Read gen Sirasid 20 Bible Online

Sirasid 20 - gen bible

Sirasid 20

¹Nupo pòpo kudo ènubɔ̀kpo Ŋùkumè kãkã ɖewo mu jènà eji nyuɛ̃ɖe ò; vɔ̀a àmè kè bɔ̀nà ènu kpòa, ɖènà ènunyanya be jèsì fiɔna.

²Vɔ̀a ŋùkumè kãkã nyɔ nyuɛ̃ɖe wu ne woa le àdɔ̀mèze ɖɛ.

³Àmè kè jèsi yebe àgɔ̀jèjewoa ɖènà ye ɖokoe to lè tìtɔ̀ titɔ mè.

⁴Àmè kè ji be yèa xɔ̀ yebe jèna ku àkpasɛ̃sɛ̃a, wo la kpɔ ɛ̀ sìgbè kobonɔ̀ kè le ji la do àvũ na tùgbɛ̀jɛvi ɖea nène.

⁵Àmè ɖewo bɔ̀nà ènu ne woa sɔ ɖè woabe ànyasã fiɔ, eye àmè ɖewo ya ɖènà woabe hɔ̃vi nyinyi fiɔna to nupo fuu pòpo mè.

⁶Àmèhasòsoe èvè ye lè kèwo bɔ̀nà ènua: àmè kèwò mu ɖo ènu ɖe la gblɔ̃ ò kudo àmè kèwo nyana gà kè mè wo la pò nupoa.

⁷Àmè nyanua tɔnatè kpɔna gàmè nyuɛ̃ kè be la pò nupoa, vɔ̀a ègòyitɔ ya tànàsi nène be èmɔnua va yìnà.

⁸Àmè kè pònà nupo sùgbɔa nana wo crì nà ɛ̀ kaba eye àmè kè sɔ yebe àcɛ̀ kpàkpa le viɔ̃ àmè nua wo mu gba kpɔna e gbɔ ò. Vòvò toto do ènu mè

⁹Gà ɖewo mèa jɔ̀gbèvuɛ̃ hɛ̃nà ènyuɛ̃ vana eye àdɔ̀kùnuwo hɛ̃nà gbledo va àmè ji.

¹⁰Ènunana ɖewo lèa wo mu ɖènà àlè ò eye èɖewo ya ɖènà àlè zè èvè.

¹¹Ɖokoe dodo ɖo èjia, la kplɔ̀ wo yì ànyijèje mè vɔ̀a ɖokoe bɔ̀bɔa ɖènà àmè be nyiɖìɖi fiɔna.

¹²Àmètafutɔ plènà ènu sùgbɔ ku ègà viɖe vɔ̀a e va tuna ɛ̀ zè gbɔ̀ zè adrɛ̃.

¹³Lè ènunyatɔ be nupo viɖe mèa wo sɔna èɖe lè emè na ɛ̀ vɔ̀a, àmè mànya ènu ya tona èmɔ ɖekpekpe ji coa, wo mu kãmana na ɛ̀ ò.

¹⁴Ènu ke sùkunɔ̀ nana àmèa mu ɖènà àlè ò, ɖo ènu ɖèka kè kpò ye wò la sɔ na ɛ̀ eye kpò be le nɔ̀tè kpɔ.

¹⁵Ne e na ènu viɖea e trɔ zũ èhlɔ̃ be ènyà, e la jra ɛ̀ pòhla sìgbè ègàɖotɔ nène. Ne e do ènu ɖe egbèa, èsɔ̀a e la trɔ biɔ ɛ̀, nène be àmèa wo crì nà ɛ̀.

¹⁶Sùkunɔ̀a gblɔ̃nà be: 'Nyè mu ɖo èxlɔ̃ ò. Àmè ɖekpe mu do jèsì ènyuɛ̃ nyèwo ò. Àmè kèwo ɖùnà àpe kpɔ̃nɔa wo nyi àkpemàdotɔ.

¹⁷Vɔ̀a àmèwo kpata kònà nènemɛa. Kù ɖo àɖe be zãzã ŋuti

¹⁸Àfɔ̀ kɛ̃klɛ̃ lè èkpe be èmɔ jia nyɔ wu àɖe be nupo pòpo fuu. Àmèvuɛ̃wo be ànyijèjea sɔ̀nà kaba.

¹⁹Àmè kè mu xɔ̀ kpakpla òa, lè sìgbè èxotù-nyà kè mu sò èmɔ òa nène, eye wo kpɔna leke be nɔ̀nɔmèa lè sùkunɔ̀wo gbɔ.

²⁰wo mu ɖona èto èlododo kè to so sùkunɔ̀ be ènu mè ò, ɖo mu gblɔ̃nà ɛ̀ ɖo eji tututu ò.

²¹Àmè ɖewo be wɔ̀amènɔ̀ nyinyi nana be wo teŋu wɔ̀nà èvuɛ̃, wo la teŋu dɔ̃ àlɔ̃ bɔ̀kɔ̀.

²²Àmè ɖewo bùnà woabe àgbèa ɖo àgbètɔ be bùbu ŋuti eye wo bùnà ɛ̀ lè àmè mànya ènuwo be ŋùkɔ̀.

²³Àmè ɖewo to àmè be bùbu ŋutia ɖona ŋùgbe ne àmè eye lè nène be wɔ̀na mèa wo ɖona kɛ̃tɔ na woa ɖokoe.

²⁴Àjèɖàɖa nyi nɔ̀nɔmè bàɖà ɖe kè hɛ̃nà ŋùkpɛ̃ va àmè ji eye wo kpɔna àlekè be nyàwo lè ènu mà nyatɔ be ènu mè.

²⁵Fìãfìtɔa nyɔ wu àmè kè le ɖàjè ètèmàtɔa, vɔ̀a wo àmè èvèa kpata lè cɔ̃crɔ̃ be èmɔa ji.

²⁶Àjèɖàtɔ be jijia kplɔ̀ na ɛ̀ yìnà ègbɔɖìamè mè, yebe ŋùkpɛ̃ nɔ̀nè eji sɔ yì. Ànyasã be àlè ku yebe èdɔdoàsi

²⁷Ènu viɖe kpò sù la do ènunyatɔ ɖo ji eye àmè nyanua la kpɔ àlè ɖùɖu lè àmègãwo gbɔ.

²⁸Àgblèdàtɔ nyuɛ̃a nana yebe àvà kèkènà ta, nènea ke àmè kè kpɔna gomè lè àmègãwo gbɔa, xɔ̀nà yebe àgɔ̀jèjewo be sɔsɔkè.

²⁹Ènunana vòvòwo gbãnà ŋùku na ènunyatɔwo eye sìgbè èsɔga lè ènu nènea, ŋùmèkãkã mu gbà nɔ̀nà ànyi ò.

³⁰Ànyasã kè wo wla ku kɛ̀sìnɔ̀nu kè lè wawla mèa àsìxɔ̀xɔ kɛ gbà lè woa si ò?

³¹Àmè kè wla yebe sùkunɔ̀ nyinyia, xɔ̀ àsì wu àmè kè wla yebe ànyasã a.