Read gen Sirasid 21 Bible Online

Sirasid 21 - gen bible

Sirasid 21

¹Na àsà èvuɛ̃ Èvi nyè, wò jè àgɔ̀a? mù gbà wɔ̀ ɛ̀ ke ò eye biɔ àgɔ̀jèje wòa be sɔsɔkè.

²Sìgbè lè èdã be ŋùkɔ̀ nènea, si lè èvuɛ̃ gbɔ, ɖo ne wò tè gogo èa e la ɖù wò; yebe àduwo lè sìgbè jãŋùta tɔ̀ nène sɔ̀gbè la crɔ̃ àgbètɔ be àgbè.

³Èse ji dàda ɖekpekpea lè sìgbè àdèkpe ɖaɖa nuvè nène eye àbì kè be dona àmè ŋutia mu ɖo àtikè ò.

⁴Èhlɔ̃dãnu wɔ̀wɔ ku ègòyiyia kãkã àdɔ̀kùnuwo, nènea ye ègòyitɔ be àsuxuea la gbã yeŋu.

⁵Kuefã kè le to lè wɔ̀amènɔ̀ be ènu mèa Tɔhonɔ̀ sènà ɛ̀ zè ɖèka, eye mu tɔnatè ne bèa sò jɔ̀jɔɛ na ɛ̀ ò.

⁶Àmè kè crìnà ètodɔ̃dɔ̃a le zɔ̃ vuɛ̃wɔ̀tɔ be topewo, vɔ̀a àmè kè vɔ̃na Tɔhonɔ̀a, la trɔ lè yebe èjìmè.

⁷Ènyà vivi gblɔ̃tɔa dona jèsi ye ɖokoe lè àfi sia àfi, vɔ̀a àmè kè bùnà ètamèa dona jèsi yebe àgɔ̀jèjewo.

⁸Àmè kè tù yebe àxue ku àmè bu be ègàa, lè sìgbè àmè kè le fɔ̀ èkpe ɖɛ na ye ŋutɔ be èyɔ̀doa nène.

⁹Àmè vuɛ̃ɖìwo be èhabɔ̀bɔ lè sìgbè àbùnekɛ̀viwo be bɔ̀bɔ nène, wo la fiɔ̃ lè èzò be àɖe ku èzò mè.

¹⁰Nuvuɛ̃wɔ̀tɔ be èmɔ̃ a le gbàjà gbà zìɔ̃, vɔ̀a lè yebe vɔ̀vɔnua èku be èdo gãɖe lè. Ènunyatɔ ku sùkunɔ̀ be nɔ̀nɔmè

¹¹Àmè ke wɔ̀nà ɖo èse jia, ɖùnà yebe susu ji eye Tɔhonɔ̀ vɔ̃vɔ̃a kplɔ̀nà àmè yìnà ànyasã mè.

¹²Àmè kè bìbi hùetè doa mu la teŋu xɔ̀ kpàkpla ɖekpe ò, vɔ̀a bìbi ɖe lè kè hɛ̃nà ènuhàha sùgbɔ và na a.

¹³Ènunyatɔ be àdàŋùa lè sìgbè èsìɖɔɖɔ gã nène eye yebe ètopòɖoa lè sìgbè àgbèsi jɔ̀pe nène.

¹⁴Sùkunɔ̀ be èjìa lè sìgbè èkɔ-ze gbãgbã nène kè mu la teŋu xɔ̀ àdàŋù ɖekpe ò.

¹⁵Àmè kè xɔ̀ kpàkpla sènà ànyasã be ènyà, e xɔ̀nà ɛ̀ be ɖona èkpe e ji. Vɔ̀a ènu mànyatɔa sènà ɛ̀a? Mu jɔ̀nà jì na ɛ̀ ò, ye na e sènà ɛ̀ ɖo èto godo.

¹⁶Sùkunɔ̀ be ènyà gbɔ̃gblɔ lè sìgbè àgbã kpɛ̃kpɛ̃ lè èmɔ̃ ji nène, vɔ̀a wo kpɔna ŋùjèje lè ènunyatɔ be ènuyiwo ji.

¹⁷Lè èhabɔ̀bɔ mèa, wo jina la ɖoto ènunyatɔa be ègbè eye lè èjì mè, wo dènà ŋùgblè so yebe ènyàwo ŋuti.

¹⁸Lè sùkunɔ̀ be ŋùku mèa, ànyasã lè sìgbè àxue gbãgbã nène, eye sɔɖù ɖekpe mu nɔ̀nà ènumànyatɔ be àɖàŋù ɖoɖo mè ò.

¹⁹Ènu kpàkplaa lè sìgbè kɔ̀sɔ̀kɔsɔ lè àfɔ̀wo nène na sùkunɔ̀a ku kpɛ̃ŋukpɛwo lè àlɔ̀tinu nène

²⁰Sùkunɔ̀ be nukòkoa yìnà ji sɛ̃sɛ̃ɖe ku àpa vɔ̀a ènunyatɔ ya kònà ènu zaaɖe kpò.

²¹Sìgbè sìka be àcɔɖoɖo nènea, nène ye nyi ènu kpàkpla na ènunyatɔ kè kònà ènu zaaɖe kpòa.

²²Sùkunɔ̀a ɖona àmè be àxomè ènumànyatɔ̀, vɔ̀a àmè kè jèsi ye ɖokoea, wɔ̀nà ɛ̀ kudo bùbu.

²³Sùkunɔ̀a ɖona àxòmè ku ŋùku sãsã, vɔ̀a àmè kè xɔ̀ kpàkpla nyuɛ̃ɖea wɔ̀nà ɛ̀ kudo bùbu

²⁴Àmè kè ɖona èto ènyà lè èxɔ̀ gɔ̃mèa nyi kplamàsè, vɔ̀a àmè kè nya ènua kpɔna be e nyi ŋùkpɛ̃.

²⁵Nupopòtɔwo be ènuyiwo gblɔ̃nà ènyà kèwo àmèwo gblɔ̃ vɔ̀a, ènunyatɔwo be ènyàwo ya wo dànà wo kpɔ.

²⁶Sùkunɔ̀wo be èjì lè woabe ènu mè eye ènunyatɔwo ya be ènu lè woabe èjì mè.

²⁷Ne àmè nyrãku sɛ̃kpɛ̃ na yebe kɛ̃tɔa ye ŋutɔ ɖokoe tutu ye be le sɛ̃kpɛ̃ na.

²⁸Àmègbètɔa pònàɖi yebe àmè nyinyi eye àmè kèwo trɔ do ɛ̀a, crìnà ɛ̀.