Read gen Sirasid 2 Bible Online

Sirasid 2 - gen bible

Sirasid 2

¹Xɔ̀sètɔ lè dodokpɔ mè Èvi nyè, ne wò be yè a sũmɔ̃ Àpetɔ a, jràɖo, ne wò to dodokpɔwo mè.

²Do ŋusɛ̃ ɖokoe wò, ne wò a nɔ àgbè sɔ̀sɔ̀ɛ, mù gbà tito lè ɖokoe wò mè ò.

³Tɛ ɖo Tɔhonɔ̀ ŋuti, mù gbà dɔ̃ jo, lè ye ŋuti o, eye wò la wu àpo àgbè ŋùkèkèwo nu lè ènu jè e ji na àmè mè.

⁴Xɔ̀ ènu kèwo kpata la jɔ̀ ɖo ji wò a, eye, wàlɛbɛ kè wo la ɖiɖi wò ɖo ànyi a, hɛ̃ àdòdò.

⁵Mù gbà ŋlɔ̃be be wo dona sìka kpɔ, ku èzò ò; àmè kèwo jènà Àpetɔ a be ŋùmè a, wo la sɔ àmè ɖiɖi ɖo ànyi, do woa cã kpɔ.

⁶Dojì ɖo Mawu ŋuti, eye e la xɔ̀ na wò; to èmɔ̃ jɔ̀jɔ̀ɛ, eye wò a kpɔ e sinu.

⁷Mì, àmè kèwo vɔ̃na Àpetɔ a, mì kã ɖo yebe ŋuzĩzĩ kuku a ji, eye mì mu gbà trɔ̀ le e yomè, ne mì a jè ànyi ò.

⁸Mì, àmè kèwo vɔ̃na Àpetɔ a, mi kã ɖo e ji, eye, mìabe àjɔ̀ a mu la hòe do mì ò.

⁹Mì, àmè kèwo vɔ̃na Àpetɔ a, mì kpɔ èmɔ̃ na yebe nyɔ̃na, jìjɔ̀ɛ mà-gù gbèɖe, ku yebe ŋuzĩzĩ kuku.

¹⁰Mi kpɔ jɔ̀jɔ̀mè kèwo va yì a ɖa be: àmè kè ye dojì ɖo Àpetɔ a ŋuti, eye be kpɔ ŋùkpɛ̃ kpɔ ò? Àlo, àmè kɛ ye sumɔ̃ Àpetɔ a, eye Àpetɔ a gble è ɖɛ kpɔ ò? Àlo, àmè kɛ ye fã yɔ Àpetɔ a, eye Àpetɔ a do ètoku e mè kpɔ̀ ò?[1]

¹¹Ɖo a, Àpetɔ a kɔ̀nà àdɔ̀mè, eye be kuna ŋusiszĩ na ye tɔ̀wo, e sɔna woabe àgɔ̀jèjewo kèna wo, eye be hlùɛ̃nà wo gã, lè vevesèse be gàmè.

¹²Bàbà na yàkàmèwo, ɖɔ̀ɖɔ̀ɛnɔ̀wo, ku nuvuɛ̃wɔ̀tɔ kèwo le zɔ̃ èmɔ̃ ève ji a.

¹³Bàbà na vɔ̃vɔ̃nɔ̀tɔ kè mu kã ɖo Àpetɔ a ji ò a; Àpetɔ a be èkpatɔ̃tɔ̃ mu la nɔ̀ e ji ò.

¹⁴Bàbà na mì, àmè kèwo bu veve do ènu a! Nukɛ ye mì la wɔ̀, wàlɛbɛ kè Àpetɔ la va biɔ àkɔ̃ŋuta ò?

¹⁵Àmè kèwo vɔ̃na Àpetɔ a, wo mu sinatè ɖo ènyã kè Àpetɔ a gblɔ̃ a ŋuti o. Àmè kèwo lɔ̃nà ɛ awo nɔ̀nà àgbè, sɔ zɔ̃ ɖo ènu kè be gblɔ̃ a ji.

¹⁶Àmè kèwo vɔ̃na Àpetɔ a jina be yèwo a jè yebe ŋùmè, eye wo zɔ̃nà ɖo yebe èseawo ji.

¹⁷Àmè kèwo vɔ̃na Àpetɔ a nɔ̀nà ègbè sɔ̀sɔ̀ɛ na ɛ̀; wo jènàsi woabe àgɔ̀jèje, lè Àpetɔ a be ŋùmè.

¹⁸E nyɔ̃ be wo ne gɛ̃ jè Àpetɔ a be àsi mè, wu be wo ne gɛ̃ jè àgbètɔwo be àsi mè, ɖo yebe ŋuzĩzĩ kuku a sɔ̀ ku yebe gãnyinyi a.