Read gen Sirasid 19 Bible Online

Sirasid 19 - gen bible

Sirasid 19

¹Èdɔwɔ̀tɔ kè nùnà àhà muna, mu kpɔna èci ò, eye àmè kè mu ɖona kɔpe na yebe ènuwo òa, lè gɛ̃ blɛ̀wù blɛ̀wù vɔ̀a ku kãkã ɖo eji.

²Àhàsu nùnu ku nyɔnù jiji, kplɔ̀nà àmè yìnà fùflu mè, ne wò gbà nyi ènunyatɔ ŋutɔ cã. Eye àmè kè le wɔ̀ àhasìa, le ɖè ye ɖokoe kpɔ̀tɔ̀.

³Ènu ŋuawo be wɔ̀wɔa, kplɔ̀nà àmè yìnà èku mè, eye àvlɔkuiwo sɔna yebe ŋutilã vovoa ɖùnà ècrɔ̃. Àfɔ̀ku lè nupo sùgbɔ mè

⁴Àmè kè xɔ̀nà àmè ji sè kabaa ɖènà yebe èkè màli màli fiɔ, àmè kè le wɔ̀ ènu vuɛ̃a le do hùɛ do ye ŋutɔ ɖokoe.

⁵Àmè kè jɔ̀nàjì ɖo èvuɛ̃ ŋutia, wo la dohùɛ do è.

⁶Àmè kè crì nupo pòpo sùgbɔa le ɖè ye ɖokoe to lè èvuɛ̃ mè.

⁷Mù gbà gblɔ̃ ènu kè wo gblɔ̃ vɔ̀ ò, eye wò mu la bu ènu ɖekpe gbèɖe ò.

⁸Mù gbà gblɔ̃ ènu ɖeti so kɛ̃tɔwo àlo èxlɔ̃wo ŋuti ne mu nyi be wò kpɔ ɛ̀ be àpo nupo màpòa la gble ènu ò.

⁹Ɖoa, ne àmè ɖe sè ènu kè wò gblɔ̃a, e la va jè àyè na wò, ne e va ɖo èmɔnu kpɔkpɔa, e la sitè ɖo ŋuti wò.

¹⁰Ne wò sè tome tome ɖea, mù gbà sɔ ɛ̀ wɔ̀ ènyà ò. Nɔ̀ ɖokoe wò mè, mu la na be wò la wo ò.

¹¹Tome tome sèsea dona àyà na fùflutɔwo, sìgbè nyɔnù be èvi jìji be gàmè nène.

¹²Ènyà kèawo be wawla nana veve sèse ènu tovò wɔ̀tɔ, e gbà lè sìgbè àŋù kè ŋɔ àta na ɛ̀ nène. Le ŋùku ɖo ènu kè wo le gblɔ̃a ŋuti

¹³Ne wò se wo le gblɔ̃ ènyà bàɖa ɖe so èxlɔ̃ wò ŋutia, biɔ ɛ̀ ènyà so ye ŋuti, tamu nyɔ òa mu wɔ̀ ènu ɖekpe ò. Ne e nyi be e wɔ̀ ɛ̀a, mu la gbà wɔ̀ ɛ̀ ke ò.

¹⁴Ne wo sɔ ènyà ɖo tɔ̀wò ŋutia be e gblɔ̃ ènyà bàɖa ɖea, biɔ ɛ̀ sè, tamu nyɔ òa, mu gblɔ̃ ènyà ɖekpe ò. Vɔ̀a ne e nyi be e gblɔ̃ ɛ̀, mu la gbà va wɔ̀ ɛ̀ ke ò.

¹⁵Àɖe vuɛ̃ɖìwo sùgbɔ, bòhũa, biɔ èxlɔ̃ wò ènyà sè, eye mù gbà xɔ̀ àmè buwo be ènyà ji sè ò.

¹⁶Wo la teŋu gblɔ̃ ènyà bàɖawo, vɔ̀a wo mu la hɛ̃ àdòdò ò. Àmè kɛ ji eŋua mu jɔ̀ ɖo kpɔ ò?

¹⁷Biɔ àmèa ènyà sè nyuɛ̃ɖɛ gbɔ̀xue ne wòa do hùɛ do è, eye wòa sɔ kpɔ̀tɛa do àsi mè na Mawu. Ènunyanya àdodoe ku gbegblea

²⁰Ènunyanya àdodoea ye nyi Mawu be vɔ̃vɔ̃ eye ènu nyanya be gɔ̃mè jèjea ye le nyi Mawu be èseawo ji wɔ̀wɔ ɖo.

²²Vɔ̀a èvuɛ̃ wɔ̀wɔa mu nyi ènu nyanya ò, eye woa ɖo èto àmè mà ɖo xɔ̀se kudo èsewoa mu kpɔ nyi ènu nyanya jiji ò.

²³Wɔ̀na ɖewo jè na cìcri eye wo mu jrona àmè cã ò. Àmè kè gbe ènu nyanya a, wɔ̀nà ènu sìgbè àmè kè si susu mu lè òa nène.

²⁴Ènunyatɔ kè xɔ̀nà Tɔhonɔ̀a xɔ̀ àsì wu bibitɔ ɖe kè mu nya Tɔhonɔ̀ be èsewo ò.

²⁵Bibi tɔ̀hɛ ɖe lè kè teŋu kplɔ̀ àmè yì màjɔ̀ màjɔ mè, e la to èmɔ gɔ̃glɔ̃ ji sɔ ji yebe jèna.

²⁶Wo kpɔna àmèwo zɔ̃nà lè gòzò mè ku ŋùkumè hɔ̃hlɔ̃, vɔ̀a woabe èjì dɔ ku àyèmènu wɔ̀wɔ.

²⁷Wo bɔ̀bɔ̀nà èta eye wo wɔ̀nà woa ɖokoe sìgbè ètokunɔ̀ nène, vɔ̀a ne wo mu gbà le kpɔ woa gbɔ ò kpɔòa, wo gbà yìnà èji kpe è.

²⁸Àmè ɖewo lè woa mèa wo mu wɔ̀nà ènu bàɖa ò; ɖo ènu kè ŋutia ŋusɛ̃ mu lè woa si ò, vɔ̀a ne wo kpɔ èmɔnu kpòa wo wɔ̀nà ɛ̀

²⁹To àmè be nɔ̀nɔ mè ji ye wo jènàsi àmè, wò la kpɔ ɛ̀ gbɔ̀xue wò la nyã be e nyi àmè ŋutɔ ŋutɔ.

³⁰yebe àwù dodo, yebe ènu kòko, yebe àzɔ̃lì zɔ̃zɔ̃, ye la ɖè àmè kè ŋùku mè be nyia fiɔ.