Read gen Sirasid 14 Bible Online

Sirasid 14 - gen bible

Sirasid 14

¹Àdɔ̀kùnuwo zãzã to èmɔ̃ nyuɛ̃ ji Sìtu ɖèɖe ye nyi na àmè kè lena yebe àɖea, mu la ɖù àyà ɖo yebe vuɛ̃ ŋuti ò.

²Sìtu ɖèɖe ye nyi na àmè kè yebe jìjigbè mu do hùɛ do ò eye yebe èmɔ̃ kpɔkpɔ mu do è ŋùkpɛ̃ ò.

³Àlè kɛ àdɔ̀kùnu la ɖè na àŋɔ̀kutɔ ò? Nyɔna kɛ lè ècikpɔkpɔ mè ne wo mu lɔ̃ le zã ɛ̀ ò?

⁴Àmè kè le bɔ̀ ènu, vɔ̀ le tè ye ɖokoea, le bɔ̀ ɛ̀ na àmè bu, kudo yebe àdɔ̀kùnu woa, àmè buwo ye la va ɖù ènuawo be àgbè.

⁵Àmè kè sɛ̃ ètamè ɖo ye ɖokoe ŋutia, àmè kɛ be la teŋu wɔ̀ nyuɛ̃ na ò? Mu la kpɔ jìjɔɛ ɖo yebe àdɔ̀kùnu wo ŋuti ò.

⁶Funya funya do na àmè ɖokoea ènu ɖe gbà nyrã wu ìa? Miabe èku nyànyrã hɛ̃nà ètodɔ̃ va na mia ji.

⁷Ne àŋɔ̀kutɔ gbà le wɔ̀ nyuɛ̃ ŋutɔ cã àmè ɖokoe nu jèje ŋuti ye. Yebe àŋɔ̀kukua la va gbã ɛ̀ do kpò ye.

⁸Kudo yebe ènu mànya be ŋùmèa, mu lè èbò ɖe nu ò, e wɔ̀nà sìgbè mu le kpɔ àmè ɖe gbɔ eye be crìnà wo.

⁹Ènu màsù àmètɔ be nyi eye mu kpɔna jìjɔɛ so ènu kè nyi ye tɔ̀a ŋuti ò yebe àŋɔ̀kukua kplɔ̀ ɛ̀ ɖo èvuɛ̃ mè

¹⁰àŋɔ̀kukua mu nana ènu àmè ku èjro eye wo mu la kpɔ kpɔ̃nɔ lè yebe èkplɔ̃ ji ò. Kèsìnɔ̀nuwo be zãzã nyuɛ̃

¹¹Èvi nyè ne èmɔ̃ nu kpɔkpɔ lè àsi wòa, hɛ̃ ɖokoe wò nyuɛ̃ɖe eye wòa wɔ̀ vɔsa kè jèa na Mawu.

¹²Mù gbà ŋlɔ̀be be èku lè ò eye wò mu nya gàpòpo kè mè ye ò.

¹³Keŋu gbɔ̀xue wò la kua, wɔ̀ nyuɛ̃ na àpo èxlɔ̃, zɔ̃ ɖo àpo gomè ŋutia nyi àdɔ̀mè nyuɛ̃tɔ na ɛ̀.

¹⁴Mù gbà na ne nyɔna ne to ŋuti wò va yì ò, mù gbà na ne jèna wòa ne to ŋuti wò va yì ò.

¹⁵Wò mu la va ɖè àsi lè àdɔ̀kùnu wòwo ŋuti, eye wo la va zũ àmè buwo tɔ̀a?

¹⁶Na ènu, xɔ̀ ènu, kpɔ jìjɔɛ, ɖo lè èku yomèa, jìjɔɛ ɖekpe mu gbà lè ò.

¹⁷Ɖo àgbèa va yìnà sìgbè àlekè àwù donaxoa nène, èsea lè tɛ̀gbɛ̀dò: 'àgbètɔ la va ku'.

¹⁸Sìgbè àti vùdù nène, àmàkpa dɔ̃dɔ̃wo lè eji eye ɖìɖìawo gɛ̃na, nèneake be lè na àgbètɔwo cã yeŋu, àmè ɖewo le ku eye wo le jì àmè buwo.

¹⁹Ènu sia ènu kè àgbètɔ wɔ̀a nu la va yì, àmè kè wɔ̀ ɛ̀ cã la va yì sìgbè ènu kè be wɔ̀a ke nène.

²⁰Sìtu na àmè kè ku ɖo ènunyanya ŋuti eye be zɔ̃nà ɖo yebe ètopòɖowo ji.

²¹E biɔna ènunyanya be èmɔ̃ a ta sè eye e jrònà yebe ènyàwo mè kpɔ.

²²E zɔ̃nà yebe àfɔ̀topewo sìgbè àdèlã nène, e ɖiana ɛ̀ lè èmɔ̃ kè be la toa ji.

²³E kpɔna ènu to yebe flɛsɛ̀ nu, eye be ɖona èto lè yebe hɔ̃tru ji.

²⁴E lena ŋùku ɖo àfi kè be lèa eye ŋùku nɔ̀nà yebe nɔ̀pea ji.

²⁵E ɖona yebe nɔ̀pea ɖo ènunyanya gbɔ eye be nɔ̀nà nyɔna be nɔ̀pe.

²⁶Eye be ɖona yebe àtɔ̃ ɖo ènunyanya be àlɔ̀zɛ̃awo mè,

²⁷E bènà ɖo yebe vɔ̃vɔ̃lì gɔ̃mè. E kpɔ na e ji lè zòzo mè eye be nɔ̀nà yebe gogoa mè.