Read gen Sirasid 13 Bible Online

Sirasid 13 - gen bible

Sirasid 13

¹Èmɔ̃ tetre nɔ̀nà ŋùkɔ̀ na àdɔ̀kùnɔ̀ ègòyitɔ Àmè kè tɔ àsi àŋɔ̃ a bàna èɖi. Àmè kè dona èha ku ègòyitɔ a va trɔna sìgbè ègòyitɔ ke nène.

²Ènu kè kpɛ̃ wu wò a, mù gbà kɔkɔ ɛ̀ ò; mù gbà do èha ku àmè kè sɛ̃ŋu, àlo, kpɔ̀ èci wu wò ò. Èkɔze ku ègàze la teŋu nɔ̀ èdu à? Ne wo lɔ woa nɔ̀nɔɛwo a, èkɔze a la gbã.

³Ne ècitɔ a wɔ̀ ènu nyãnyrã a, 1 ècitɔ a ye bina èjì; wɔ̀amènɔ̀ a ji àgbã a nɔ̀nà, eye be gbà ɖènà kuku cã.

⁴Ne e hiãna wò a, e la nɔ zã wò; ne wò jè èhìã mè a, e la ɖè àsi lè ŋuti wò.

⁵Ne ènu nɔ̀ àmèsiwo sù àsi wò a, e la nɔ̀ ku wò, eye be la ɖù wò pio.

⁶Ne e hiã wò a, e la nɔ blè wò ɖo e ŋuti, e la nɔ̀ kònu do wò, e la na ŋùɖo la nɔ̀ àsi wò, e la nɔ̀ do vivi ŋuti wò, eye be la nɔ̀ gblɔ̃ na wò be: “Nukɛ ye mù la teŋu wɔ̀ na wò ò?”

⁷E la do wò ŋùkpɛ̃ lè yebe ènu ɖùpewo. Wò cã, wo la zã àpo ègà keŋukeŋu, la kpe è na ènu ɖùɖu, sìgbè zè èvè, àlo, zè ètɔ̃ nène, eye be la hũhũ èta, la va nɔ kò wò. E yomè a, ne e kpɔ wò a, e la ɖè èkɔ̀ lè ŋuti wò.

⁸Kpɔ nyuɛ̃ ɖe, ne mù gbà ɖè àsi lè ɖokoe wò ŋuti, ne wo a flù wò, kaka ne wo a do wò ŋùkpɛ̃ ò.

⁹Ne àmè kpɛ̃kpɛ̃ ɖe kpe wò, ne wò a yi ènu ɖùpe a, nɔ̀ àzɔ̀ge, eye mù gbà ciji ò. Ekè a la na be e la nɔ zĩ ji wò kpe è.

¹⁰Ne wò le ciji a, e teŋu va ɖè wò to lè e mè. Vɔ̀ a, mù gbà yì nɔ̀ àzɔ̀ge boo cã ò, e teŋu va ŋlɔ̃be wò.

¹¹Mù gbà ji be yè a pò nupo na ɛ̀, sìgbè hati wò nène ò. Mù gbà xɔ̀ ènyà sùgbɔ kè be le gblɔ̃ a ji sè ò. Ɖo a, e sɔ ɛ̀ ku yebe ènukòko le do wò kpɔ̀ ye.

¹²Ènyà ɖekpekpe kè wò la gblɔ̃ a, mu la wla ɛ̀ ò, eye mu la ku ŋuzĩzĩ na wò, ne èkpò, wò la xɔ̀ ɖo e ta, àlo, ègà-kpa mè wò la yì ò[7].

¹³Kpɔ ɖokoe wò ji nyuɛ̃ ɖe, eye nɔ̀ ŋuzɔ̃, ɖo a, wò lè àfɔ̀ku mè.

¹⁴Ne wò sè ekè a lè àlɔ̃ mè a, fɔ̃. Lɔ̃ Tɔhonɔ̀, lè àpo àgbè a keŋu mè, eye fã yɔ ɛ̀, ne be a hlùɛ̃ wò gã. Ècitɔ ku wɔ̀amènɔ̀

¹⁵Ènu àgbèàgbè ɖekpekpe lɔ̃nà nɔ̀via, eye àgbètɔ cã wɔ̀nà nène a ke.

¹⁶Ènu àgbèàgbè ɖekpekpe dona èha ku nɔ̀via, eye àgbètɔ dona èha ku yebe èhavi.

¹⁷Èkà dodo kɛ̀ ye lè ègbevũ ku àlɛ̃vi dòmè ò? Nène a ye be lè, na èvùɛ̃wɔ̀tɔ ku àmè kè vɔ̃na Mawu a.

¹⁸Ŋutifafa mu lè ègbevũ ku àvũ dòmè, sɔ wu ècitɔ ku wɔ̀amènɔ̀ dòmè ò.

¹⁹Lè ègbe mè a, jàŋutawo be ènuɖùɖù le nyi ègbemè be èsɔ àkɛtɛ. Nène a ke a, wɔ̀amènɔ̀wo cã lè ècitɔwo be àsi mè.

²⁰Ɖokoebɔ̀bɔ̀ nyɔ̃naŋu na àmè kè jènà ye ɖokoe nù a, nène a ke ye wɔ̀amènɔ̀ nyɔ̃naŋu na ècitɔ cã.

²¹Ne ècitɔ ɖe ɖo kùxe a, èxlɔ̃awo dona ɛ̀ àlɔ̀; vɔ̀ a, ne wɔ̀amènɔ̀ jè ànyi a, èxlɔ̃awo mu kènà ènu dò e mè na ɛ̀ ò.

²²Ne ècitɔ ɖe je àgɔ̀ a, e ɖona ènyà xɔ̀ ɖo àkɔ na àmètɔwo. Ne e gbà le gblɔ̃ ènyà fùflu ŋutɔ cã a, àmèwo kafuna ɛ̀. Vɔ̀ a, ne wɔ̀amènɔ̀ ya gblɔ̃ ènyà fùflu a, wo kãna ŋùkumè na ɛ̀. Ne e gbà gblɔ̃ ènyà nyɔ̃ɛ̃ ŋutɔ cã a, wo mu kènà ènu do e mè na ɛ̀ ò.

²³Ne ècitɔ le po nupo a, àmè sia àmè ɖona èto, eye wo kafuna ènyà kè be gblɔ̃ a. Vɔ̀ a, ne wɔ̀amènɔ̀ ye le pò nupo a, àmèwo gblɔ̃nà be: “Amè kɛ e ya nyi ò?” Eye, ne e wɔ̀ dàda vi ɖe a, wo tùtùnà ɛ̀ ɖoɖa àkpa ɖèka.

²⁴Èci kpɔ̀kpɔ̀ a, ènu nyuɛ̃ ɖe ye be nyi; ne e nyi be e to èmɔ̃ nyuɛ̃ ji a. Vɔ̀ a, àgɔ̀jèjè ɖekpe mu lè wɔ̀amènɔ̀ nyinyi cã mè ò. Àmè kèwo mu vɔ̃na Mawu ò a, woawo ye kpɔna ɛ̀ bàɖà.

²⁵Ènu kè àmè ɖo ɖo yebe èjì mè a trɔnà yebe nɔ̀nɔmè le ènyuɛ̃ mè, àlo, lè èvùɛ̃ mè.

²⁶Ŋùmè kè lè jìjɔ̀ɛ mè a, le ɖè jìjɔ̀ɛ kè lè àmè a be èjì mè a fiɔ. Vɔ̀ a, mi ɖo la hlɔ̃, gbɔ̀xue mi a kpɔ èlododo kèwo fiɔ ènu àmè a.