Read gen Sirasid 15 Bible Online

Sirasid 15 - gen bible

Sirasid 15

¹Àmè jɔ̀jɔɛa be èfɛ̃tu Àmè kè vɔ̃na Tɔhonɔ̀a nɔ̀nà àgbè to e ji, àmè kè kpɔna èsea jia, ɖona ènu nyanya.

²Sìgbè èvi-nɔ̀ nènea, e la va dogò è, e la xɔ̀ ɛ̀ sìgbè nyɔnù tùgbɛ̀jɛ kè be ɖèa nène.

³E la nyi kudo ànyasã eye be la sɔ ènu nyanya sɔ ɖɔpò na ɛ̀.

⁴Ne e likè ɖo e jia, mu la hũhũ gbèɖe ò, ne e kãɖo e jia, mu la ɖù ŋùkpɛ̃ gbèɖe ò.

⁵E la sɔ ɛ̀ yɔ àmè kɔkɔ wu ye tɔ̀wo, ne e le pò nupo lè bɔ̀bɔ̀pea e la kpe ɖo e ŋuti.

⁶E la kpɔ jìjɔɛ gbãgo eye yebe nyikɔa la nɔ̀ ànyi tɛ̀gbè ɛ.

⁷Ènu tovò wɔ̀tɔwo mu la ɖo ènunyanya gbèɖe ò, àmè màɖo xɔ̀sewo ku èsewo mu la kpɔ ɛ̀ gbèɖe ò.

⁸Ènyà dìdì boo lè àmè kèwo ŋùku gã lè èta ŋuti na woa gbɔ, eye àjèɖàtɔwo mu la ɖo ŋùku ì gbèɖe ò.

⁹Àmè màɖo èsewo ku àmè màɖo xɔ̀sewo be kàfù kafu na Mawua nyi ènu kè wo mu la teŋu susu gbèɖe ò.

¹⁰Ènunyanya ye kpena ɖo àmè ŋuti ye be teŋu sɔ kafu na Mawu; Mawu ŋutɔ sɔna ɛ̀ dona àmèa mè. Àgbètɔ be vòvo kpɔkpɔ

¹¹Ne wò jo lè èmɔ̃ jɔ̀jɔɛa jia, mù gbà sɔ ɛ̀ ɖo Mawu ji ò, ɖoa ènu kè Mawu gbea mu la gbà teŋu wɔ̀ ɛ̀ ò.

¹²Mù gbà gblɔ̃ be: 'E ye kplɔ mù do èvuɛ̃ mè ò' ɖoa mu hiã àmè màɖo xɔ̀sewo ku àmè màɖo èsewo ò.

¹³Mawu crìnà èvuɛ̃ ɖekpekpe eye yetɔ̀wo mu la wɔ̀ ènu tovò na ɛ̀ ò.

¹⁴Lè gɔ̃mèjèjea, Mawu ɖo àmè, ye be sɔ ɛ̀ ɖo ènu.

¹⁵Ne wò jroa, wò la zɔ̃ ɖo èsea ji. Ne wò la trɔ zũ yetɔ̀a, e la so gbɔ wò.

¹⁶E sɔ èzò ku èsì ɖo ŋùkumè na wò. Wò ŋutɔ ye la cã kè wò jroa.

¹⁷E sɔ èku ku àgbè ɖo ŋùkumè na àgbètɔwo, to woabe èjro jia wo la wɔ̀ cãcã ne ekè jro woa.

¹⁸Ɖo Tɔhonɔ̀ be ènunyanya lòlò; E ɖo ŋusɛ̃ eye be trì àkɔ, e kpɔna ènuwo keŋu,

¹⁹E trɔna ŋùmè ɖoɖa àmè kèwo vɔ̃na ɛ̀a gbɔ. Ye ŋutɔ nya àmè ɖe sia ɖe be èdɔwo.

²⁰Mu ŋlɔ̀nà àmè ɖekpekpe be bèa nyi àmè màjɔ̀ màjɔ ò, mu ɖè èmɔ̃ na àmè ɖekpe be bèa wɔ̀ èvuɛ̃ ò.