Read gen Sirasid 12 Bible Online

Sirasid 12 - gen bible

Sirasid 12

¹Mì mu gbà do èha ku àmè mà-vɔ̃ Mawu ò Ne wò jrò be yè a xɔ̀ àkpe, na ènyùɛ̃ kèwo wò le wɔ̀ a, jèsi àmè kè wò le wɔ̀ wo na a.

²Wɔ̀ ènyùɛ̃ na àmè vɔ̃ Mawu, eye àmè ɖe kòkò la ɖo e tèpe na wò: ne xɔ̀sètɔwo mu wɔ̀ ɛ̀ ò a, Tɔhonɔ̀ ŋutɔ̀, lè èji hũi la ɖo e tèpe na wò.

³Ènu nyuɛ̃ ɖekpe mù lè, kè èvùɛ̃wɔtɔ̀ kè lenabè na èvùɛ̃wɔ̀wɔ a la kpɔ̀ èmɔ̃ na, wàlɛbɛ kè be gbena àlɔ̀dodo wɔ̀amènɔ̀wo ò.

⁴Nɔ na ènu xɔ̀sètɔwo, eye mù gbà kè ènu do e mè, na àmè mà-vɔ̃ Mawu ò.

⁵Wɔ̀ ènyùɛ̃ na àmè kèwo bɔ̀bɔ̀nà woa ɖokoe a, eye mù gbà kè ènu dò e mè na ègòyitɔ kèwo mu vɔ̃na Mawu ò. Ɖo a, wo la sɔ ènyùɛ̃ kè wò wɔ̀ na wo a be èvùɛ̃ sɔ do àkpe na wò, zè èvè.

⁶Mawu kè lè èji hũi a mu lɔ̃na èvùɛ̃wɔ̀tɔ ò, ela ɖo e tèpe na àmè kèwo crì ì awò.

⁷Na ènu àmè nyuɛ̃wo eye mù gbà na ènu ɖekpe àmè vuɛ̃wo ò. Jè àyè na èxlɔ̃ vuɛ̃wo

⁸Ne ènuwo le zɔ̃ lè àgbè a mè nyuɛ̃ ɖe a, wo mu jènàsi èxlɔ̃wo ò; vɔ̀ a, ne ènuwo le sɛ̃ŋu a, èkɛ̃tɔ̀wo zena.

⁹Ne àmè le kpɔ̀ jìjɔ̀ɛ a, èkɛ̃tɔwo cina ŋuzĩzĩ mè; vɔ̀ a, ne àmè lè sè veve a, èxlɔ̃ a ŋutɔ cã sina jo lè e gbɔ̀.

¹⁰Mù gbà dojì ɖo èkɛ̃tɔ wò ŋuti gbèɖe ò, ɖo a, yebe èvùɛ̃ jɔ̀jɔ a lè sìgbè ègajɛ̃ nène; e nyɔ̃nà, ne wo mu le tutu ì ò a.

¹¹Ne e le bɔ̀bɔ̀ ye ɖokoe, eye be le xa, wàlɛbɛ kè be le zɔ̃ a ŋutɔ cã a, kpɔ ɖokoe wò ji, eye nɔ̀ àyè ji na ɛ̀. Nɔ̀ sìgbè àmè kè tutuna ègàjɛ̃ a nène; nyã kpò be ègajɛ̃ be èsìmè a la klo va yì gbè ɖèka.

¹²Mù gbà sɔ nɔ̀ àpo àxàdà mè gbeɖe, ne be a va tùtù wò jo, ne be a va xɔ̀ tèpe wò ò. Mù gbà sɔ̀ ɛ̀ wɔ̀ àpo gɔ̃mènɔ̀tɔ ò, ne mu nyi nène ò a, e la ji be yè a mù wò pu ànyi. Eye, gbàdà la yì, gbɔ̀xue wò la va ŋɔ̃ jè ènu kè ŋuti mù le sìa wò ɖo a mè.

¹³Àmè kɛ ye la xànu, ne èdã ɖù àmè kè gblena ku èdã, àlo, egbemè-lã ɖe ɖù àmè kè kpena àkɔ ku èlãwo ò?

¹⁴Amè ɖe mu la teŋu xànu, ɖo àmè kè le do èvùɛ̃wɔ̀tɔwo be èha a ta, wàlɛbe kè be ci èvùɛ̃wɔ̀tɔwo be àɖugbo mè ò.

¹⁵Ne àmè nyrãhũ le zɔ̃ ku wò a, mu la ɖè yebe ŋùmè vuɛ̃ a fiɔ wò gbeɖe ò; ne wò va jè ànyi a, e la nɔ̀ àzɔ̀ge na wò.

¹⁶Ènyà viviwo lè to lè ènu mè na èkɛ̃tɔ wò, vɔ̀ a, lè yebe èjì mè a, e le ji la tùtù wò ɖo èdo mè. Àpò ènu teŋu wɔ̀ kɔ̀bɛ na ɛ̀, kaka be la fã àɖàsì. Vɔ̀ a, ne e kpɔ èmɔ̃ gbe hũ kpò a, àpo èhũ ŋutɔ cã mu la sù na ɛ̀ ò.

¹⁷Ne gbledo ɖe va na wò a, e lava xoxo, be yè a do wò àlɔ̀; ekè a mè ye be la do èkpò àta mè na wò lè.

¹⁸Eye be la sɔ yebe ŋùkumè ŋutɔŋutɔ fiɔ wò; e la kɔ èta yì èji, la gblɔ̃ èɖi-nyàwo na wò; e la pò àsikpe, la nɔ konu hà, hà, ha!