Read gen Sirasid 22 Bible Online

Sirasid 22 - gen bible

Sirasid 22

¹Kuviɔ̃tɔ Kuviɔ̃tɔa lè sìgbè èkpe jè àɖrũ kè àmèwo sɔ dãŋùgbea nène.

²Kuviɔ̃tɔa sɔ̀ kudo èmikɔ̃ eye àmè ɖekpekpe kè lea, hũhũna àlɔ̀. Ɖèvi kèwo mu wɔ̀nà ènunyuɛ̃ɖe òa

³Ɖèvi kè mu xɔ̀ kpàkpla nyuɛ̃ òa, nyi ŋùkpɛ̃ na ètɔa, eye yebe nyɔnùvi jìjia gbà nyrã wu.

⁴Nyɔnùvi kè sènà àmè be ègbèa, la kpɔ èsrɔ̃ la ɖè, vɔ̀a ekè dona àmè ŋùkpɛ̃a nyi vevesèse na yebe àjìtɔwo.

⁵Nyɔnù àmè màbùtɔ nyi ŋùkpɛ̃ na ètɔa ku èsrɔ̃a eye woa dòmètɔ ɖekpe ma do bùbu e ŋuti ò.

⁶Ènyà ɖekpekpe kè wo la gblɔ̃a, lè na ɛ̀ sìgbè èhàjìji lè ècɔxɔ mè nène, vɔ̀a ànyasã ye le nyi be woa nɔ jɔ̀ àmè ku èba gà sia gàmè. Sùkunɔ̀ be àtikè ɖe mu lè ò

⁹Ènufiɔfiɔ sùkunɔ̀a lè sìgbè àtùkpã gbãgbãwo be caca nène àlo sìgbè wo fɔ̃ àyè-lɔ̃-dɔ̃tɔ ɖe nène.

¹⁰Ènyà sɔ na sùkunɔ̀a lè sìgbè woa fɔ̃ àmè kè àlɔ̃ le mua nène eye ne e fɔ̃a, e la biɔ be nukɛ le jɔ̀ màa?

¹¹Fã àvi na àmè ke kua ɖo e jò lè kɛ̃klɛ̃a gbɔ, fã àvi na sùkunɔ̀a ɖo ènunyanya hùetè do è. Mù gbà fã àvi veveɖe ɖo àmè kè kua ŋuti ò ɖo e kpɔ jɛ̃gbɔ̃gbɔ̃, ɖoa eku nyɔ wu sùkunɔ̀ be àgbè nɔ̀nɔ.

¹²Ŋùkèkè adrɛ̃ ye wo sɔ wɔ̀nà ècɔ na àmè kè kua, lè sùkunɔ̀ kudo àmè nyrãku tɔ̀ gomèa woabe àgbèzã kpata nyi ècɔ.

¹³Mù gbà gũ àpo gàmè ɖo sùkunɔ̀ ŋuti ò eye mù gbà doha kudo àmè mànya ènu ò; kpɔ ɖokoe wò ji lè ŋuti ne mù gbà jè tìtɔ̀ titɔ mè ò eye mù gbà va pòɖi ɖokoe wò ne e le hũhũ ye ɖokoe ò. Trɔ lè e yomè ne wòa kpɔ ŋutifafa eye ne yebe ènubàɖa wɔ̀wɔa mu gbà va ji ènyà na wò ò.

¹⁴Nukɛ ye kpɛ̃ wu suŋubui ò? Ye ŋuti ɖoɖoa ye nyi sùkunɔ̀.

¹⁵Èkɔ sako, èjè sako kudo gàkpo sòso be kɔkɔa bɔ̀bɔ wu tàgbɔ-kukutɔ.

¹⁶Sìgbè àlekè wo bɔ̀nà èxɔ̀ tùtu be sɔtiwo eye ne ànyigbã hũhũ ŋutɔ cã wo mu ɖènà lè woa nɔ̀nɔwo ŋuti òa, nèneake ye nyi àmè kè bùtamè nyuɛ̃ɖe gbɔ̀xue tɔna èdɔ ɖe ji ne mu gbà gbɔjɔ lè vɔ̃vɔ̃ nu ò.

¹⁷Ènyàsòso ènunyatɔ̀ so èjì blibo mèa lè sìgbè èkɔ nyànyà kè le èglì dotèa nène.

¹⁸Kpekui wuwli kè wo ɖo ɖo èglìkpa jia mu teŋu nɔ̀nàtè ɖo àya sɛ̃sɛ̃ nu ò nèneake ye nyi àmè kè si sùsu bàɖawo lè ɖo lè vɔ̃vɔ̃ be gàmèa eye e la jè ànyi gblòo Ànùkua wɔ̀wɔ ɖoɖa èxlɔ̃wo gbɔ

¹⁹Ènu kè jè ŋùkuvi jia nana àɖàsì eye ènu kè lɔ èjìmè na àmèa ye ɖèna sèse lè lãmè fiɔna.

²⁰Àmè kè le dàkpe xèviwoa, le nyà wo eye àmè kè le dɔ̃ ènyà ku èxlɔ̃a le gbã èxlɔ̃kàdodoa.

²¹Àmè kè ɖè kàkla ɖo èxlɔ̃a jia mu gbà ci flima ò, e la teŋu gbà jrà ènyà ŋua ɖo.

²²Ne wò wɔ̀ àjrè kudo èxlɔ̃ wòa, mù gbà vɔ̃ ò: ɖèka wɔ̀wɔa la gbà teŋu va e mè. Vɔ̀a ne wò wɔ̀ fùnya fùnya ku ìa, wò gblɔ̃ ènyà wawla kè lè èwò ku ì dòmèa àlo dokpò àtamè na ɛ̀, nène be nɔ̀nɔmèa la nyà èxlɔ̃ ɖekpekpe lè àmè ŋuti.

²³Èhawòvi lè èhiã mèa do jìpo na ɛ̀ àleke be ne e va gɛ̃ ɖo yebe nyɔ̀na mèa, wò cã wò la ɖù àlè kudo è. Lè tètèkpɔ kè gàmèa wɔ̀ ànùkua ku ì ne wò cà wòa teŋu kpɔ gomè lè yebe ècrɔ̃nuawo mè.

²⁴Ne wo le kpɔ yezo kudo àzìzɔ jè ŋùkɔ̀ na èzò be bìbia nèneake ye nyi èhũ kè kɔ̀nà ɖɛ lè èzũ yomèa yeŋu.

²⁵Ma wɔ̀ ŋùkpɛ̃ na mù gbèɖe be mù hlùɛ̃ èxlɔ̃ nyè ta ò eye nyè mu la bè do è cã gbèɖe ò.

²⁶Eye ne jɔ̀gbèvuɛ̃ ɖe so e gbɔ va na mù ŋutɔ cã, àmè kèwo kpata la sèa, la le woa ɖokoe lè e ŋuti. Kuefã

²⁷Àmè kɛ la dogà ènu nyè eye be la bla ènuyi nyèwo ne woa tu èmɔ̃ do àpe ànyijèje eye àɖe nyè mu la kplɔ̀ mù yi cɔ̃crɔ̃ mè ò?