, e la bla èse ku àpo àxomètɔwo, eye wo la gblhùɛ do wò.